4 Jehosafat chu Jerusalemah a um a, a mihai sirin Beershebaa inthokin Efraim tlangram chen a’n zin a, LALPA, an pi le puhai Pathien tieng a thruoi kir tawl nawk a. 5 Khaw tinah, Judai rama kul nei khuo po poa chun rorêltuhai a sie a. 6 Rorêltuhai kuoma chun, “In thilthaw taphot ngun taka ngaituoin thaw ro. Mihriem ta dinga ro rêl in ni naw a, LALPA aia rorêltu in ni lem. Ama chu ro in rèl pha in kuomah a um zing a nih. 7 Chuleiin, LALPA chu triin, fimkhur takin ro rêl hlak ro, LALPA ei Pathiena chun indiknawna dam, thlei bik neina dam le thamna fak dam a um si nawh” a ta.

8 Jehosafat chun Jerusalema khom LALPA danhai kengkawtu ding le thubuoihai ching feltu dingin Levihai, thiempuhai le Israel sungkuoa lukhaituhai laia threnkhat chu a ruot bok a, chuonghai chu Jerusalemah an um a. 9 An kuoma chun, “LALPA tri dêkin, ringum tak le lungril po poin a rong in bawl ding a nih. 10 In khuo le tui chanpuihai, khawpuia um mi tu khomin thubuoi an hung intlun a, tuolthat dam le dan thupekhai, thuruothai le thusuokhai bawsietna chungthu dama inkhing an ni chun LALPA chunga thil suol thaw lo dinga fimkhur dingin hril ro, chuong naw chun nangni le in unauhai chungah LALPA lungsenna hung tlung hlauh rawi a tih. Indik taka in thaw chun thiem naw chang ngai naw ti niu. 11 LALPA tieng thil hrim hrima hotu tak chu thiempu Amaria ni’ng a ta; lal tieng le inzom thil hrim hrima hotu tak chu Juda sungkuoa lukhaitu, Ismael naupa Zebadia ni’ng a ta; Levihai chu roreltuhai thusuok kengkawtu ni’ng an tih. Huoi takin thaw unla, indik taka thawtuhai kuoma chun LALPA chu um raw se” a ta.