Lawmthu hrilna
116
1 LALPA chu ka hmangai a nih,A zangaina ka hnǐna rawl,
A mi lo ngaithlakpek leiin.
2 Ka kona a ngaithlăk leiin,
Ka dam sŭngin pán zing ka tih.
3 Thǐna chângin a min huol vel,
Thlăn thim lungngainan mi tuomin,
Beidong buoinan a mi chǐm vel.
4 Chuongchun, LALPA hming chu ka lam,
“LALPA, mi san suok rawh” tiin.
5 Pathien chu mi tlâi le indik,
Lunginsietnaa sip a nih.
6 LALPAN inngaitlawmhai a hum,
Ka tla hnuoi pha a mi san suok.
7 Aw ka thlä, muong takin um rawh,
I chungah LALPA a thra si.
8 Aw LALPA, nangin ka thlarau,
Thǐna a’nthok i’n tlan suok a,
Ka mitthlihai i hrûk hul a,
Kan sui thlŭk ding i vĕng bok a,
9 Mihring ramah, LALPA hmaah,
Dâr ang ka lêng thei tah a nih.
10 “Ka rimsi ngei!” ka ti lai khom
Ama chu ka ring tlat hlak a.
11 “Mi po po khêlhlip vong an nih”,
Ka ti hlak bok, ka chî-ăi pha.
12 LALPA thratna zozai el hi,
Ieng tin am rul kîr thei ka ta?
13 Sandamna no-mawi chu domin,
LALPA hming lamin khêk ka tih.
14 LALPA kuoma ka thu tiem chu,
A mihai hmaah hlen ka tih.
15 A mi thienghlimhai fam chang hi,
LALPA mitah thil hlû a nih.
16 Aw LALPA, i siehlaw takzet,
I siehlawnu naupa ka na,
Bâwi hrĕng an’thok i mi’n suo tah.
17 Lawmthu hril hlanbiek inhlànin,
LALPA hming chu lam zing ka ta,
18 LALPA kuoma ka thu tiem chu,
A mihai hmaah hlen ka tih,
19 LALPA sumtuol zawla ngei chun,
Jerusalem khaw zawl ngeiah.
Haleluia.