4 Jehosafat chun Israel lal kuomah, “LALPA thu dam la nghak phot la tie” a ta. 5 Israel lal chun zawlnei zali a ko khawm a, an kuomah, “Ramoth Gilead khuo ka hang bei ding am bei naw ding?” tiin a’n don tawl a. Anni chun, “Hang bei rawh, LALPAN i kutah pe’ng a ti che” an ta.

6 Sienkhom, Jehosafat chun, “Hi taka hin LALPA zawlnei tu amani bèk hang rawn ding an um naw maw?” a ta. 7 Israel lal chun, “LALPA mi rawnpek ding zawlnei pakhat Imla naupa Mikaia chu a um annawm. Amiruokchu ama hi ka mi theida zawng tak el a na, ka chungchang thu hi a se tieng ngot naw chu a thra tieng a la hril ngai hrim hrim nawh” a ta. Jehosafat chun, “Lalin chuong chun ti naw hràm raw se” a ta. 8 Lal chun a thoktuhai laia mi pakhat a ko a, “Imla naupa Mikaia hang ko vat rawh” a ta.

9 Israel lal le Juda lal Jehosafat chu Samari kul kotkhar bula hrizawla chun lal thuom inbelin, an lalthrungphaa ve vea chun an inthrung a, zawlnei dang po po chun an hmaah thu an hril a. 10 Chun, Kenaana naupa Zedekia chun thirin siel ki a siem a, “Hieng ang hin LALPAN a hril: ‘Hi ki hin Aram mihai chu an bohmang chenin phir tlang i tih’ tiin” a ta. 11 Chuong ang bokin zawlnei po po chun, “Ramot Gilead-ah hang fe la, hang hlawtling rawh khai, LALPAN lal kuomah a pêk ding a nih” tiin an hril seng bok a.

12 Mikaia ko dinga an tir chun a kuomah, “Ngai ta, zawlneihai po po chun inkhuongruol takin lal chu hlawtling ngei dingin an hril a nih. Nang khomin anni ang chun ngai ve la, a thra tiengin hrilpêk ve raw khai” a ta. 13 Sienkhom Mikaia chun, “LALPA hring zing hmingin ka hril hi, LALPAN a mi hril chauh chu hril thei ka tih” a ta.

14 A hung tlung chun lalin a kuomah, “Mikaia, Gilead-a Ramot khuo ka hang bei ding am bei lo ding?” a ta. Ama chun, “Bei la, hlawtling i tih, LALPAN lal kutah a pêk ding a ni si a” a ta. 15 Lal chun, “Voi ieng zât top am LALPA hminga thutak chauh mi hril dingin thu ka’n tiemtir ta che a? a ta. 16 Mikaia chun, “Israelhai chu vengtu nei lo beram anga tlânga indar vong ka hmu a; LALPAN, ‘Hienghai hin hotu an nei ta naw a, mi tin mani in tieng thlamuong takin inlawi diel raw hai se’ a ti a nih” a ta. 17 Chun, Israel lal chun Jehosafat kuomah, “Ka chungthua chu a se tieng zawng naw chu a thra tieng hrim hrim a hril ngai nawh ti ka hril ta che kha” a ta.

18 Mikaia chun a hril zom pei a, “Chuleiin, LALPA thu hi ngaithla rawh. LALPA chu a lalthrungphaa inthrung a, a chang tieng le voi tienga van mipui po po ngir, ka hmu a. 19 Chun, LALPAN, ‘Ahab hi Gilead-a Ramot khuoah hang fe a, râl kuta thi dingin tuin am thlêm thlu thei a ta?’ a ti a. Pakhatin hieng hin a ti a, mi dangin chuong ang chun an ti bok a. 20 Chun, thlarau pakhat hi a hung suok a, LALPA hmaah a ngîr a, ‘Keiin thlêm thlu thei ka tih’ a ta. 21 Chun, LALPAN a kuomah, ‘Iengtin am?’ a ta. Ama chun, ‘Zu feng ka ta, zawlnei po po hai hmûra chun thlarau khèlhlipah inchang ka tih’ a ta. LALPA chun, ‘Thlêm hnê ngei i ta, hlawtling bok i tih. Fe la, chuong ang tak chun thaw rawh’ a ta. 22 Chuongchun, ngai ta, LALPAN hieng i zawlneihai po po hmûra hin thlarau khèlhlip a sie a, siet tuok dingin i chungthu hi LALPAN a rêl tah a nih” a ta.

23 Kenaana naupa Zedekia chun a hung hnai a, “LALPA thlarau chun i kuoma thu hril dingin keima hi khaw tieng lam am ie a mi suoksan chu?” tiin Mikaia biengah a ben a. 24 Mikaia chun, “Lo ngai zing rawh, pindan rila inbi dinga i fe ni pha leh la hrieng i tih” a ta. 25 Chun, Israel lal chun, “Mikaia hi khawpui optu Amon le lal naupa Joas kuomah thruoi unla, 26 an kuomah, ‘Lal chun hieng hin a tih: Hi mi hi lung inah khum unla, ka hung kir nawk hmâ khat chu bei le tui chauh lo pe ro’ a tih” tiin thu a pêk a. 27 Mikaia chun, “Dama i hung kir nawk a ni hrim chun LALPAN keima hmangin thu a hril nawh tina ni’ng a tih” a ta. Chun, ama vèkin, “Nangni mipuihai, in rêngin ka hril hi inchik rân ro” a ta.

28 Israel lal le Juda lal Jehosafat chu Ramot-a chun an hang fe a. 29 Israel lal chun Jehosafat kuomah, “Insiem danglam ka ta, indonaa chun hang fe veng ka tih. Nang ruok chun i lal puon hi sil zing rawh” a ta. Israel lal chu a’n siem danglam a, indonaa chun a hang fe a.

30 Aram lal chun a tawlailira chuong hotuhai kuoma chun, “Israel lal ti chauh naw chu mi chîn amanih mi lien amanih tu khom bei naw ro” tiin thu a pek a. 31 Tawlailira chuonghaiin Jehosafat an hmu chun, “Israel lal a ni ngei hi” tiin bei tumin an inhuol a, Jehosafat chu inring takin a hung khèk suok a, LALPA Pathienin a hung don a, a hung beituhai chu a dang kirpek a. 32 Tawlailira chuong hotuhai chun Israel lal a ni nawh ti an hriet phing leh an hnot lai chu an kîrsan ta a.

33 Chun, mi pakhat hin tum bik khom nei loin a thalngul a kuoi a, Israel lal chu a awmphaw inzomna kâr takah a kâp a. Ama chun tawlailir khaltu kuomah, “Tawlailir kha kei her la, sipaihai laia inthok hin mi tlan suokpui rawh, hliem na tak ka tuok a nih” a ta.

34 Chu nia an indo chu an inbei nasa hle a. Lal chu a tawlailir chunga chun Aramhai tieng nghain a thrung a, nisa tlak ruol chun a thi ta a.