2 Lal Davida chu a ngir a, “Ka unauhai le ka mihai, ka thu hi lo ngaithla ro. Kei chun LALPA thuthlungna bawm siena le ei Pathien ke innghatna ding in bawl ka lo lungril hlak a, in bawlna ding châk khom ka lâk ta a. 3 Nisienlakhom, Pathienin ka kuomah, ‘Nang chu indo mi, thisen insuo mi i ni leiin ka hminga ding in chu bawl naw ti nih’ a ti a.

4 “Amiruokchu, LALPA, Israel Pathienin ka pa sungkuo po po laia inthokin Israel lala kumkhuoa um dingin a mi lo thlang ta a. Juda hnam chu lukhâitu dingin a thlang a. Juda hnam lai khom ka pa sungkuo, ka pa naupahai laia inthokin Israelhai po po lalah a mi lo thlang suok ta bik a. 5 LALPAN naupa tam tak a mi peka chu ka naupahai po po laia inthokin Israel lala LALPA ram lalthrungphaa inthrung dingin ka naupa Solomon hi a lo thlang ta a. 6 Ka kuomah, “I naupa Solomonin ka in le ka tuolzawlhai chu indin a tih. Ka naupa dingin ka thlang ta a, chuongchun a pa ni’ng ka tih. 7 Tuta in zawm zing anga ka thupekhai le ka rorêlhai a zawm zing phot chun, a ram chu kumkhuoa dingin suknghet ka tih’ a ti a.

8 “Chuongchun, LALPA mihai, Israelhai po po mithmuah le ei Pathien hrieta hin LALPA in Pathien thupèk po po chu zawm ding le ngaiven dingin ka’n fui cheu a; chuongchun, hi ram thra tak hi hluong in ta, in hnunga in thlahai pei kuomah kumkhuoin rochung pei in tih.

9 “Chun, nang ka naupa Solomon, i pa Pathien hi hre la, lungril thra famkim putin phûr takin a rong bawl hlak rawh. LALPA chun lungril a en hlak a, lungrila suongtuona po po khom a hriet vong a. Ama i zong chun hmung i ta, i nghatsan ruok chun kumkhuoin pei thlang a ti che. 10 Inngaituo raw khai; Hmun Thienghlim ding in bawl dingin LALPAN a ruot ta che a ni hi. Hrat takin um la, bawl ta raw leh” a ta.

11 Chuongchun Davida chun a naupa Solomon chu biek in hulhliep lim hai, a in lim hai, sum sie khawmna in lim hai, pindan chunghnung lim hai, a sung pindan lim hai, zangaina thrungpha lim hai, 12 a lungrila a suongtuona ang po po, LALPA in inhuonna tuolzawl lim hai, a vela pindan lim po po hai, Pathien ina sum sie khawmna ding in lim hai, thil ser thieng tah hai sie khawmna ding in lim hai chu a pêk a. 13 Chun, thiempuhai le Levihai a pawl pawla an umna ding lim hai, LALPA ina rong an bawlna hmun ding lim hai, LALPA ina rongbawlnaa hmang ding bûr le bêl lim hai, 14 rongbawlna kong hrang hranga hmang ding bûr le bêl chi tin, rangkachak le tangkaruo bûr le bêl le a siemnaa rangkachak le tangkaruo hmang zat ding hai, 15 a hmangna ding dungzui ang peia rangkachak le tangkaruo khawnvar siena ding lim le a khawnvarhai siemnaa rangkachak le tangkaruo hmang zat ding hai, 16 hlanbei siena ding dawkan lim hai, pakhat pei siemna dinga rangkachak le tangkaruo hmang zat ding hai, 17 sa thurna ding rangkachak hlîra siem thirkut hai, thil thèna thlengkûm hai, notung hai, rangkachak hlîra siem thleng hai, tangkaruo hlîra siem thleng berbu hai siemnaa hmang zat ding hai; 18 rangkachak hlîra siem, rimtui rawna maicham ding dam, rangkachak cherubhaiin LALPA thuthlungna bawm chunga thla zara an veng lai lim le a chuongna ding tawlailir siem dan ding lim hai khom a pêk bok a. 19 Davida chun, “Hienghai hi thaw dan dinga rem a ruot sa sukchiengna dinga LALPAN ama kut ngeia a ziek ang kha a nih” a ta.

20 Chun, Davidan a naupa Solomon kuomah, “Hrat tak le huoi takin um la, in chu bawl tran ta rawh. Tri naw la, zâm bok naw rawh. LALPA Pathien, ka Pathien hi i kuomah a um a nih. Hi LALPA Tempul bawlna sin hi zo fel a ni hmâ khat chun fesanin thlathlam ngai naw ni che. 21 LALPA Tempula thiempuhai le Levihai sinthaw ding seng khom thrè fel vong a ni ta a, ieng sina khom kong tinrêngah kut themthiem a thrangpuitu ding che um zing an ta, hotuhai le mipui po po khomin i thupêk taphot zawm pei an tih” a ta.