2 Aram mihai chu a pawl pawla an ramsuoknaah voi khat chu Israel rama inthokin nuhmei tê pakhat hi salah an hung hawn a, Naaman nuhmei rong a bawl hlak a. 3 A pi kuoma chun, “Ka pu hin Samaria-a um zawlnei pakhat va hmu sien ka va ti de aw! A phâr hi a lo sukdam el ding a na” a ta.

4 Naaman chu a pu kuomah a fe a, Israel rama inthoka nuhmei naupang an hung thruoiin a hrilhai chu a pu a hril a. 5 Aram lal chun, “Zu fe raw khai, Israel lal kuomah lekhathon ziek ka tih” a ta. Chuongchun tangkaruo cheng singthum, rangkachak cheng sangruk le inthlakna ding thuomhnaw man tam tuok sawm chawiin a’n thok suok a. 6 Israel lal ta dinga a lekha chawia chun, “Hi lekha hi chawiin ka kawmandar Namaan chu a phâr i lo sukdampèk dingin i kuomah ka hung tir a nih” ti a chuong a.

7 Israel lalin chu lekha a hang tiem zo chun a lal puon a kei thler a, “Kei hi Pathien am ka ni? Mi sukhluma sukhring thei am ka ni? Ieng dinga hi mi hin phâr sukdam dinga ka kuoma a hung tir am a na? Ngai ta u, ka chunga buoina siem tuma remchang a zong dan hi!” a ta.

8 Israel lalin a puon a kei thlèr thu Pathien mi Elisa’n a lo hriet chun thu a thon a, “Ieng dinga i puon i pot thlèr am a na? Chu mi chu ka kuomah hung tir la, Israel rama hin zawlnei a um ti hre el a tih” tiin. 9 Naaman chu a sakor leh a sakor tawlailirhai leh Elisa kuomah a hung a, Elisa kotkhar bula chun a chawl a. 10 Elisa chun, “Jordan vadungah voi sari inphûm la, i vunhai chu hung pangngai nawk a ta, hung dam inthieng el i tih” ti hril dingin mi a tir a.

11 Naaman chu lungsen takin a kir nawk ta a. “Ngai ta u, ama ngei hung suok a ta, ka hmaah ngîr a ta, LALPA Pathien hming lam a ta, ka’n phàrna hmun hmun chu a kuta tuoiin, phâr chu sukdam dingin ka lo beisei a na. 12 Damaskaa vadung Abana le Pharpar hai chu Israel rama vadung po po nêka thienghlim lem an ni naw am a ni? Chuong vadunga hai chun insilin ka’n sukthienghlim thei naw am a ni?” a ta. Chuongchun, lungsen takin a kîr a.

13 Naaman siehlawhai chun an va hnai a, “Pa, zawlnei khan thil khir tak inthawtir ding che ni sien, i thaw el naw ding maw? ‘Va’n sil la, va’n sukthienghlim rawh’ i kuoma a ti kha thaw ding lem awm a ni naw maw?” a ta. 14 Chuongchun, a trum a, Pathien mi ti angin Jordana chun voi sari a zuk inphûm a, a pangti chu naute vun ang elin a hung um a, a hung inthieng ta a.

15 Naaman chu a rawihai leh Pathien mi in tieng chun a kir nawk a, a hmaah a ngir a, a kuomah, “Israel rama chauh naw chu khawvel pumpuia hin Pathien a um nawh ti tu hin ka hriet tah. Tu hin i siehlaw thilpek hi mi pompek hrâm rawh” a ta. 16 Elisa ruok chun, “A rong ka bawl LALPA hring zing hmingin ka hril, ieng khom la naw ning” a ta. Naamanin a ngen raka chu a lâk nuom chuong nawh.

17 Naaman chun, “Chuong chu a ni si leh i siehlaw hi sabengtung pahni phur tawk bèk pil mi pe raw khai; tuta inthok chu i siehlaw hin LALPA kuoma chauh naw chu pumraw thilhlan le inthawina hrim hrim pathien dang kuomah inhlàn ta naw ningah. 18 Hi thil pakhata chauh hin LALPAN i siehlaw hi ngaithiem raw se: Rimon tempula ka pu a lut phâ, ka kut ringsana kûna chibai a buk phaa Rimon tempula ka kûn ve pha chun, i siehlawin hi thil a thaw hi LALPA chun ngaidam raw se” a ta. 19 Elisa chun a kuomah, “Thlamuong takin fe rawh” tiin a’n thla a, chuongchun, a kuoma inthok chun a suok ta a.

20 An la phak hlat hmain Elisa siehlaw Gehazi chun, “Ka pu hin Aram mi Naaman thil hung chawihai la hlek loin a’n fetir nawk el a, LALPA hring zing hmingin ka hril hi, va hnot ka ta, iemani zât bèk chu va lapêk ka tih” a ta. 21 Chuongchun. Gehazi chun Naaman chu a hnot zui a. A kuom tienga hung tlan mi tu amanih Naamanin a hmu chun lo be dingin a trum a, “Thil thra tieng thu chu ni awm tak maw?” a ta. 22 Ama chun, “Ni e, thil thra tieng thu a nih. Ka puin, ‘Efraim tlangrama inthokin zawlnei pahniin an mi hung sir thut a, anni chu tangkaruo cheng sangthum le inthlakna ding silfen pahni pe raw khai’ tia hril dingin a mi tir a nih” a ta.

23 Naaman chun “Sangruk hi la lem hrâm raw khai” a ti tràl a. Chuongchun, tangkaruo sangruk chu inthlakna ding silfen pahni le chun ip hniah a thun a, a siehlaw pahnihai chu a’n phurtir a, Gehazi hmaa chun an fe a. 24 Tlang an tlung chun Gehazi’n ip hni chu a lâk a, inah a sie hre a, mi pahnihai chu a tir kìr nawk ta a. 25 Gehazi chu inah a lut a, a pu hmaa chun a ngîr a. Elisa chun, “Gehazi, khaw laia fe che?” a ta, ama chun, “I siehlaw hi khaw lai khom ka fè nawh” a ta.

26 Sienkhom Elisa chun, “A be ding chea tawlailira inthoka mi a hung trum lai khan ka thlarau chu i kuomah a fe pei a ni naw am a ni? Tu hi tangka hai, silfen hai, oliv huon hai, grêp huon hai, bawinu hai le bawipa hai làk hun am a ni? 27 Chuongchun, Naamana phar chu nang le i thlahai chungah kumkhuoin kop lem tâng a tih” a ta. Gehazi chu Elisa kuoma inthok chun a suok a, vûr anga varin a taksa chu a hung inphàr ta vong a.