Tempul bawlna dinga thilpêk
29
1 Lal Davida chun pungkhawmhai kuomah, “Pathien thlang suok ka naupa Solomon hi a la naupangin tonhriet a la nei tlawm a. A thaw ding hi mihriem chêngna in ding ni loin Pathien ta dinga in a ni leiin a ropui si a. 2 Ka theitawpin ka Pathien tempul bawlna ding châk ka lo lak khawm a, rangkachak hmangna dingah rangkachak, tangkaruo hmangna dingah tangkaruo, dâr hmangna dingah dâr, thîr hmangna dingah thîr, thing hmangna dingah thing hmang dinghai khom ka lo sek khawm ta a. Chun, a cheinaa zep ding onik lung hai, lunghlu dumpawl chi dam, lungmawi rong chi hrang hrang dam, lunghlu chi hrang hrang le sailungvar hai tam tak ka lak khawm ta bok a. 3 Chu chau khom chu ni loin, ka Pathien Tempul hi ka’n voipui êm leiin, tuta ka buotsai ta hai hi tiem loin, keima sum, rangkachak le tangkaruohai khom ka Pathien Tempula dingin ka pek a. 4 A sung tieng bang inluonna dingin Ofira inthokin rangkachak hlir kilogram nuoi khat le tangkaruo hlir kilogram nuoi hni le singli vel ka phur suok a, 5 chuonghai chu a hmangna kong hrang hrang le hmang dingin kut themthiemhai ka pek a. Tu hin, LALPA ta dinga phal taka pe ve nuom mi dang ei um am?” a ta.6 Chuongchun, sungkuoa lukhaitu hai, Israel hnam tina hotu hai, sipai sangkhat pei le zakhat peia kawmandar hai, lal hnuoia thoktuhai chun phal takin an hung pek a. 7 Pathien Tempul bawlna dinga an pek po chu rangkachak kilogram nuoi khat le sing sari neka tam, tangkaruo kilogram nuoi thum le sing li neka tam, dar kilogram nuoi ruk le sing hni neka tam, thîr kilogram maktaduoi thum le nuoi li neka tam a nih. 8 Lunghlu neihai chun LALPA Tempula thilhlu sie khawmna enkoltu Gerson mi Jehiel kutah an pêk a. 9 Lungril hmun khat puta lawm taka LALPA an pek leiin mipuihai chu an hlim èm ém a; lal Davida khom nasa takin a hlim a.
Davida trongtraina
10 Mipui hung inkhawm po po hmaa chun Davida’n LALPA a’n pàk a:
“Aw LALPA, kan pu Israel Pathien,
Chatuon a’nthok chatuon chenin,
Chawimawina chang kumkhuo rawh.
11 Ropuina le thilthawtheina hai,
Chawimawina, lalna le mawina hai,
Hnuoi le vana thil iengkim hai,
Nangma ta vong a nih, LALPA.
Ram chu LALPA i ta a nih,
Iengkim chunga lêng i ni si a.
12 Hausakna le chawimawinahai,
Nangmaa inthok vong a na,
Iengkim chunga rorêltu i nih.
Hratna le thilthawtheinahai,
Chawisanga sukhrat theitu po po,
Nangma kuta um vong a nih.
13 Chuleiin tu hin kan Pathien,
I kuomah lawmthu hung hrilin,
I hming ropui kan inpak.
14 “Nisienlakhom, kei hi tu am ka ni a, ka mihai khom hi tuhai am an ni a, hienga phal taka kan hung pek el thei hi? Iengkim hi nangmaa inthoka hung a na, i kuta inthoka kan donghai chu kan hung pèk nawk el che a nih. 15 I mithmuah ram dang mi le mikhuol el kan ni a, kan pi le puhai khom an ni tho kha. Hnuoia kan ni tin nun hi hlim ang chauh a na, beisei ding hrim a um nawh. 16 Aw LALPA kan Pathien, i hming thienghlim ta dinga Tempul bawlna dinga kan hung pekhai po po hi nangma kuta inthoka hung vong a na, i ta vong a nih. 17 Aw ka Pathien, nang chun lungril i fie hlak a, indikna i lawm ti ka hriet. Hieng thilhai po po hi phal takin ka hung pèk a, ka pekna san khom a’n dik a nih. Hi taka um i mipuihaiin phal taka an pèk ka hmu hin ka lawm takzet a nih. 18 Aw LALPA, kan thlatu Abraham le Isak le Israel Pathien, phal taka pek nuomna hi kumkhuoin i mihai lungrilah inneitir la, nangma tran zing dingin an lungrilhai vongpek rawh. 19 Ka naupa Solomon hin i thupekhai, i thu inhriettirhai le i danhai po po zawm a, ka lo buotsai lawk tah i in ropui bawl dingin inpêkzona lungril inneitir rawh” a ta.
20 Chu zoah Davida chun pungkhawm po po kuomah, “LALPA in Pathien chu inpak ro” a ta. Mipui chun LALPA, an pi le puhai Pathien chu an inpak a, LALPA le lal hmaah kûnin an bokkhup a.
Lalah Solomon an pom nghet
21 A zinga chun Israelhai po po ta dingin LALPA kuoma pumraw thilhlânah bawngchal sangkhat, beramchal sangkhat le beramte sangkhat le dawn thilhlân le thilhlân dang dang tam tak an inhlàn a. 22 Chu ni chun LALPA hmaah hlim taka fain an dawn tlang a. Davida naupa Solomon chu lalah an namnghet nawk a, rorêltu dingin LALPA hmaah hriek an nàl a, Zadok chu thiempu dingin hriek an nâl bok a. 23 Solomon chu LALPA lalthrungphaa chun a pa Davida hmunah lalin a thrung a, a hmuingîl hle a, Israelhai po poin a thu an zawm a. 24 Hotu po po le mi huoisen le hrat khawkhenghai le Davida naupahai po po chun lal Solomon hnuoia kûn dingin thu an intiemkam a. 25 Israel mihai po po hmuah LALPAN Solomon chu a chawisang a, Israel rama a hmaa lalhai laia tu khom la chang phak ngai lo lal nina ropui tak chu a’n changtir a.
Davida a thi
26 Jesai naupa Davida chu Israelhai po po chunga lal a nih. 27 Israelhai chungah kum sawmli lalin a um a, Hebron khuoah kum sarih, Jerusalemah kum sawmthum le kum thum a’n lal a nih. 28 Upa tak, tar kûna damin, hausaknaa vur le chawimawi hlawin a thi a, a naupa Solomon chun a lalna chu a hung hluo ta a. 29 Davida inlal lai chanchin, a bula inthoka a tawp chenin, zawlnei Samuel lekhabua hai, zawlnei Nathan lekhabua hai, zawlnei Gad lekhabua hai a chuong a; 30 chu bâkah a’n lal laia chanchin le a thilthawtheizie po po le ama le Israelhai le a ram chunga thil tlunghai chu kimchang takin an ziek bok a nih.