2 LALHAI
Elija le Lal Ahazia
1
1 Ahab thi hnungin Israelhai chungah Moab mihai an hel a. 2 Ahazia chu Samaria khawpuia a pindan chunghnung tukver zawngdaikal awnga chun a tla a, a’n tet sil leiin mi a tir a, “Fe unla, ka natna hi ka dam suokpui ding le ding naw Ekron khuoa an pathien Baal-Zebub va rawn ro” tiin thu a’n cha a.3 Nisienlakhom, LALPA vantirkoin Tisbe mi Elija kuomah, “Tho la, Samaria khaw lal mi tirhai lo be dingin hang fe la, an kuomah, ‘Israel rama hin Pathien a um ta naw leia Ekron khaw pathien Baal-Zebub rawn dinga fe in ni? 4 Hi lei hin LALPAN hi hi a ti a nih: i khuma inthok khan tho kàng ta loin thi ngéi ngèi i tih’ tiin hril rawh” a ta.
5 A mi tirhai an hung kir chun lalin, “Ieng tiziea in hung kir nawk am a na?” a ta. 6 Anni chun, “Mi pakhat mi be dingin a hung a, kan kuomah, “Fe nawk ta unla, lal kuoma chun LALPAN hieng hin a tih: Israel rama hin Pathien a um ta naw leia Ekron khaw pathien Baal-Zebub rawn dinga fe in ni? Hi lei hin LALPAN, ‘I khuma inthok khan tho kàng ta loin thi ngéi ngèi i tih’ a ti a nih” an ta.
7 Lal chun, “Nangni be dinga hung, chuong ang thu hriltu cheu chu mi ieng ang am a na?” a ta. 8 Anni chun, “Sahmulin a’n thuom a, savun kawngchun a chûn bok” an ta. Lal chun, “Tisbe mi, Elija a ni chu” a ta.
9 Chuongchun, lal chun Elija kuomah a sipai kapten chu mi sawmnga thruoiin a tir a. Tlang sîpa inthrung Elija kuoma chun kapten chu a hang fe a, “Nang Pathien mi, lalin hung thla nghàl raw se a ti chê a nih” a ta. 10 Elija chun, “Pathien mi ka ni takzet chun vana inthokin mei hung tla sienla, nang le i rawihai sawmnga le khan kàng hlum vong raw se cheu” a ta. Chuongchun, vana inthokin mei a hung tla a, kapten le a rawihai sawmnga chu a kàng hlum ta vong a. 11 Lal chun kapten dang, mi sawmnga bok thruoi chu a tir nawk a. Kapten chun Elija kuomah, “Nang Pathien mi, lalin hung thla nghàl raw se’ a ti che a nih” a ta. 12 Elija chun, “Pathien mi ka ni takzet chun vana inthokin mei hung tla sienla, nang le i rawihai sawmnga kha kàng hlum vong raw se cheu” a ta. Chuongchun, vana inthokin Pathien mei a hung tla a, kapten le a rawihai sawmnga chu a kàng hlum ta vong a.
13 Lal chun a voi thumnaah sipai kapten dang, mi sawmnga bok thruoi chu a tir nawk a. Kapten chu a hang fe a, Elija hmaa chun dingthrathruonin, “Pathien mi, lunginsiet takin ka hringna le hieng i siehlaw mi sawmngahai hringna hi mi hlutpek hrâm rawh. 14 En ta, vana inthoka mei hung tla chun ka hmaa kapten pahnihai le an rawihai a kàng hlum zo vong a ni kha. Tu ruok hin chu ka hringna hi mi hlutpêk hrâm rawh” a ta.
15 LALPA vantirko chun Elija kuomah, “Ama ruol hin fe thla rawh, tri dêr naw rawh” a ta. Elija chu a tho a, ama ruol chun lal kuomah a zu fe a. 16 Lal kuoma chun, “LALPAN hi hi a ti a nih: Israel rama hin rawn ding Pathien a um ta naw leia Ekron khaw pathien Baal-Zebub rawn dinga mi i tir a ni? Hi lei hin LALPAN, ‘I khuma inthok khan tho kàng ta loin thi ngéi ngèi i tih’ a ti a nih” a ta.
17 Elija hril Pathien thu ang chun a thi a, naupa a nei naw leiin a unaupa Joram chu ama hmunah, Juda lal Jehosafat naupa Jehoram inlal kum hninaa chun a hung inlal a. 18 Ahazia inlal laia thil tlunghai le a thilthawhai chu Israel lalhai inlal lai chanchin inziekna lekhabuah a chuong a ni naw am a ni?