4 Chuongchun, anni le chun a fe ve a. Jordan vadung an tlung chun thing an phŭr a. 5 Mi pakhatin thing a tuk lai chu a hreipui chu a tlong a, tuiah a tla a. Ama chun, “Pu, a va poi de aw! Mi hrei ka haw a ni nawk nghal si a” a ta. 6 Pathien mi chun, “Khaw lai am a na a tlakna?” a ta, ama chun a tlakna lai chu a kawkhmu a. Elisa chun thing kau a sât a, tuia chun a khaw lut a, hrei chu a hung inlàng suok ta a. 7 Elisa chun, “La raw leh” a ta, a hei ban a, a lâk ta a.

8 Aram lalin Israelhai a’n dopui a. A ofisarhai a rawn hnung chun, “Chu hmun kha hmuna chun inchàn ei tiu” a ta. 9 Pathien mi chun Israel lal kuomah, “Chuong hmuna fe chu fimkhur ro, Aram mihai an hung ding a nih” tiin mi a tir hlak a. 10 Israel lal chun Pathien miin a hrilna hmun chu a va’n thlithlaitir pei hlak a. An hung zàtin Elisa chun lal chu a lo hril lawk pei leiin chuong hmuna hai chun an inhum thei pei a.

11 Chu chun Aram lal chu a suklungsen hle a. A ofisarhai chu a ko a, “Eini lai hin a tu tak hi’m a na Israel lal tienga thrang rûk chu, in mi hril thei naw maw?” tiin a’n don a. 12 Anni laia ofisar pakhat chun, “Aw ka lal le ka pu, a thrang rûk tu khom kan um nawh. Israel rama um Zawlnei Elisa a ni lem. I khum pindan sungrila i hrilhai chen khom hi Israel lal kuomah a ripawt vong a nih” a ta. 13 Lal chun, “Mi tira ka man theina dingin fe unla, a umna va zong suok ro” a ta. Anni chun, “Dothan khuoah a um” tiin an hung ripawt a. 14 Chuongchun, sakor le tawlailir le sipai tam tak a tir a, zanah an va fe a, khuo chu an inhuol a.

15 Pathien mi siehlaw chu zing inhma takin a tho a, tuolah a va dâk a, sipaihaiin sakor leh tawlailir leh khuo an lo inhuol khup chu a hmu a. “E khai, pu, ieng tin am ei thaw ta ding a na?” a ti chùl a. 16 Zawlnei chun, “Tri naw ta la. Anni tienga thrang nêkin eini tienga thrang an tam lem dai annawm” a ta. 17 Chuongchun, Elisa chu a trongtrai a, “LALPA, a hmu theina dingin a mit hung sukvarpek rawh” a ta. LALPA chun siehlaw mit chu a sukvarpek a, a hmu thei ta a, Elisa umna vela tlanghai chu mei tawlailir le sakorin an lo sip hmur el a.

18 Ama tieng pana hmêlmahai an hung thlak lai chun LALPA kuomah Elisa a trongtrai a, “Hienghai hi an mit sukdel rawh” a ta, Elisa hni ang chun an mit a sukdel ta vong a. 19 Elisa chun, “Hi chu lampui a ni nawh, hi chu khuo a ni nawh. Mi zui pei unla, in mi zong kuoma chun thruoi ka ti cheu” a ta, Samaria khawpuia chun a thruoi lut tawl a. 20 Khawpui an lut hnung chun Elisan, “LALPA, an hmu theina dingin an mit sukvarpêk rawh” a ta. An mit chu LALPAN a hongpek a, an hang ngha vel chun Samaria khawpui sungah an lo um ta dêr el a. 21 Israel lalin anni rawi a hmu chun Elisa kuomah, “Pa, ka that tawl ding? Ka that tawl di’m a ni?” a ti chûl a.

22 Elisa chun, “That lo e. I kawlhnâm le thalngul hmanga sala i manhai chu i that hlak am a ni? Bu le dawn ding pe la, fain dawn hai sien, an pu kuomah kir nawk raw hai se” a ta. 23 Fak ding nasa takin an buotsaipek a, faa an dawn zo chun an infetir ta vong a, an pu kuomah an kìr nawk a. Aram mi rûn pawlhai chun Israel ram an rûn nawk ta ngai nawh.

24 Chu hnunga chun Aram lal Ben-Hadad chun a sipai po po a khawm a, Samaria khawpui chu an hang inhuol a. 25 An inhuol bet tlat leiin Samaria chu an tràm nasa èm ém a, sabengtung lu hi tangkaruo sekel sawmrietin an zor a, vathru êk khom gram zahniah tangkaruo sekel ngain an zor hiel a nih.

26 Kul tlànga Israel lal a fe lai chu nuhmei pakhatin, “Aw laltak, ka pu, mi thrangpui rawh” tiin a ngèn a. 27 Ama chun, “LALPAN a thrangpui che a ni ngot naw chun kei chun iengtin am ka thrangpui ding che a na? Hrizawla inthokin maw? Grep sawrna khura inthokin maw? 28 Iem a na i harsatna chu?” a ta. Nuhmei chun, “Hi nu hin, ‘Voisuna ei fak dingin i nau thaw la, zingah ka nau ei fak dingin thaw veng ka tih’ a ta. 29 Ka naupa chu kan suong a, kan fak ta a. A tuka chun a kuomah, ‘I naupa hung thaw ve ta raw leh’ ka ta, sienkhom a thup hmang dai si a” a ta.

30 Lalin chu chu a hrietin a lal thuom a pot thlèr a. Kul tlânga a fe lai chu mipuiin an en thrup a, a zakaw hnuoia chun saiip a lo hâk zing a. 31 Ama chun, “Safat naupa Elisa rǐng voisuna tan a ni naw chun LALPAN a law law mi law sien, chu nêka nasa khom chun mi thaw raw se” a ta. 32 Elisa chu a inah a um a, upa ruolin an pan a. Lalin hma lawka a tirhai an hung tlung hma chun upahai kuomah, “Hi tuolthattupa hin ka lu la dingin mi a hung tir ti in hriet ve naw maw? Ngai ta u, a mi tirhai an hung tlung pha leh kotkhara khan lo dang tlat ro. A hnunga ke pên ri khom chu a pu ke pèn ri a ni nghe nghe ta naw maw?” a ta. 33 Chuonga a biek tawl lai zing chun mi tirhai chu an hung tlung thla a. Lal chun, “Hi sietna hi LALPAA inthok a nih. Ieng leiin am LALPA chu ka nghâk zing ding a na?” a ta.