Grêp huon hla
5
1 Ka grep huon duot chungchang thu,Hlain ka’n zawt ding a nih:
Tlang pang hnuoi thratna hmunah,
Ka hmangaiin grep huon a nei a.
2 Thlûr a siem a, lung a’n thiel a,
Grêp thra tak chi a phun a;
Vĕngbûk insang a bawl a,
Grêp sawrna ding khur a cho a.
A ra sǐk kâr a nghakhla a,
Sienkhom grep suok a lo ni si!
3 Nangni Jerusalem mihai le,
Judai rama chenghai hin,
Ka grêp huon le kan chungthu hi,
Khai leh, tuhin mi rêlpêk ro.
4 Ka huona ka thaw ta po bak kha,
Thaw dan dang chuong iem a um?
Grep thra ka beisei zing laiin,
Ieng leia a puopa ngotin a ra?
5 Huon chunga ka thaw ding chu,
Tuhin mi lo ngaithlapek hram ro.
A pal thriekin sukram ka ta,
A lung dai thriek bok ka ta,
Mi pal sopin hung um a tih.
6 Ka grep huon chu sukram ka ta,
Tu khomin thrum ta naw ni a,
Thlo fai ni ta naw ni a,
Hling le buorin bawm an ta,
A chungah ruo sûr lo dingin,
Sûm kuomah thu peng ka tih.
7 Iengkim LALPA grêp huon chu,
Israel sungkuo hi a na,
Judahai hi a huon mawitu an na,
An lakah rorelna fel a beisei a,
Thisen insuona ngot a hmu a,
Felna hmu a’n beisei laiin,
Beidong khek ri a hriet lem si.
Chungpikna le hremna
8 Ram laili lai tak hluo a,
In dang inchaw sap pei a,
Lohai khom zauh sap pei a,
Mi dang hmun inchan lo a,
Makhata pumbiltu chu,
A chung a va pik ngei de!
9 Iengkim LALPAN ka hrietah,
Hieng ang hin thu a hril a:
“A in ropui tak el chu,
Rausanin um ngei a ta,
In ropui le mawihai chun,
Hluotu ding hrim nei naw nih.
10 Grep huon pari nga vêlah,
Uoiin litar sawmhni chauh,
Thlai chi trîn sawm tùnaah,
Trîn khat chauh inthar an tih” tiin.
11 Zu dawn ding ringot hnot a,
Zing inhma taka tho hlak,
Uoiin inrui hmâ khat a,
Zan sawt tak tak meng hlak chu,
An chung a va pik de aw!
12 Ruoi an kǐlna hmuna chun,
Tringtrang, perkhuong le khuongte,
Theihlê le uoiin an nei a,
Sienkhom LALPA thilthawhai,
An ngaisak hrim hrim naw a,
A kut suok thilhai khom chu,
Inza nachang an hriet nawh.
13 Hriet thiemna an tlaksam leiin,
Ka mihai chu salah intâng an ta,
An mi lienhai chu phingtrâmin,
An mipuihai chu dangchârin,
An la thi tawl ding a nih.
14 Seol phǐng a suktrăm zuol a,
Inkhi ruol loa zâuin,
A bau chu a ka huou a,
An mi ropuihai le mipuihai,
Inrui puom le hlimhlop chènhai,
Ama ngaisang hlak tuhai chu,
Chu chun lût thla diel an tih.
15 Chu ni a hung tlung pha chun,
Mihai chu thrum hnuoi a ta,
Mihriemhai suktlawm a ta,
Chapo meng insanghai khom,
Sukhnuoiin um tang an tih.
16 Sienkhom Iengkim LALPA chu,
Ama indiknain chawisang a ta,
Pathien thienghlim chu a felnan,
A thienghlimzie inlangtir a tih.
17 Chu phâ chun beramhai chu,
An tlatna hmunah tla nawk an ta,
Hausahai rausan hmuna chun,
Beramte ruolin tuolchai an tih.
18 Inhlèmna hruola suol hnûktu,
Ritlona tawlailir hmangtu chu,
An chung a va pik de aw!
19 “Ei hmu ve theina dingin,
Pathien chun thaw inhmaw sien,
Ama chun mi hung hnaiin,
Ei hriet ve theina dingin,
Israelhai Mi Thienghlim chun,
A remruot intlungtir raw se”
Tituhai chung chu a va pik ngei!
20 Thil thra lo thil thra ti a,
Thil thra thil thra lo titu dam,
Thim chu vara ngai tlattu,
Var chu thima ngaitu dam,
Khâkna thlumnaa ngai a,
Thlumna khâknaa ngaitu chu,
An chung a va pik de aw!
21 Mani ngaia vara insietu,
Mani mithmua thiema inngai chu,
A chung a va hang pik de aw!
22 Uoiin dawna mi hnebăntuhai,
Zu pol thiema mi chungchuonghai,
23 Thamna an fak rŭk leia,
Mi suol thiem inchangtir a,
Mi fel thiem naw inchangtirtuhai,
An chung a va hang pik de aw!
24 Meiin bu pawl a kăng ang le,
Hlo trâwl a kăng ral angin,
An zunghai hung hmon a ta,
An pàrhai chu pilvut angin,
Lĕn hmangin la um a tih,
Iengkim LALPA dàn hnawl a,
Israel Mi Thienghlim thu an hnawl leiin.
25 Chuleiin, LALPA lungsen chu,
A mihai chungah a chok a,
A kut hlângin a vuok a,
Tlanghai an inthin dur dur a,
Kotthlêra hmunhnok ang elin,
Ruong an inthal rem rum a.
Chuong khom chun a lungsenna,
A la lak kir chuong naw a,
A kut khom a la hlâng zing.
26 Hla taka um hnamhai kuomah,
Inhriettirna thon suok a ta,
Kawl kil tawpa hnamhai chu,
Faifûkin ko khawm a ta,
Inrang takin hung nghal an tih.
27 Tu khom châuin tlu naw ni a,
In innghil bok naw ni a,
An kawng inthêp naw ni a,
An pheikhok se bok naw nih.
28 An thal zumhai a ngei a,
An thalngul kuoi sa a na,
An sakor tinhai khom chu,
Lungthir angin a chang a,
An tawlailir ke invir khom,
Thrawngaleivir ang a nih.
29 Keipui angin an inrŭm a,
Sakeibaknei vanglai angin,
An sa se an inngur khum a,
Tu khomin san ngam loin,
An sa se chu an fen hmang.
30 Tuifinriet inrùm angin,
Chu ni chun inrûm khum an ta,
Mihai chu hang ngha vêl an ta,
Thimna le beidongna naw chu,
Thil dang hmu naw ni hai a,
Var khom sûmin hlieng a tih.