5 Hrila a um ang tak chun a thaw a, Jordan sak tienga um Kerit varuoma chun a fe a, chu taka chun a um a. 6 Vaakhai chun zîng le zàn bei le sa an hung thak a, vadung tui chu a tlàn a.

7 A ramah ruo a sur ta naw leiin iemani chen hnungah vadung tui chu a hung kang ta a. 8 LALPA thu chu a kuomah a hung tlung a, 9 “Tho la, Sidon rama Zarefat-ah fe la, chu taka chun um rawh. A chawmtu ding che hmeithai khom thu ka pêk tah” tiin. 10 Chuongchun a tho a, Zarefat khuoa chun a fe a, kul kotkhar a va tlung chun hmeithai pakhat hin thing a lo fom a. Elija chun a ko a, a kuomah, “Ka dawn ding bêlin tui tlawmte mi hung lapêk thei i ti?” a ta. 11 Tui la dinga a fe lai chun, “Bei tlawmte bèk mi hung chawipek bok rawh aw” a ta.

12 Hmeithai chun, “LALPA i Pathien hring zing hmingin ka hril, bei chu ka nei dèr naw a, ka nei ve sun chu bêla beiphit vei khat le ûma sahriek tlawmte chauh a nih. Chu chu kei le ka naupa fak dinga siem dingin thing ka hung fom vak a nih. Chu chu fang kan ta, thi chu kan hmabâk a ni el tah” a ta.

13 Elija chun a kuomah, “Tri dêr naw rawh. Fe la, i ti ang tak chun va thaw rawh. Amiruokchu, beiphit le sahriek tlawmte i nei chun bei chikte mi siempek hmasa phot la, hung chawi rawh, chu zoah i naupa le in ta ding chu i siem ding a nih. 14 LALPA, Israelhai Pathien chun ‘Hi rama LALPAN ruo a hung insurtir hmâ khat chun beiphit vei khat umna bêl chu phai naw ni a, sahriek tlawmte siena ûm chu kang bok naw nih’ a ti a nih” a ta.

15 Chuongchun a fe a, Elija hril ang tak chun a thaw a, ni tina ama le a sungkuo le Elija fak khop chu a um zing a. 16 Elijain LALPA thu a hril ang khan, beiphit siena bêl chu a phai chuong naw a, sahriek ùm khom chu a kang chuong bok nawh.

17 Iemani chen hnunga chun in neitunu naupa chu a damnaw a, a natna chu a zuol deu deu a, a tawpah a thuok a tawp ta a. 18 Ama chun Elija kuomah, “Aw Pathien mi, nangin kei i mi khingna san ding iem a um a? Ka suolna mi’n hriet nontir ding le ka naupa mi thatpek dinga hung i lo ni maw?” a ta.

19 Elija chun, “I naupa kha mi hang pe ta” a ta, a pom lai chu a lâk a, a umna pindan tieng a pom tung a, a khumah a’n zàltir a. 20 LALPA a ko a, “Aw, LALPA ka Pathien, ka chengna hmeithai chunga hin vangduoina intlungtirin a naupa hi ieng dinga i hung inthitir el am a na?” a ta. 21 Naupang chunga chun voi thum a bok a, trap pumin LALPA a ko a, “Aw LALPA, ka Pathien, lunginsiet takin hi naupang hringna hi hung pekîr nawk hràm rawh’ a ta. 22 LALPA chun Elija hnìna chu a lo ngaithlakpek a, naupang hringna chu amaah a hung kìr nawk a, a hung har ta a. 23 Elija chun naupang chu a pom a, pindana inthok chun a trumpui a, a nu kuoma chun, “En ta, i naupa hi a hung dam nawk tah ie” a ta, a pêk a. 24 Nuhmei chun Elija kuomah, “Tu zet hin chu Pathien mi i nizie le i baua LALPA thu i puong chu thutak a ni takzetzie ka hriet tah” a ta.