LALPA duot Israel
2
1 LALPA thu ka kuomah a hung tlung a:2 Fe la, Jerusalem hriet ngeiah,
Hieng thuhai hi puong dar rawh:
‘I tleirawl le mo thar laia,
I mi suklawm nuomzie kha,
Ka theinghil ngai hrim hrim nawh.
I mi hmangai êm êm a,
Tuk lo ram thlalera khom,
I mi zui hlak a ni kha.
3 Israel chu LALPA ta d’in,
Mi thienghlim tak la niin,
A tharsuok ra hmasa a nih;
Ama fa ramtuhai chu,
Thiem naw changa ruot an na,
Sietnain a tlak buok hlak’
Tiin LALPA chun a hril.
Israel thlatuhai suolna
4 Nangni Jakob sungkuohai,
Israel thla po pohai,
LALPA thu hi lo ngai ro.
5 Hieng hin LALPA chun a hril:
“Inthlatuhan keimaah,
Ieng am fel nawna hmuin,
An mi fesan dai a na?
Hmangna bo milim bein,
Hmangna boah an insiem a.
6 ‘Aigupta ram a’nthok a,
Thlaler ram trawl pal tlang a,
Ram fil, ruom inthuk kar a,
Thina hlim le ram trawl hmun,
Tu khom inzin ngai nawna,
Tu khom cheng ngai nawnaa,
Mi thruoi tlangtu LALPA kha,
Khaw lai am a um ta a?’
Tiin an indon ta nawh.
7 Ram thra le a tharsuokhai,
Hnienghnâr taka tlàn dingin,
Keiman ka thruoi lŭt chêu a,
Sienkhom in hung lŭt hnungin,
A ram in sukporchè a,
Ka rochan in sukmuolpho.
8 In thiempuhai chen khomin,
‘Khaw lam LALPA a um a?’
Ti hrimin an indon nawh.
Dàn kengkawtuhai khomin,
Keima an mi hriet naw a,
Thruoituhai ka lakah an hel.
Zawlneihan Baal hmingin,
In kuomah thu an hril a,
Milim hmang lo an zui lem.
Lalpan a mihai a khing
9 “Chuleiin khing ka ti cheu,
In tù le tèhai chen khomin,
Ka khing pei ding chĕu a nih,
Tiin LALPA chun a hril.
10 Kittim thlierkarah fein,
A kamhai zu fang ta u’m;
Kedarca chen mi tir unla,
Ngun takin bi chieng hai sien,
Hieng hi an thaw hlak hrim am,
Ti dâm en fie raw hai se.
11 Pathien tak ni naw sien khom,
Hnam danghai chun an pathien,
An thlàk mei mei hlaka maw?
Ka mihai ruok chun an Ropuina,
Milim hmangloin an thlák si.
12 Vanhai, in pangzat naw maw?
Maktiin inthin hâwp ro”
Tiin LALPA chun a hril.
13 Ka chungah thil suol pahnih,
Ka mihaiin an thaw a:
Hringna tui kei mi hnăwlin,
Tuikhur ding an cho făwm a,
Tuikhur kak le fâm thla zing,
Tui intling thei lo ding chu.
Israel ringum nawna rahai
14 Israel chu siehlaw a ni?
Vanlunga piengb am a ni?
Ieng leia râllâk thila,
A’n chang el am an ta a?
15 Sakeibaknei inrûmha’n,
An inhŭk khum dur dur a,
A ram an sukpawn zo a,
A khuohai an raw fai a,
Hnung son ram an inchangtir.
16 Memfisc le Tapanhes-haiin,
I lû an vaw kol rǐt a ni khah.
17 LALPA i Pathien thruoi lai che,
Nangin i tlànsan leiin,
Hieng thilhai hi i chungah,
I’n tlungtir a ni naw maw?
18 Sihord tuihai dawn dinga,
Aigupta tieng i pan hi,
Iem a na i hlawkpui ding?
Eufretis tui dawn dinga,
Asuria ram i pan khom chu,
Iem a na i hlawkpui ding?
19 I rîtlonan hrem a che a,
I hnungtolnan zil a ti che.
Trǐna hlek khom mi nei loa,
LALPA i Pathien i tlànsan hi,
Ieng ang suol khà am a na,
Ngaituoin hre suok ta rawh,”
Lalpa, Iengkim LALPAN a tih.
Israelhai milim biekna
20 Tiena tlanga inthok khan,
I ringkol suktliekpekin,
I khaidiet ka suktan a,
Sienkhom, ka rong bawl loin,
Tlang sâng thing buk tin hnuoiah,
Milim hmaah bokkhupin,
I mi hur hmangsan lem a.
21 Grep inziet tak ang le
Thra tak ang ka phun che a,
Ieng leia grep puopaa,
I hung inchang am a na?
22 Changala insawp faiin,
Sabon innàl treuh la khom,
Porchè i kaina lai chu,
Ka mitah a’n lang zing tho,
LALPA Pathien chun a tih.
23 ‘Porche ka kai hrim hrim nawh,
Baal ka hnot zui ngai nawh’
Iengtin am i ti thei a?
Ruoma i um dan en la,
I thilthawhai ngaituo rawh.
Sanghawngsei hur lai angin,
Ram tinah i tlân vĕl kha.
24 Ram sabengtung hur laia,
A chăkna a suok chăng a,
Thli chen a’n hnam hlak angin,
Tuin am i chăkna chu,
An chel hnè ta ding a na?
A hung beiseituhaiin,
An zong sawl che ngai loin,
Anni i hnot lem hlak si.
25 Ram dang pathienhai hnotin,
I kè sukna pha naw la,
I dang khom suktrawl naw rawh.
Sienkhom i poisa naw a,
‘Inhrilin a trangkai ta nawh,
Ram dang pathien ka ngai a,
Ka hnot naw thei naw a nih’
Tiin i don lem si kha.
Israelhan hrem an phù
26 “Rukru an man suok pha a,
A’n zak êm êm hlak ang hin,
Israel sungkuohai khom,
An lalhai le hotuhai,
Thiempuhai le zawlneihai,
An muolpho vong ta si a.
27 Thing kuomah, ‘Ka pa i nih,’
Lung kuomah ‘I nau ka nih’
Tituhai chun hnung nghatin,
An hmai an mi’n son nuom nawh.
Sienkhom, buoina an tuok pha,
‘Hung la, mi hung san suok rawh’
An ti nawk ang loi bok si.
28 In kutsuok pathienhai chu,
Khaw lam an um zo ta a?
Hung san suok raw hai cheu chu!
Khuo i nei zat anga tam,
Pathien i nei bok si a!
29 Ieng leia in mi khing am?
Ka lakah in hel vong si,”
Tiin LALPA chun a hril.
30 “I mihai ka hrema chu,
Sienkhom a trangkai si nawh,
Thrat phana’n an hmang teu nawh.
Sakeibaknei hnukrawl angin,
Nangni rawi kawlhnâm ngei chun,
Ka zawlneihai a lem hlak.
31 “Nangni tuta ruoltharhai,
LALPA thu hi ngaituo ro:
Israelhai ta dingin,
Thlalĕr ka ni am a ni?
Thim sa ka chang ta’m a ni?
Ieng leia ka mihaiin,
‘Kan zalen engthawl ta a,
I kuom tieng kir nawng kan tih’
Tia an hril am a na?
32 Nuhmeiin a’n cheinahai,
A theinghil hlak am a ni?
Moin a mo thuomhai chu,
A theinghil hlak am a ni?
Ka mihai ruok chun ni tam,
Tiem seng loa sawt hiel chu,
An mi lo theinghil ta si.
33 Ngaizawng zâwr i va thiem de!
Nawchizorhai chen hiel khom,
I zirtir thei an ta hi!
34 Mihaiin i silfĕnah
Poi tawk lo le retheihai,
Thisen kai chu an hmu a;
I in rok naw hai sien khom,
I sukhlum tawl a ni kha.
35 Chuonga i thaw sà khom chun,
‘Ieng khom suksuol ka nei nawh,
Ka chungah a lungsen nawh’
I la ti tràl trál si a.
Thiem changa i’n ngai leiin,
I chungah ro rêl ka tih.
36 I um dan thlak zung zungin,
Ieng dinga mi dawr kuol che?
Asuria thaw ang bok khan,
Aigupta khoma thawin,
La sukzak veng a ti che.
37 I lu-a i kut suiin,
Chu hmun chu suoksan i tih,
Ringsana i neihai chu,
LALPAN a hnawl tawl leiin,
Hung thrangpui nawng an ti che.