Inpâkna hla
135
1 Haleluia.LALPA hming chu inpâk ro,
LALPA siehlawhai po chun,
Ama chu inpâk seng ro.
2 LALPA ina rongbawltu,
A in huonga chêngtuhai,
LALPA chu inpâk seng ro.
3 LALPA chu inpâk seng ro,
LALPA chu a thra si a.
A hming chu zaiin chawi ro,
Chu chu an hoi hle si a.
4 LALPAN ama ta dingin,
Jakob chu a thlang tah a,
A ro hlu di’n Israel chu,
A lo nei bik tah a nih.
5 LALPA ropuizie ka hriet,
LALPA a ropui chungchuong,
Pathien dang po po nêkin.
6 Vànhai le hi leihnuoia,
Tuipui le tuifinrietah,
LALPAN a nuom nuom a thaw.
7 Kâwl kilah sûm a’n suoktir,
Kâwl inleptir zor zorin,
Khuongruopui a’n sŭrtir a,
Thli a’n suo, a bâwm a’nthok.
8 Aiguptaa sä le hriem,
An naulutir a’n thǐtir.
9 Aiguptaa Faraw le
A siehlawhai hremna di’n,
Inchikna thil mak tam tak,
Anni lai a’n tlungtir a.
10 Hnam tam tak a suksiet a,
Lal lien tam tak a that bok-
11 Amonhai lal Sihon dam,
Basanhai lalpa Og dam,
Kanana lal po po khom.
12 A mi Israelhai chu,
An ramhai an rochungtir.
13 Aw LALPA, kumkhawtluongin,
I hming hi dăi ngai naw nih;
Suon la hung dinghai khomin,
LALPA, i hming hrieng an tih.
14 LALPA chun a mihai chu,
Thiem la’n changtir vong a tih,
A siehlawhai chunga chun,
Zangaina a hau si a.
15 Hnam danghai milim biek chu,
Tangkaruo le rangkachak
Hmanga mihriem siem an nih.
16 Bau an nei, an trong thei nawh,
Mit an nei, an hmu thei nawh.
17 Na an nei, an hriet thei nawh,
An bauah thuok a suok nawh.
18 Milim siemtu chu milim,
An thil siem ang char an nih;
Milim betu khom milim,
An lim biek leh angkhat char.
19 Nangni Israel sungkuohai,
LALPA chu inpâk seng ro,
Nangni Aron sungkuohai,
LALPA chu inpâk seng ro.
20 Nangni Levi sungkuohai,
LALPA chu inpâk seng ro,
Nangni LALPA trituhai,
LALPA chu inpâk seng ro;
21 Zion tlanga inthokin,
LALPA chu inpâk un la,
Jerusalema chênghai,
LALPA chu inpâk seng ro.
Haleluia.