LALPA dan
ALEF
119
1 Soiselbohai chu an hamthra,LALPA dan lam hrawtuhai chu.
2 A thu zawmtuhai an hamthra,
Lungril taka zongtuhai chu.
3 Thil indik lo an thaw ngai nawh,
A lamah kal an chawi leiin.
4 I thuruothai chu i mi pĕk,
Zawm ngei dinga i tihai chu.
5 I danhai chu ringum taka
Zawmtu ni thei ve lang chu maw!
6 I thupêkhai ka vong tlat chun,
Muolpho ngai hrim hrim naw ningah.
7 I dan indikzie ka’n chùk pha,
Lungril takin inpâk ka che.
8 I dan thuhai zawm pei ka tih,
Mi zamsan ngai hrim hrim naw rawh.
BETH
Lalpa dan zawm
9 Tleirawlhan ieng tin takin am,
An nun vong thienghlim thei an ta?
I thu angin khawsa hai sien.
10 Lungril takin ka zong che a,
I thu ka pêtsan phal naw rawh.
11 I lakah suol thaw lo dingin,
I thu lungrilah ka khawl khawm.
12 Inpâkna chu chang la LALPA,
I dan thuhai mi’n chuktir rawh.
13 I kam suok dànhai po po kha,
Băuin ka’n sam non ngat ngat hlak.
14 Mihan sum hau an lawm angin
I dàn thu zawm hi ka hlimpui.
15 I dànhai chu ka dawnkhawl a,
I lampuihai khom ka sui hlak.
16 I thu suok ka lawmzawng a na,
I thû ngaithâ ngai naw ningah.
GIMEL
LALPA dàn lawm
17 I siehlaw chunga hin thra rawh,
I thu zawma ka hringna din.
18 Ka mit mi hung sukvarpek la,
I dan makzie hmu thei ka tih.
19 Hnuoia hin khuolzin chauh ka na,
Ka lakah i thupêk thup naw.
20 Ieng lai khomin ka thlarau hi,
An vêl ruoi, i dàn hriet châkin.
21 I zil hlak chapo, trongsephur,
I dàn poisa nawtuhai chu.
22 I thupekhai ka zawm leiin,
Mî hmusit le cheksolnahai
Laka inthok mi siekieng rawh.
23 Lalhan ka sietna zong sienkhom,
I siehlaw hin i dànhai chu,
Ngaituoin dawnkhawl zing a tih.
24 I dàn thuhai ka hlimpui a,
Ka ta din remruottu an nih.
DALETH
LALPA Dan zawm tumna
25 Pilvutah ka’n tâl zing a nih;
I thûin ka hringna hum rawh.
26 Ka um dàn kan zawt, i mi don,
I dàn thuhai mi’n chuktir rawh.
27 I thu zirtir ka hriet thiem chun,
I thilmak thaw dawnkhawl ka tih.
28 Ka thla lungngaiin a chău a,
I thu angin mi sukhrat rawh.
29 Lam indik lo ka hraw phal naw,
Lungsietin i dàn mi hril rawh.
30 Thutak lampui ka thlang tah a,
I dànah ka lungril ka’n nghat.
31 I dàn thuhai ka chel nghet a,
LALPA, mi sukmuolpho lul naw.
32 Ka lungril i’n suo zalen a,
I thupêk ang takin ka tlân,
HE
Hrietthiem hnǐna
33 LALPA, i dànhai mi hril rawh,
Ka zawm kim vong theina dingin.
34 I dàn ka zawm theina dingin,
Hriet thiemna lungvar mi pe la,
Lungril po poin zawm ka tih.
35 I thupêkhai mi’n zawmtir la,
Chu chu ka lawmzawng tak a nih.
36 I dàn thu tieng mi’n nghattir rawh,
Mani trânghma tieng ni loin.
37 Thil hmang lo tieng thlir lo dingin,
Ka mithai mi’n lakkirtir la,
I thu angin ka nun vong rawh.a
38 Nangma trituhai i tiem kha,b
I siehlaw kawla hin hlen rawh.
39 Hming siet kan lăuna la hmang rawh,
I dànhai chu a thra si a.
40 I dàn thuhai ka ngaina a,
I felnan ka hringnun hum rawh.
WAW (VAU)
LALPA Dan ringsan
41 I ngilneina chuoi ngai lo le
I lo tiem tah sandamna chu,
Aw LALPA hung inlangtir rawh.
42 Mi esêltu don lêt ka tih,
I thu ka ringsan tak a nih.
43 Thudik chu ka băua inthokin,
Mi la hmangpek naw hrăm rawh,
Ka beisei innghatna a nih.
44 I dànhai chu zawm pei ka tih,
Chatuon, chatuon, chatuon chenin.
45 I dàn thu zongtu kan leiin,
Engthawl takin leng tang ka tih.
46 Lalhai hmaah i dàn thuhai,
Puongin inhriettir hlak ka ta,
Muolpho ngai hrim hrim naw ningah.
47 I thupêk zawm inhoi ka tih,
Ka thil châk zawng tak a ni si.
48 I thupêk inza’n ka ngaina,
I danhai ka dawnkhawl rop hlak.
ZAYIN
LALPA Dan ringzo
49 I siehlaw kuoma i thu tiem,
Ka beisei innghatna chu nghil naw.
50 Ka nun vong him i’n tiemna chu,
Tuor laia ka’n hnèmna a nih.
51 Chapohan an mi deusaw zing,
Sienkhom i dàn ka pètsan nawh.
52 Tiena i dàn thupekhai chu,
LALPA ka hriet, ka thlamuongpui.
53 I dàn poisa lo mi suolhai,
Ka hmŭ chàng ka lung a sen hlak.
54 Ka’n lawina ieng rŭn sunga khom,
I dànhai hi ka hlâ a nih.
55 Zănah i hming ka’n nghil ngai nawh,
I dànhai ka zawm zing, LALPA.
56 I dàn thuhai ka zawm leiin,
Malsawmna ka dong a ni hih.
HETH
LALPA Dan ngaisangna
57 LALPA, nang ka chanpuol i na,
I thu zawm dingin ka’n tiem tah.
58 I lawmzawng theitawpin ka zong,
I tiem angin hmêl mi’n tlăi rawh.
59 Ka um dànhai ka ngaituo a,
I dàn zawm dingin kal ka pên.
60 I thupêkhai muongchang loa,
Zawm nghal dingin thrang ka lâk tah.
61 Mi suolhan mi khuop de sien khom,
I dàn thuhai ka’n nghil ngai nawh.
62 I dànhai chu a’n dik leiin,
I kuomah lawmthu hril dingin,
Ka zuong tho hlak, thrangrila khom.
63 Nangma trituhai ruol ka na,
I dàn thu zawmtuhai po leh.
64 I hmangainan hnuoi i’n khum a,
LALPA, i dàn mi’n chuktir rawh.
TETH
LALPA Dan indikzie
65 LALPA, i siehlaw chunga hin,
I thu angin i thaw thra hlak.
66 I thupêkhai ka ring leiin,
Varna le hrietna mi tŭ rawh.
67 Ka tuor hma khan ka’n vak hmang hlak,
Tu hin chu i thu ka zawm tah.
68 Nang chu i thra, i thilthaw khom,
I dànhai chu mi’n chuktir rawh.
69 Chapohan khêlin an mi bei,
Sienkhom i dàn ka zawm trăl hlak.
70 An lungril ngarin a chawlol,
Kei chun i dàn ka hlimpui si.
71 Ka tuor hi ka ta din a thra,
I dànhai hriet phanan ka hmang.
72 Rangkachak, tangkaruo sang tam,
Nêkin i thu a hlu lem si.
YODH (JOD)
LALPA Dan indikzie
73 I kuta siemin i mi’n din,
I thupêk ka’n chŭk theina di’n,
Hrietthiemna lungril mi pe rawh.
74 Nangma tritu’n an mi hmu pha,
I thu ka beisei tlat leiin,
Nasa takin hlim raw hai se.
75 I dan a’n dik ka hriet LALPA,
I ringum leia tuor ka nih.
76 I siehlaw thu i tiem ang khan,
I hmangainan mi thlamuong sien,
77 I zangainan mi’n hringtir la,
I dan ka lawmzawng a ni si.
78 Khêla mi hêktu chapohai,
Sukmuolphoin um hai sien la,
Kei chun i thu dawnkhawl ka tih.
79 Nangma tritu chun i dànhai,
Hre di’n ka tieng hung ngha raw se.
80 I dàn zawm thuah fai var lang,
Muolphona tuok ngai naw ningah.
KAPH (KAF)
Sansuok hnǐna
81 I mi sandamna chu ngaiin,
Ka thla hi a’n uoi ngawi ngawi a,
Sienkhom i thu ka beisei tlat.
82 I thu tiem ka thlirna lamah,
Ka mit khom a’n văi zo tah a,
“Ieng tik am i mi thlamuong ding?”
Tiin ka’n don ka’n don hlak a.
83 Savun ip trâwng, intring kai hnung,
Ang chauh lo inchang tah lang khom,
I dànhai ka theinghil ngai nawh.
84 Mi sukdŭdătuhai chungthu,
Ieng tik top am rêlpêk i ta?
Ieng chen top am i siehlaw hi,
I la’n nghăktir pei ding a na?
85 Chapohai chun i dàn kalin,
Ka tlâkna ding khur an cho hi.
86 I thupêk po po ring a um;
Anni chun khêlin an mi bei,
Nangin mi hung thrangpui vat rawh.
87 Hnuoi a’nthok an mi’n ram hman vang,
Sienkhom i dàn thu ka’n thla nawh.
88 I zangainan ka nun hum la,
I thuhai chu zawm pei ka tih.
LAMET
LALPA Dan ringsan
89 Aw LALPA van sânga hai khin,
I thu chu um kumkhuong a tih.
90 I ringumna a pangngai zing,
Suon la hung pei dinghai lai khom;
Hnuoi i’n ngîr nghet, a um ta zing.
91 I dànhai khom an la ngîr zing,
Iengkim hi i siehlaw an nih.
92 I dànhai hlimpui ni naw lang,
Rinum tuorin fam tang ka tih.
93 I dàn thuhai nghil thei naw ning,
Chuonghai hmang chun ka nun i hum.
94 I tä ka nih, mi sandam rawh,
I dàn thuhai zongtu ka nih.
95 Mi rilohan mi that tumin,
Mi’n chăn rûk zing hai sienla khom,
I dàn thuhai ka ngaituo hlak.
96 Thil famkima ngaihai khomin,
Tawp chin an nei vong ti ka hriet,
I thupêk ruok chun a nei nawh.
MEM
LALPA Dan ngainatna
97 Aw, i dàn ka va ngaina ngei!
Ni tin ka dawnkhawl hlak a nih.
98 I thupêk chu ka vong tlat hlak,
Hmêlma nĕkin a mi sukvar.
99 Mi’n chuktirtu nêkin ka’n thŭk,
I thuhai ka dawnkhawl leiin.
100 Upahai nĕkin ka hriet ril,
I dàn thuhai ka zawm leiin.
101 I dàn thu ka zawm theina din,
Suol lampui hrim ka sir ngai nawh.
102 I dàn thu ka pêtsan ngai nawh,
Nangin i mi’n chuktir leiin.
103 Ka băuah i thu a’n hnik ie,
Khuoizu hnîng nêkin a thlum lem.
104 I thu’n hriet thiemna a mi pĕk,
Suol kong hrim hrim ka theidâ vong.
NUN
LALPA Dàn chu khawnvar a nih
105 I thu hi ka ke di’n khawnvar,
Ka lampui elvartu a nih.
106 I dàn indik chu zawm dingin,
Thu intiemin ka namnghet a.
107 LALPA, ka tuor nasa ta êm,
I thu angin mi sukhar rawh.
108 LALPA, ka’n pâkna che pom la,
I dàn thuhai mi’n chŭktir rawh.
109 Ka nuna mawphurtu ka na,c
I Dànhai theinghil nawng ka tih.
110 Mi suolha’n châng an mi kam khum,
Sienkhom i thu ka pètsan nawh.
111 I thu ka kumkhaw ro a na,
Ka lungril sukhlimtu a nih.
112 A tawp chena i dàn zawm din,
Ka lungril khom ka siem fel tah.
SAMEK
LALPA Dan chu hlimna
113 Lungril thrieng neihai ka theida,
I Dàn ruok chu ka ngaina hle.
114 Nang ka’n bǐkna le phaw i na,
I thu, ka beisei innghatna.
115 Suol thawtuhai, mi zamsan ro,
LALPA thu ka zawm ding a nih.
116 I thu angin, mi vong hring la,
Ka beisei hi sukmuolpho naw.
117 Mi chel nghet la, chun him ka ta,
I dànhai ngaihlu zing ka tih.
118 I dàn pêtsantuhai i hnawl,
An hlèmna iengma lo i’n chan.
119 Hnuoia mi rilohai po po chu,
Thîr èk angin i ngai vong a,
Chuleiin i dàn hi ka lawm.
120 Ka tri lei chen ka thä a’n thin,
I dànhai hi râp-um ka tih.
AIN
LALPA dàn zawm
121 Neksawrtu kutah mi’n hlàn naw,
Thil dik le fel ka thaw leiin.
122 I siehlaw hi ngaisak thra la,
Chapohai mi nĕk chĕp phal naw.
123 I tiem sandamna chu nghâk a,
I hlen hun ding ka thlìrnaah,
Ka mithai khom a chau zo tah,
124 I siehlaw hi lunginsiet la,
I dàn thuhai mi’n chûktir rawh.
125 I siehlaw ka ni tlat leiin,
I dànhai ka hriet theina din,
Hriet thiemna inril mi pe rawh.
126 Aw LALPA, i chĕt a hun tah,
I Dàn an bawsiet zing a nih.
127 Rangkachak inhlîr nêk khomin,
I dàn thupĕk ka ngaina lem.
128 I dàn thu ka zawm vong leiin,
Suol kong hrim hrim ka theidâ vong.
PE
LALPA Dàn zawm châkna
129 I thusuokhai a mak ropui,
Chuleichun ka zawm hlak a nih.
130 I thu luong suok chu var a na,
Hrietthiemna mi mawlhai a pêk.d
131 I thupêkhai chu hriet châkin,
Ka bău kain ka’n thuok hlop hlop.
132 I hming ngainatuhai chunga,
I thawpêk rop hlak ang ngei khan,
Zangaiin ka tieng hung ngha rawh.
133 I thu angin mi kei thruoi la,
Suolin a mi hnè phal naw rawh.
134 I thu ka zawm theina dingin,
Nêksawrtu lakah mi hum rawh.
135 I siehlaw chungah i hmêl êng,
Mawi tak chu inlangtir hlak la,
I dàn thuhai mi’n chŭktir rawh.
136 I dàn an zawm nuom naw leiin,
Ka mitthli hi a luong rop hlak.
TSADE (ZADE)
LALPA dan indikzie
137 Aw LALPA nang chu i’n dik a,
I rorêlhai khom a’n dik ie.
138 I thu inhriettir a’n dik a,
Ring tlak a ni takmeu a nih.
139 Râlhan i thu an nghil leiin,
Thrahnemngainan a mi lem zo.
140 I thu tiem chun fie a dâwl a,
I siehlawn a ngaina a nih.
141 Chînin hmusitum ni lang khom,
I dàn thu ka theinghil ngai nawh.
142 I’n dikna pangngai zing a ta,
I dàn khom indik zing a tih.
143 Harsat beidongnan a mi nang,
Sienkhom i thu’n a mi suklawm.
144 I dànhai a’n dik kumkhuo a,
I thu ka hringpui theina di’n,
Hrietthiemna nangin mi pe rawh.
KOPH (QOPH)
San suok hnǐna
145 Lungril po poin ka ko che,
Aw LALPA, nangin mi don rawh.
Chuongchun, i dànhai zawm ka tih.
146 Ka ko che hi, mi sanhim rawh,
Chuongchun, i dànhai zawm ka tih.
147 Vartrien hma’n thoin ka ko che,
I thuah beiseina ka’n nghat.
148 I thu ka dawnkhawl theina di’n,
Zăn khuoin ka mit ka’n sîm nawh.
149 I hmangaina chuoi ngai lo chun,
Ka kona hi lo ngaithla la,
LALPA, i thu rêl dan angin,
Ka hringnun hi mi humpek rawh.
150 Thil suol rottuhan an mi hnai,
Anni chun i dàn an hlat si.
151 Nang ka bulah i um LALPA,
I thupêkhai a’n dik a nih.
152 Tiena tlânga inthok ta khan,
I dànhai chu chatuona di’n,
I suknghet ti ka lo hriet tah.
RESH
Thrangpui hnǐna
153 Ka tuor en la, mi hung san rawh,
I dànhai ka’n nghil ngai si nawh.
154 Mi hrilpuiin, mi’n tlan suok la,
I tiem angin ka nun hum rawh.
155 Mi suol sandam chu a hnâi nawh,
I dàn thu an zong naw leiin.
156 I zangaina a lien, LALPA,
I dàn angin mi’n hringtir rawh.
157 Mi soisatu hmêlma an hrăng,
Sienkhom i dàn ka pêtsan nawh.
158 Phatsantuhai ka hmuh, ka ten,
I dàn thu an zawm ngai si nawh.
159 I thu ka ngainatzie dawn la,
I hmangaina chuoi lo zârin,
LALPA, ka hringnun vong him rawh.
160 I thu laimu thutak a na,
I dàn po po a’n dik kumkhuo.
SIN & SHIN
Thrangpui ngĕnna
161 Lalhan khĕlin an mi bei a,
Sienkhom i thu hi ka’n zâ tak.
162 Rosum tam tak changtu angin,
I thu hi ka hlimpui a nih.
163 Khêl ka tirdak, ka theida bok,
I dàn ruok chu ka ngaina hle.
164 Ni tin voi sari ka’n pàk che,
I dàn thu a’n dik êm leiin.
165 I dàn dittu an thlamuong hlak,
Ieng khomin a sukthlŭk thei nawh.
166 LALPA i sandam ka nghak zing,
I thupêkhai khom ka zâwm bok.
167 I dànhai hi ka zawm pei a,
Ka ngaina êm êm hlak a nih.
168 I dàn thuhai po po ka zawm,
Ka um danhai i hriet vong si.
TAW
Thrangpui hnǐna trongtrai
169 LALPA, ka rawl i kuom tlung sien,
I tiem hrietthiemna mi pe rawh.
170 Ka hnǐna hin i kuom tlung sien,
I tiem angin mi san suok rawh.
171 I dàn i mi’n chŭktir leiin,
Ka hmŭr inpâknan luong liem sien,
172 I thupêkhai a’n dik leiin,
Ka leiin i thû inpâk sien,
173 I dàn thŭhai ka thlang leiin,
Mi veng din i kut inpei sien.
174 LALPA, i sandamna ka ngai,
I dàn hi ka hlimna a nih.
175 Nang inpâk ding chauin dam lang,
I dànhai chun mi suknghet rawh.
176 Beram angin ka’n vàk hmang a,
I siehlaw hi hung zong suok rawh,
I thupêk ka’n nghil ngai si nawh.