5 Hmeithai chu a inah a’n lawi a, a nauhai leh kot an inkal khum a. Bêlhai chu a kuomah an hung chawi a, a lo sung sip pei a. 6 Bêl a sung sip vong hnung chun a nauhai kuomah, “Bel hung la sa ro” a ta. Anni chun, “Bêl dang a um ta nawh” an ta, sahriek chu a kang ta a. 7 Anni chun Pathien mi chu an va hril a, ama chun, “Sahriek chu va zor unla, i leibat chu va rul la, a chuong po chu i nauhai le in khawsakna dingin hmang ro” a ta.

8 Ni khat chu Elisa chu Sunam khuoah a’n zin a, chu taka chun nuhmei neinung tak el a um a, bu fa dingin a lo fiel a. Chuong ang chun, a fe le hungah chu ina chun chawlin bu a fak hlak a. 9 Chu nuhmei chun a pasal kuomah, “Ei in hung sir vet pa hi Pathien mi a nih ti ka hriet. 10 A mi hung sir changa a riekna dingin in sawnga khin a pindan ding siempek ei ta, khum dam, dawkan dam, thrungna dam le khawnvar siena dam siepek ei tih” a ta.

11 Ni khat chu Elisa a hung nawk a, a pindana chun a kai tung a, a zâl a. 12 A siehlaw Gehazi kuoma chun, “Sunam nu kha hang ko ta” a ta, a va ko a, a hmaa chun a hung ngîr a. 13 Ama chun a siehlaw kuomah, “Hieng hin hril rawh: ‘Hieng khopa buoi hin i mi lo enkol a, thawpek thei che iem kan nei a? Lal kuoma dam sipai kawmandar kuoma dam iem ka hnipek ding cheu?’ tiin” a ta. Ama chun, “Ka chipuihai laia in neia khawsa ka ni annawm” a ta. 14 Elisa chun a siehlaw kuomah, “Chuong a ni si chun iem ei thawpek ding aw?” a ta. A siehlaw chun, “Naupa nei lo a na, a pasal hlak chu a tar ta bok si a” a ta. 15 Elisa chun, “Va ko nawk rawh” a ta, ama chu kotkhar bieng chelin a hung ngir a. 16 Elisa chun a kuomah, “Tu ang hun a hung tlung pha leh naupa pom tang i tih” a ta. Ama chun, “Ni lo pu, nang Pathien mi chun i siehlawnu hi hlêm der lul naw rawh” a ta.

17 Nuhmei chu a hung inrai a, Elisan a kuoma a hril ang ngei khan chu hun vela chun naupa a nei ta a. 18 Naute chu a hung sei lien pei a. Ni khat chu busiktuhai kana fe a pa chu a zui ve a. 19 A pa kuomah, “Ka lu, ka lu” a ta. A siehlaw kuoma chun, “Pom la, a nu kuomah va thak rawh” a ta. 20 Siehlaw chun a nu kuomah a pom phei a, sunchang lai chen a nu mal chungah a’n thrung a, a thi el ta a. 21 A naupa chu Pathien mi pindana chun a pom tung a, a khum chungah a’n zàl a, kot a khar a, a suok ta a. 22 A pasal chu a ko a, “Pathien mi kuomah fea ka hung kir nawk nghal theina dingin siehlaw pakhat le sabengtung mi buotsaipek rawh” a ta. 23 A pasal chun, “Voisun khera iem a kuoma fe a trûl a na? Thla thar ni khom a ni naw a, Sabat khom a ni bok si nawh” a ta. Ama chun, “A poi chuong lem” a ta.

24 Chuongchun, sabengtung chungah a chuong a, a siehlaw kuomah, “Hma thruoi la, fe pei la, thu ka pêk che a ni naw chun muongchang dêr naw rawh” a ta. 25 Chuonga fe peiin Pathien mi umna Karmel tlang chu a tlung a. Ràla inthokin Pathien mi chun a lo hmu a, a siehlaw Gehazi kuomah, “En ta, Sunam nu kha a ni tlat el! 26 Tlan la, lo va tuok la, ‘I dam maw? I pasal a dam maw? I naupa a dam maw?’ lo ti rawh khai” a ta. Ama chun, “Dam e” a ta.

27 Chun, tlângah Pathien mi kuom a hang tlung chun a keah a chel a. Gehazi chun ama chu va nam kieng a tum a, sienkhom Pathien mi chun, “Tosan rawh. Beidongna nasa takin a tlâk buok a ni hi. Chu chu LALPAN ka lakah a thup hri a, a mi la hril hri naw a nih” a ta. 28 Ama chun, “Pu, naupa ka hni che am a ni? ‘Ka beisei suksângin mi hlèm der lul naw rawh’ ka ti lem che a ni naw maw?” a ta.

29 Elisa chun Gehazi kuomah, “I silpuon kha i kawngah zêl la, ka hmol hi chawi la, tlân nghal rawh. Lampuiah tu khom chibai naw la, an chibai che khomin bûk ve kher naw la, ka hmol hi naupang hmaiah innghat rawh” a ta. 30 Sienkhom, chu naupang nu chun, “LALPA hring zing hming le i hringna sâlin ka hril, “I thrang naw chun kir naw top ka tih” a ta, Elisa chu a tho a, a zui ta a. 31 Gehazi chun hma a lo khal a, naupang hmaia chun hmol chu a khang a, sienkhom ieng ri khom a suok naw a, a châng bok nawh. Gehazi chu a tlàn kir a, “Naupang chu a la thranghar chuong nawh” tiin Elisa chu a hril a.

32 Elisa’n in a hung tlung chun naupang chu ama khumah thiin an lo inzàl a. 33 A lût a, kot a’n khàr khum a, LALPA kuomah a trongtrai a. 34 Chun, khumah a kai a, hmûr le hmûr, mit le mit, kut le kut chuktuoin naupang chu a baw a. Chuonga a chunga a hang bok chun naupang pang chu a hung lum tran ta a. 35 Elisa chu a tho a, pindana chun an vak vel a, khuma chun a kai a, naupang chunga chun a bok nawk a. Chuongchun, naupang chu voi sari a hung insim a, a mit a hung meng ta a. 36 Elisa chun Gehazi chu a ko a, “Sunam nu kha hung ko rawh” a ta. A ko a, a hung lut chun, “I naupa hi pom ta raw leh” a lo ta. 37 Amanu chu a ke bulah a bokkhup a, chu zoah a naupa chu a pom a, a suokpui ta a.

38 Elisa chu Gilgal tieng a kir nawk a, chu lai rama chun tràm a tla nasa hle a. Zawlnei ruolin an hung inhmupui a, a siehlaw kuoma chun, “Bel lien tak khan bu hruoi suongpek rawh” a ta. 39 Chun, mi pakhat hi ram tieng hmeruo zongin a fe a, ram hrui a hmu a, ûm râ chu a silpuon sipin a hung fûn a, a khoi a, iem a nih ti hre lo chun bu hruoia chun a thlâk a. 40 Bu hruoi chu an hang thur a, an fak chun, “Aw Pathien mi, bêl sunga hin thina a um” tiin an khêk chûl a, an fak thei naw a. 41 Elisa chun, “Beiphit hung la ro” a ta. Bêla chun beiphit chu a phul a, “Hi mihai fak ding hin thur ta ro leh” a ta, bêl sunga chun trium ieng khom a um ta naw a.

42 Baal Salisaa inthokin mi pakhat a hung a, Pathien mi ta dingin bu thar hmasa taka inthoka siem barli beiper sawmhni le bu thar vui iemani zat a hung chawi a. Elisa chun, “Mipui fak dingin sem ro” a ta. 43 A siehlaw chun, “Ieng tin am hieng zat chauh hi mi zà zet fak ding chun ka sem ngam ding?” a ta. Elisa ruok chun, “Mipui fak dingin sem ro. Hieng hin LALPA chun a hril: ‘Fa seng an ta, an fàk bàng khom iemani zat um a tih’ tiin” a ta. 44 Chuongchun a hang sem a, an fâk seng a, LALPA hril ang khan, an fàk mahla iemani zât a la chuong a nih.