Hnèna lawma trongtraina
118
1 LALPA kuomah lawmthu hril ro,Ama chu a thra ĕm si a,
A hmangainan kumtluong a dai.
2 “A hmangainan kumtluong a dai”,
Israel miha’n ti raw se.
3 “A hmangainan kumtluong a dai,”
Aron thlahaiin ti raw se.
4 “A hmangainan kumtluong a dai,”
LALPA trituhan ti raw se.
5 Ka beidongin LALPA ka ko,
LALPA chun a mi hung don a,
A mi’n suo tah, hmun thawvengah.
6 LALPA ka kuom tieng a thrang a,
Tritna hrim hrim nei naw ningah,
Hringmi’n iem mi law thei an ta?
7 LALPA ka kuom tieng a thrang a,
Mi thrangpuitu ama a na,
Mi dotuhai diriem takin,
Hlado la’n sam khum ngei ka tih.
8 Mihriem ringsana nei nêkin,
LALPA-a innghat a thra lem.
9 Lalhai ringsana nei nêkin,
LALPA-a innghat a thra lem.
10 Hnam po poin an mi’n huol a,
LALPA hmingin ka hnot dar vong.
11 Sîr tinah an mi’n huol tuou a,
LALPA hmingin ka hnot dar vong.
12 Khuoi hon angin an mi tuom a,
Hling buk kăng angin an ral a,
LALPA hmingin ka hnot dar vong.
13 Tlu vângin an mi hneng lĕng a,
Sienkhom LALPAN a mi thrangpui.
14 LALPA chu ka hratna le hla,
Ka sandamtu a ni si a.
15 Mi felhai puon in vêla chun,
Hnèna lawm ri a thangkhawk a:
“LALPA kut chang tiengin thilmak,
Ropui tak el a mi thawpek!
16 LALPAN a kut chang tieng a hlăng,
LALPA kut chang tiengin thilmak,
Tam tak a thaw!” tiin an khêk.
17 Fam chang loa hringkhuo changin,
LALPA thilthaw puong pei ka tih.
18 LALPAN a mi thunun na hle,
Ka thî ĕm ruok chu a phal nawh.
19 Felna kotkharhai mi’n hong rawh,
Chu chun lûtin, LALPA kuomah,
Lawmthu ka hril theina dingin.
20 Hi hi LALPA kotkhàr a nih,
Mi indikhai lut thei an tih.
21 I mi don leiin ka’n păk che,
Ka sandamna chu nang i nih.
22 In bawltuhai lung hnâwl ngei chu,
A bulthrut poimaw tak a nih.
23 Chu chu LALPA thilthaw a na,
Ei hmuin ropui ei ti hle.
24 Voisun hi LALPA ruot a na,
A chungah hlimin lawm ei tiu.
25 LALPA, nangin mi sandam la,
Aw LALPA, min hlawtlingtir rawh.
26 LALPA hminga hung a hamthra,
LALPA in an’thok mal kan sawm.
27 LALPA chu Pathien a ni si,
A var ei chungah a hung ĕng.
Sâwl hna chawiin, maicham chenin,
Kût hmangtu ruolin feng ei tiu.a
28 Nang ka Pathien i ni leiin,
I kuomah lawmthu hril ka ta,
Nang ka Pathien i ni leiin,
Chawimawina inhlàn ka ti che.
29 LALPA kuomah lawmthu hril ro,
Ama chu a thra ĕm si a,
A ngilneinan kumtluong a dai.