Inpâkna trongtrai
Davida ta.
27
1 LALPA chu ka var le tlantu,A ni leiin tu’m trì’ng ka ta?
LALPA chu ka hringnun kulpui,
A ni leiin tu’m trì’ng ka ta?
2 Mi suolhan dol hmang mi tum a,
Nasa taka an mi beiin,
Insui thlu le tlu se lem chu,
Dotu hmêlmahai ni’ng an tih.
3 Sipai ruolin min huol sienkhom,
Ka lung phâng chuong hrim hrim naw nih;
Mi do hron khom ni hai sien la,
Ka ringzona inphet naw nih.
4 Thil pakhat LALPA ka hni a,
Chu chu a nih ka hnot tak chu:
Ka dam sung a inah chêng a,
LALPA hmel mawizie chu thlir a,
A Tempula ama pawl hi.
5 Beidong niin a riebukah,
Ama chun mi lo hum a ta,
A biekbuk rilah mi thupin,
Lungpui chungah mi’n chuon a tih.
6 Mi’n huoltu hmêlmahai chungah,
Ama chun mi chawi sang a ta,
A biekbukah lawm hla sakin,
Hlànbieknahai inhlàn ka ta,
LALPA inpâka hla sakin,
A ta din rimawi rem ka tih.
7 LALPA, ka ko che, ngaithla la,
Zangai hrâm la, mi hung don rawh.
8 “Ka hmêl hmù tum ro” i ti a,
“LALPA, nang a nih ka zong tak”,
Tiin lungrilin ka hril a.
9 I hmêl ka lakah thup naw la,
I siehlaw thrangpuitu i na,
Lungsenin mi nghatsan naw rawh.
Aw ka Pathien le Sandamtu,
Mi hnawlin mi maksan naw rawh.
10 Nu le pan mi maksan sienkhom,
Ka LALPAN mi lo lawm a tih.
11 LALPA, i ditzawng mi hril la,
Mi’n chântu hmêlmahai leiin,
Lam indikah mi thruoi pei rawh.
12 Ka hmêlmahai kut thak nùlna
Dingin min hlân phal lul naw rawh;
Khêla mi beitu nunrawnghai,
Ka chungah an truong a ni hih!
13 Hringmi lêngna hi rama hin,
LALPA thratna la hmung ka tih,
Ti hi ka ring nghet tlat a nih.
14 Insukhrâta LALPA nghâkin,
Insan marin nghak fan fan rawh.