Davida hnèna changhai
18
1 Chuong lai chun Davidan Filistinhai a bei a, a hne a, Gath le a se vel khuohai chu Filistinhai kuta inthok chun a lâkpèk a. 2 Davida chun Moab-hai khom a hne a, a thu hnuoiah a sie a, sie an hung chawi hlak a. 3 Chu bakah, Davida chun Eufretis vadung hrûl chena a lalna tungding nawk dinga a fe trumin Zoba lal Hadadezer chu Hamath tlung rakin a bei a. 4 Davida chun a tawlailir sangkhat, tawlailir khaltu mi sangsari le sipai singhni a manpek a. Sakor zakhat ti chauh naw chu an zaper tha a sàtpêk vong a.5 Zoba lal Hadadezer san dinga Damaskaa inthoka hung Aram sipaihai chu Davidan singhni le sanghni a lo that a. 6 Aramhai khawpui Damaskaa chun umnghatu ding sipai a sie a, Aramhai chu a lalna hnuoiah an lut a, sie an hung chawi a. Davida chu a fèna taphotah LALPAN hnèna a’n changtir pei a.
7 Davida chun Hadadezer ofisarhai rangkachak phaw po po chu a lak khawm a, Jerusalemah a hung chawi a. 8 Hadadezer khuo Teba le Kun-a inthokin Davida chun dâr tam tak a hung hawn bok a, chuonga inthok chun a nih a hnunga Solomonin dâr tuizèng dam, dâr ban pahni dam le bûr le bèl tam tak a siem chu.
9 Davidan Zoba lal Hadadezer sipai po po a hne tah ti Hamath lal Tou-in a lo hriet a. 10 Ama leh khom lo indo ta hlak Hadadezer a hne lei chun chibai buk le lawmpui dingin Tou chun a naupa Hadoram chu rangkachak, tangkaruo le dâra siem hmangruo tam tak inchawitirin Davida kuomah a tir a. 11 Chuong thilpêkhai chu hnam dang lal a hne tah Edom hai, Moab hai, Amon hai, Filistin hai le Amalek haia inthoka a râllâkhai a’n hlàn hlak ang bokin LALPA kuomah a’n hlàn a.
12 Zeruia naupa Abisai chun Chi Ruomah Edom mi singkhat le sangriet a that a. 13 Edom rama chun umnghatu ding sipai a sie a, Edom mi po po chu Davida thu hnuoiah an hung um ta a. Davida chu a fèna taphotah LALPAN hnèna a’n changtir pei a.
Davida thoktuhai
14 Davida chun Israel ram po po a op a, mipuihai chungah ro indik tak le fel takin a rèl a. 15 Zeruia naupa Joab chu sipai lû tak a na; Alihud naupa Jehosafat chu chanchin ziektu a na; 16 Ahitub naupa Zadok le Abiathar naupa Ahimelek hai chu thiempu an na; Savsa (Seraia) chu ziektu a na; 17 Jehoiada naupa Benaia chu Keret mihai le Pelet mihai hotu a na; Davida nauhai chu lal kuoma thurawn petu an nih.