Rorêltu Pathien
94
1 Phuba latu, aw LALPA,Phuba latu, aw Pathien,
Hung inlang ta rawh, Pathien!
2 Leihnuoi chunga Rorêltu,
Hung thoin ro hung rêl la,
An phù tawk ang hû peiin,
Chapohai hi thungrul rawh.
3 Aw LALPA, mi suolhai hi,
Ieng chen rau am hlăng i ta,
Ieng chen hiel am an hlim ding?
4 Chapo takin an trong a,
Thil suol thaw chingtuhai hin,
Uong chin tawk hrim an nei nawh.
5 Aw LALPA, mi suolhai hin,
I mihai an sir sop a,
I rochanhai an neksawr.
6 Hmeithai le ram dang mihai,
An nuom nuomin an phil a,
Fahrahai an that pei bok.
7 “LALPA chun hmu hlak a tim!
Israelhai Pathien chun,
A ngaisak nawh” tin an hril.
8 Mi intlawhai, ngaituo ro,
Ieng tik am var suok in ta?
9 Nakawr siemtun hre loin,
A um in ring rêng rêng maw?
Mit siemtun hmu thei loin,
A um in ring rêng rêng a?
10 Hnam thununtu’n hrem loin,
A’n suo in ring rêng rêng maw?
Mihriem zirtirtu meu chun,
Hrietna a tlasam ding maw?
11 LALPAN mihriem ngaituohai,
Iengkim a hriet fai vong a,
Ieng ma lo el a ni khom,
A hriet chieng ĕm êm a nih.
12 Aw LALPA, i thununhai,
I dan i’n chuktirhai chu,
An va hang hamthra de aw!
13 Mi suolhai tlăkna ding khur,
Tlakhol an cho lai chen khom,
Buoina laka inthokin,
Chawl hadamna i pêk hlak.
14 A rochan le a mihai,
LALPAN thlàthlám nawng a ta,
Maksan tawl ngai bok naw nih.
15 Mi fel kutah rorêlna,
Inhlàn kîr ni nawk a ta,
Lungrila mi ngîl poin,
Chu chu zui tawl seng an tih.
16 Mi suolhai chu do dingin,
Tu am hung pen suok a ta?
Mi rilohai laka chun,
Tunam mi hum ngam a ta?
17 LALPA chu mi thrangpuitu,
Lo ni hlauh naw sienla chu,
Fam khuoah chêng ta’ng ka tih.
18 “Ka sir an phet” ti charin,
LALPA, nang chun hmangainan,
I mi chel ngǐr nawk hlak a.
19 Ka beidong lungzǐng laiin,
Hnĕmin i mi sukhlim hlak.
20 Mi chunga phurrik siemtu,
Rorêlna indik naw chu,
Nang leh an inkop thei nawh.
21 Mi fel chu an bei hron a,
Poi tawk lo chu thi dingin,
Thiem naw an inchangtir hlak.
22 Sienkhom LALPA Pathien chu,
Ka kulpui le lungpui bĕl,
Ka’n humhimna a ni si.
23 Aman an suolnahai chu,
La hung thungrul ngei a ta,
An rîtlonahai leiin,
Anni chu nuoi hmât a ta,
LALPA ei Pathien ngei chun,
Anni chu nuoi bo a tih.