41
1 “Ngakuoiin leviathana i kuoi dok zo ding?Hruolin a lei i khuop dè thei ding?
2 A hnârah hruihruola thlungin,
A orah ngakuoiin i thil tlang thei ding?
3 Ngilnei dingin a ngèn ding che?
Hoihawm takin a biek ding che?
4 Kumkhuoa i rongbawltu ni dingin,
A remti i ring hrim hrim am?
5 Vatê anga vâi ngamin,
I naunu i’n tlàitir ngam ding?
6 Sumdawnghan an hung dot ding che?
An dawrah an zor i ring am?
7 A vunah thal a’n bûr thei ding?
A luah thal kibarin a kâp tlang ding?
8 A chungah kut i thlak vai chun,
Inbei nasa hleng in ta,
Thaw nawk ta ngai naw ti nih.
9 Hnè beisei chu thilthlawn a na,
I hmu ruolin tlâwm nghal i tih.
10 Cho ngam khopa rorum an um nawh.
Ka hmaa lem chu tu’m ngir ngam ding?
11 Thrǐn nawk dinga tu’m thil mi pe?
Van hnuoia iengkim hi ka ta a nih.
12 “A fukè inbŭk dan, a hrat dan le
A hang pieng thiemzie hai khom,
Hril hmai chi hrim a ni nawh.
13 Tu’n am a vun thuo khok thei an ta?
Tu’n am a hmûrah thirbar inbûk an ta?
14 Tu’n am a ha tribaiuma inhuol,
A bău chu pùr ngam an ta?
15 A vun inpawthuo chu a phâw a na,
16 Boruok lut thei lo khopa phûi a na,
17 An inpawthuo thlap vong leiin,
A kârah thil a lût tlang thei nawh.
18 A hang insim chu a var phût a,
A mit chu kawl angin a sen rûm a,
19 A bauah meichok a suok hlut hlut a,
Meisi angin an intrêk uoi uoi a.
20 Phairuong trawl thinga hmang a,
Sa bêlpui suong hlut hlut angin,
A hnâr khû a suok hlut hlut a.
21 A thuokin meihol a mût ling a,
A bauah meichok a suok a.
22 A rîngah a hrătna a um a,
A fĕna photah mi a sukthlabăr a.
23 A tî chu inhrolin a muk trul a,
A pang innemna lai a um nawh.
24 A awmbawr chu lung ang a na,
Bu rawt lung thrut angin a chang.
25 A hung inthok suok meu chun,
Pasalthrahai khom an thlabàr a,
A tawk hmain an tlan se hlak.
26 Kawlhnâma sat a poisa naw a,
Fei le thal zum a poisa bok nawh.
27 Thîr chu bupawl angin a ngai a,
Dâr chu thing hmon tah ang chauin.
28 Thalin a hnot zam naw a,
Virvoma deng lem lem chu,
Bu sia dĕng ang lekah a ngai.
29 Hmol chu bupawl angin a ngai a,
Fei khaw vungin a nui a sukza chauh.
30 A phǐng vun tuomtu phuhlip chu,
Bel koi hăr ngei tak ang a na,
Chirdieka a fĕna sulhnu chu,
Bu chǐlna khawla hrŭt ang a nih.
31 Belpui intlok ang but butin,
Li ril khom a suktlok but but a,
Sahriek bŭr thin ang elin,
Tuipui khom a nok phul hlak.
32 A fĕna hnuhmâ chu a êng phût a,
Tuipui huom chu a var sur hlak.
33 Ama anga tritna hrim nei lo,
Hnuoi chunga hin an um nawh.
34 Insukngêng po po a hnuoi en a,
Insuklulinghai chung en a nih.”