BU HNINA
(Sam 42-72)
Saltang trongtraina
Kora nauhai maskil.
Hla var
42
1 Vadungte tui châka dangchâr,Sakhi a’n thuok hlop hlop angin,
Aw Pathien nangma chu ngaiin,
Ka hringnun a’n thuok hlop hlop a.
2 Pathien hring ngaiin ka thlarau,
A dang a châr takmeu a nih.
Iengtik am Pathien kuom tlungin,
A hmêl chu hmu ta’ng ka ti maw?
3 Sŭn-zăna ka bu chu mitthli,
Mihai hlak chun ni tin tinin,
“Khaw la’m ie, i Pathien chu teh?”
Tiin an mi’n don sĕn bok si!
4 Hienga lungril ka phor lai a,
Ka la theinghil thei ngai naw chu:
Pathien in pana hma thruoi a,
Mipuiin mi zui dŭl dŭl a,
Kût hmangtuhan inpâkna hla,
Hlima an sak lai hun dam kha.
5 Aw ka thlä, ieng dinga ngŭi a,
Aw ka lung, ieng dinga i dong?
Pathienah beiseina innghat la,
Ka Sandamtu le Pathien chu,
Ka’n pâk hun um nawk ngei a tih.
6 Ka thlarau hi a ngŭi tlep a,
Jordan ram le Harmon tlang hai,
Mizar tlanga inthok dâmin,
Ka hung hriet vàng váng che a nih.
7 Trêntuikhaw inri hum humin,
Lî an sotir but but angin,
I tuilien infawn sanghai chun,
An mi hung chǐm pil ta si a.a
8 Sunah LALPAN a hmangaina,
Chuoi ngai lo chu a’n langtir a;
Mi sukhringtu Pathien kuoma
Trongtraia inpâkna hlain,
Zana po leh a mi’n awi hlak.
9 Pathien, ka Lungpui kuoma chun,
“Ieng dinga i mi maksan am?
Ieng dinga hmêlma kut tuor a,
Ka’n rŭm a na?” ti’n ka’n don a.
10 Ka hmêlma mi diriemna chu,
Thipui khop hielin a na a;
“Khaw la’m ie, i Pathien chu teh?”
Ti’n an mi’n don sĕn bok si.
11 Aw ka thlä, ieng dinga ngŭi a,
Aw ka lung, ieng dinga i dong?
Pathienah beiseina innghat la,
Ka Sandamtu le Pathien chu,
Ka’n pâk hun um nawk ngei a tih.