JEREMIA
1
1 Benjamin ram Anathot khuoa thiempuhai laia mi pakhat Hilkia naupa Jeremia thuhai chu: 2 Juda lal, Amon naupa Josia inlala inthoka kum sawm le pathumna kumina a kuomah LALPA thu a hung tlung a. 3 Juda lal, Josia naupa Jehoiakim inlal lai khomin a hung tlung a; Juda lal Josia naupa Zedekia inlala inthoka kum sawm le kum khatna, thla nganaab sala Jerusalem mihai thruoi an ni chen khan, a hung tlung bok a.Jeremia koa a umna
4 LALPA thu ka kuomah a hung tlung a,
5 “Sŭla ka’n din hma chè khan,
Ka lo hriet dai ta che a,
Sŭla inthoka i suok hmain,
Ka lo ser hran ta che a,
Hnamhai kuoma zawlnei dingin,
Ka lo ruot ta chê a nih”
tiin.
6 Kei chun, “E khai, LALPA Pathien, naupang ka la ni a, trong dan ding khom ka la thiem nawh” ka ti a. 7 LALPA ruok chun, “‘Ka la naupang’ ti naw rawh. Ka tirna che taphot kuomah feng i ta, hril dinga thu ka pekhai chè chu i hril ding a nih. 8 San suok pei ding chein i kuomah ka um ding a ni leiin anni chu trì dêr naw rawh” a ta. 9 LALPA chun a kutin ka bau a them a, “Tu hin ka thuhai chu i bauah ka sie ta a. 10 Ngai ta, hnamhai le lalramhai chu phawi a, thriek a, sukse a, pei thla a, siem thra a, indin dingin ka ruot chè a nih” tiin a mi hril a.
Inlàr voi hnina
11 LALPA thu chu ka kuomah a hung tlung a, “Jeremia, iem i hmu a?” a ta. Kei chun, “Ruon thing kauzar ka hmuh” ka ta. 12 LALPA chun, “I hmu indik ie, ka thu hlen dan ding ka melkai zing a nih” a ta. 13 LALPA thu chu ka kuomah a hung tlung nawk a, “Iem i hmu a?” a ta. Kei chun, “Hmar tieng bêl intlok bor bor ka hmu a, hieng tieng hin a hung so liem trĕp a nih” ka ta. 14 LALPA chun, “A rama chenghai po po chungah hmar tienga inthokin sietna ka hung intlungtir ding a nih. 15 Hmar tieng lalrama chênghai po po ka ko suok trĕp tawl a nih” a ta.
“An lalhai chu hung an ta,
Jerusalem kotkhar bula hai chun,
An lalthrungpha hung rem an ta,
A bang po po chu inhuol an ta,
Judai rama khuo po po khom,
Anni chun inhuol an tih.
16 Rilo taka mi maksan a,
Pathien dang hmaa rimtui inhlàn a,
An kuta siem an biek leiin,
Anni chu ka hrem ding thu,
Ka hung puong lang ding a nih.
17 “Chuleiin, insiem zo nghal rawh. Ngir suok la, hril dinga thu ka pekhai che chu an kuomah va puong rawh. An hmaah zâm dĕr naw rawh, chuong naw chun an hmaah sukzâm ka ti che. 18 Voisun hin a ram puma Juda lal le hotuhai, thiempuhai le mipuihai chu ep dingin khawpui kul nghet tak nei, thir ban le dâr bang nei angah ka siem chê a nih. 19 Bei an ti che a, sienkhom hne nawng an ti che, kei i kuomah ka um a, san suok ka ti che” ti hi LALPA thu suok a nih.