4 Elija chun, “Elisa, hi taka hin lo um rawh, LALPAN Jeriko khuoah a mi tir a nih” a ta. Elisa ruok chun, “LALPA hring zing hming le i hringna sâlin ka hril hi, umsan nawng ka ti che” a ta. Chuongchun, Jerikoa chun an zu fe tlàng a. 5 Jerikoa zawlnei ruol chu Elisa kuomah an hung a, “Voisun hin i pu hi LALPAN a lâk ding a nih ti i hriet am?” an ta. Elisa chun, “Hre e! Sienkhom hril puok naw ro” a ta.

6 Elija chun Elisa kuomah, “Hi taka hin lo um la, LALPAN Jordan vadungah a mi tir a nih” a ta. Elisa ruok chun, “LALPA hring zing hming le i hringna sâlin ka hril hi, umsan nawng ka ti che” a ta. Chuongchun, an pahni chun Jordan panin kein an fe tlàng a. 7 Jordan kama Elija le Elisa ngirna ep taka chun hla deu hlekah zawlnei ruol sawmnga an ngir ve a. 8 Elija chun a silpuon chu a hlîp a, a ziel tom a, tui chu a vuok a, khing tieng khing tieng a hung inthre a, an pahni chun hnuoi chàrah an fe kai a.

9 An kai hnung chun Elija chun Elisa kuomah, “I kuoma inthoka lak hmanga ka um hma hin ieng am thawpêk lang che i nuom a? a ta. Elisa chun, “I thlarau chang lèt hni hi chang ka nuom” a ta. 10 Elija chun, “Thil khir tak i hni a, amiruokchu lak hmanga ka um lai i mi hmu chun chang i ta, i mi hmu naw chun chang naw ti nih” a ta.

11 Chuonga titi pum zinga an fe lai chun mei tawlailir le mei sakor an hung inlang thut a, an inkàrah tlain a’n thretir a, Elija chu thrawngaleivirin vanah a kai a. 12 Chu chu Elisa chun a hmu zing a, “Pa, pa, aw Israel tawlailirhai le sakor chung chuong mihai!” tiin a ko zui a. Elisa chun ama chu a hmu ta si nawh. Chu phing leh a silpuon chu a pot thler a. 13 Elija silpuon hung tla chu a lâk a, a kîr a, Jordan vadung kama chun a ngîr a. 14 Elija silpuon hung tla chun tui chu a vuok a, “LALPA, Elija Pathien kha khaw lai am a um ta a?” a ta. Tui a zuk vuok chun khing tieng khing tieng a hung inthre a, Elisa chu a kai ta a.

15 Jerikoa inthoka hung zawlnei hon, lo thlir zingtuhai chun, “Elija thlarau chu Elisa chungah a chêng ta ngei leh!” an ta. Ama chu be dingin an va hnai a, hnuoi sikin chibai an bûk a. 16 Anni chun a kuomah, “I siehlawhai hin pa ngal hrat tak tak mi sawmnga kan nei a, i pu zong dingin tir tawl raw khai. LALPA thlarauin thruoi a ta, khaw lai tlâng amanih ruom amaniah a’n thrum nawk el khom a ni thei a nih” an ta. Elisa chun, “Tir lo e, tir dêr naw ro” a ta. 17 Amiruokchu, hang sèl pei inzakum khopa an nor lui tlat leiin “Tir el ro” a ta. Chuongchun, mi sawmnga an tir a, ni thum an zong a, an hmu zo naw a. 18 Jeriko tieng Elisa kuoma an hung kǐr chun an kuomah, “Fe naw ro ka ti rĕng chêu an naw maw?” a ta.

19 Chu khuoa mihai chun Elisa kuomah, “En ta, pu, i hmu ang hin hi khuo hi a lawilen a’n hoi hlea chu kan tui tlàn hi a thra naw a, thlai khom a suok thra thei naw a nih” an ta. 20 Ama chun, “Tuiûm thar hung la unla, machi thun ro” a ta, chuongchun an hung lăk a. 21 Tuikhurah a va fe a, machi a phul a, mihai kuoma chun, “LALPA chun hieng hin a tih: ‘Tui hi ka sukthieng tah. Tuta inthok chu a thipui um ta naw ni hai a, a ram tharsuok khom hlawk ta’ng a tih’ a ti a nih” a ta. 22 Elisa hril ang chun, voisun chen hin a tui chu a hrisel ta zing a nih.

23 Chu taka inthok chun Elisa chu Bethelah a fe a. Lampuia a lawn lai chun khuoa inthokin tleirawl ruol an hung suok a, “Fe tung rawh, lukawkpa, Fe tung rawh, lukawkpa” tiin an lo nuisaw a. 24 A ngha kîr a, anni chu a hmu a, LALPA hmingin trongsie a’n phur a. Chu phing leh ram hnuoia inthokin savom pahni an hung suok a, anni laia naupang sawmli le pahni chu an hung pot chen neng a. 25 Chun, Karmel tlangah a fe a, chu taka inthok chun Samari khuoah a kir nawk ta a.