5 Jehosafat chu LALPA tempul inhuonna tuolzawl thara chun Judai rama inthok le Jerusalema inthoka hung mipui pungkhawmhai hmaa chun a ngîr a. 6 Pathien kuomah, “Aw LALPA, kan pi le puhai Pathien, vana um Pathien chu i ni naw am a ni? Nang chu hnam le ram po po chunga rorêltu i nih. Thilthawtheina le hratna chu i kutah a um a, tu khom ngam ruol i ni nawh. 7 Aw kan Pathien, hi rama chenghai hi i mi Israelhai hmaah hnot suokpekin, ruola i nei Abraham thlahai kuomah kumkhawa dingin i pek tah a ni naw am a ni? 8 Hi rama hin khawsain i hming umna ding Hmun Thienghlim khom an indin ta a. 9 I kuomah, ‘Sietnain a mi tlak buok a, kawlhnâma hremna amanih, hripui inleng amanih, tràm tlâk amanih kan tuok phâ hi Tempul, i hming umnaa hin i hmaah ngirin hung ko kan ti che a, nangin mi lo ngaithlapekin mi hung sandam rawh’ tiin dawvan an lo kai ta kha.

10 “Chuongchun, ngai ta, tuhin Aiguptaa inthoka Israelhai an hung laia an bei ding i phal naw leia sukbohmang loa an fesan Amon thla hai, Moab thla hai le Seir tlanga mihai khan an mi hung bei tum a ni hi. 11 En ta, an mi hang thungrul tum dan hrim hrim hi! Kan rochan dinga ram i mi peka inthoka mi hnot suok an tum a ni hi. 12 Aw kan Pathien, an chungthu i hung rèl naw ding am a ni? Mi chuong zozai mi bei dinga hung inthokhai chu hang do hnê ziezang ding kan ni nawh. Thaw ngaina hrim kan hriet naw a, nangma tieng kan hung ngha lem a ni hi” tiin a trongtrai a.

13 Judahai po po chu nu le nau leh LALPA hmaa chun an ngìr a. 14 Mipui laia ngîr ve zing Jahaziel chungah LALPA thlarau a hung tlung a. Ama chu Zekaria naupa a na, ama chu Benaia naupa a na, ama chu Jeiel naupa a na, ama chu Matania naupa a na, ama chu Levi chia mi Asaf thla a nih. 15 Ama chun, “Lal Jehosafat le Judai ram le Jerusalema chenghai, lo ngaithla ro. LALPA chun hieng hin a tih: ‘Tri naw unla, chuong sipai tam tak lei chun zâm bok naw ro. Indona chu nangni indona a ni naw a, Pathien indona a ni lem. 16 Zinga hin zu bei ro. Ziz kawna an hung kai tung lai ni’ng a ta, Jeruel thlalera ruom tawp tieng chun hmung in tih. 17 Hi indonaa hin in chèt ve ngai naw nih. Thranghmun khaw unla, nghet takin ngir unla, aw Juda mihai le Jerusalem mihai, LALPA sansuokna chu thlir ringot el ro. Tri naw unla, zâm bok naw ro. Zingah bei dingin inthok ro, LALPA chu nangni tieng a thrang ding a ni si a” a ta.

18 Jehosafat chu hmaia hnuoi sikin a bokkhup a, Juda mi po po le Jerusalem mi po po chun LALPA chawibiekin a hmaah an kûn a. 19 Kohat thla le Kora thla Levihai chu an ngir a, rawl inring takin LALPA, Israel Pathien chu an inpàk a.

20 A zinga chun inhma takin an inthok suok a, Tekoa thlaler an pan a. An suok ding chun Jehosafat chu a ngîr a, “Aw Juda mihai le Jerusalem mihai, ka thu hi lo ngaithla ro. LALPA in Pathien chu ring zo unla, sukdingchang a ti cheu; a zawlneihai chu ring zo unla, hmuingil in tih” a ta. 21 Mipuihai a’n fûi zo chun sipaihai hmaah fe a, lawn puma,

22 Chuonga inpâkna hla an hang sak tran char chun Judai ram rûn dinga hung Moab hai, Amon hai le Seir tlanga mihai lo lambuntu ding LALPAN a sie a, chuongchun an tlawm ta a. 23 Amon thlahai le Moab thlahai chun Seir tlanga umhai chu that chimit le sukbohmang vong tumin an bei ta rak el a; Seir tlanga mihai an that zo hnung chun anni le anni chu insukchimit tumin an inbei nawk rak a. 24 Judahaiin thlaler zuk thlir theina hmun an tlung chun sipai tam tak inkulna tieng chu an zuk thlir a, hnuoia chun mithi ruong a’n hlum rum a, dama tlân suok hrim an um nawh.

25 Jehosafat le a rawihai chu rallak thil inkhawm dingin an va fe a, hmangruo le silfen le thil man tam, phur seng lo an hmuh a, a tam êm leiin a sek khawmna dingin ni thum a lâk a nih. 26 A ni li ni chun Beraka ruomah an inkhawm a, LALPA an chawimawi a, chu lei chun voisun chen hin Beraka Ruom^a tia ko a la ni zing. 27 Chu zoah Jehosafatin hma a thruoi a, LALPAN an hmèlmahai a hnèpek leiin hlim takin Jerusalem tieng an kir nawk ta a. 28 Chuongchun, perkhuong le tringtrang rem a, tawtawrawt mûtin Jerusalem an lut a, LALPA Tempulah an fe a. 29 LALPAN Israel hmêlmahai a bei ti an hang hriet chun ram tina mihai chun Pathien chu an tri ta hle a. 30 Sîr tinah Pathienin muongna a pêk leiin Jehosafat ram chu a ralmuong ta hle a.

31 Kum sawmthum le kum nga a niin Jehosafat chu Judai ramah lalin a hung um a, Jerusalemah kum sawmhni le kum nga a’n lal a. A nu hming chu Azuba a na, Silhi naunu a nih. 32 A pa Asa lampui hraw chu petsan loin a hraw ve a, LALPA mithmuah thil indik a thaw a. 33 Hmunsanghai ruok chu sukbo loin a la um zing a, mipuihai khomin an pi le puhai Pathien tieng lungril an la pêk bok nawh.

34 Jehosafat inlal sunga thil tlung danghai chu a bula inthoka a tawp chenin Hanani naupa Jehu chanchin zieknaah a chuong a, chu chu Israel lalhai chanchin inziekna buah a chuong. 35 A hnungin rîtlona leia thiem naw chang tah Israel lal Ahazia le Juda lal Jehosafat chun ruolah an insiem a. 36 Sumdawngna ding long tuk a remtipui a, chu chu Ezion Geber-ah an siem tlàng a. 37 An siem zo chun Maresa mi Dodavahu naupa Eliezer chun Jehosafat kuomah, “Ahazia i’n koppui leiin LALPAN i thil siem hi suksepêk a ti che” a ta. An long ruol chu a koi dar vong leiin sumdawng dingin an suok thei ta nawh.