Davidan Amalekhai a hnè
30
1 Ni thum hnunga Davida le a mihaiin Ziklag an tlung chun Amalekhaiin Negev le Ziklag khuo chu an lo rûn dĕr ta a, an raw a, 2 nuhmeihai le chu khuoa um taphot chu a chîn a lienin salah an man a, tu khom that loin an thruoi vong a. 3 Davida le a mihaiin an umna khuo an va tlung chun a lo kang fai ta a, an nuhmeihai le an naupahai le naunuhai chu salah an lo man fai vong a. 4 Davida le a mihai chu inring taka khêkin, trap thei ta naw hiel khopa an châu chenin, an trap a. 5 Davida nuhmei pahnih, Jezreel-a mi Ahinoam le Karmela Nabal nuhmei thisan Abigail-hai khom chu an thruoi sa ve a. 6 A mihai chun lunga dèng hiel an nuom el leiin Davida chu a beidong hle a, mi tin chu an naupahai le naunuhai lei chun an lung a na hle si a. Sienkhom Davida chu LALPA a Pathienah a’n sukhrăt a.7 Davida chun Ahimelek naupa thiempu Abiathar kuomah, “Thiempu zakuo efod kha hung la raw khai” a ta, Abiathar chun a hung lăk a. 8 Davida chun “Mi hung rûntuhai hi hnot lang hnot phâk ka ti?” tiin LALPA chu a’n don a. Ama chun, “Hnot rawh, hnot phâk ngĕi ngêi i ta, san suok tawl ngĕi ngêi bok i tih” a ta. 9 Davida le mi zarukhai chun an hnot a, Besor Ruom an tlung a, chu taka chun a thren a maksan a. 10 Mi zahni pawl chu an chău tah êm leiin Besor Ruom chu an kăn pei ta naw a, sienkhom Davida le mi zali chun an hnot ngar ngar a.
11 Phŭla hin Aigupta mi an hmu a, David kuomah an hung thruoi a, fak ding bei le dawn ding tui an pĕk a, 12 theichang trawl fùn khat le grêp em trawl bâwr hni an pêk bok a, chuonghai a hang fak chun a hung har nawk a, ni thum le zan thum bu fa ta lo le tui dawn ta lo a ni si a. 13 Davida chun a kuomah, “Tu am i na? Khaw laia inthoka hung am i na?” tiin a’n don a. Ama chun, “Aigupta mi, Amalekhai siehlaw ka nih. Ni thum a ni ta a, ka damnaw leiin ka puin a mi maksan el a nih. 14 Keret sim tieng le Judahai chan sim tieng kan rŭn a, Kaleb sim tieng kan rûn bok a, Ziklag khuo khom kan raw” a ta.
15 Davida chun, “Chuonghai umnaa chun mi thruoi thei i ti?” a ta. Ama chun, “Mi that lo ding le ka pu kuta mi pe kîr nawk lo dingin Pathien hming sâlin ka kuomah thu intiemkam phot la, chuonghai umnaa chun thruoi ka ti che” a ta. 16 A zuk thruoi tlung chun, ngai ta, Filistin ram le Judai rama inthoka râllâk tam tak an hawn leiin ruoi an lo thrè mup mup a, an lo um dar nuoi el a. 17 Davida chun thimbuta inthoka a zing zan tieng chenin a bei ngat ngat a, sanghawngsei chunga chuong tlangval zali tlân suokhai ti naw chu a that fâi vong a. 18 Amalekhai răllăk po po chu a lâk kir nawk a, a nuhmei pahnihai chu a san suok bok a. 19 Chuongchun, a chîn a lien, an naupahai le an naunuhai, an răllăkhai le an thil lăkhai po po chu ieng khom chăn nei loin Davida chun a lâk kìr nawk vong a. 20 Davida chun beram ruol le an ran ruol po po chu a lâk a, a rawihai chun ran danghai hmaah an khal a, “Hienghai hi Davida răllăk a nih” tiin an insam pei a.
21 An chău leia mi zahni a maksanna Besor Ruom chu Davida chun a hung tlung nawk a, ama le a fepuihai hmuok dingin an hung inthok suok a, mipuihai kuom a hung tlung chun Davidan a chibai tawl a. 22 Davida zuituhai laia mi suol turu, buoina siem chìng mihai po chun, “Anni hi an hung ve si naw leiin râllâk ei va lăk kirhai hi an chang ve ding a ni nawh. Amiruokchu, mi tinin an nuhmei le nauhai seng ruok chu an thruoi phalpêk ei tih” an ta.
23 Davida chun an kuomah, “Unauhai, LALPAN a mi pek thilhai chu chuong ang chun in thaw ding a ni nawh. Ama chun mi humin, mi dotuhai chu ei kutah a pêk a. 24 Hi thila hin tuin am in thu chu a pom ding? Indonaa zu fehai chan ang tho chu thuomhnaw vêngtuhai khomin inang sengin an chang ve ding annawm” a ta. 25 Chu nia inthok chun tu chen hin Israelhai ta dinga thupêk le dànah an hmang tah a nih.
26 Davidan Ziklag a hung tlung chun râllâk threnkhat chu a ruolhai, Juda upahai kuoma chun, “Hi, LALPA hmĕlmahai laka kan râllâk kan hung hlè ve chêu a nih” tiin a thon tawl a. 27 Chuong râllâk thilhai chu Bethela um hai, Ramot sim tienga um hai, Jatira um hai, 28 Aroer-a um hai, Sifmot-a um hai, Estemoa um hai, 29 Rakala umhai, Jerami hai, Ken mi hai, 30 Hormaa um hai, Borasana um hai, le Athaka um hai, 31 Hebrona umhai dam le Davida le a mihai chĕttlatna hlak hmun hrang hranga um hai po po a thon a.