Filistinhaiin Davida an hnar
29
1 Filistinhai chun an sipaihai po po chu Afek-ah an ko khawm a, Israelhai chun Jezreel-a tuikhur bulah thranghmun an khaw a. 2 Filistin lalhai chun an rawihai a za ruol le a sang têl tĕla an thrè darhai chu somin an fe zut zut a, Davida le a mihai chu Akis leh a hnung dâlah an thrang a.3 Filistin kawmandarhai chun, “Hieng Hebrai mihai hin iem a na an hung thaw ve?” an ta. Akis chun, “Hi hi Davida, Israel lal Saula hnuoia ofisar a ni naw am a ni? Saula maksana ka kuoma a hung tlŭk lŭt nia inthoka voisun chen hin, kum khat nêka sawt rau ka kuomah a um ta a, a tlăk nawna hrim hrim ka la hmu nawh” a ta.
4 Sienkhom Filistin lalhai chu a chungah an lung a sen a, “Chu pa chu i hmun ruotpeka khan inkirtir rawh, indonaa chu kan kuomah hung naw raw se, indonaah ei hmĕlma tieng thrang pal hlauh rawi a tih. Eini mihai lu la’ng a ta, a pu leh inrem nawk hlauh si’ng an ta.
5 Hi Davida hi a ni naw maw, lăm pum a,
Saulan a sânga sâng a that,
Davidan a sînga sîng”
tia a chungchang thu hlaa an sak hlak kha?” an ta.
6 Akis chun Davida chu a ko a, “LALPA hring zing hmingin ka hril, mi ringum i ni a, ka sipaia thrang dingin ka dit ĕm êm che a. Ka kuoma i hung nia inthoka voisun chen hin i tlăk nawna hrim hrim ka la hmu naw a, sienkhom lalhaiin an pom tlat naw chê a nih. 7 Chuleiin, Filistin lalhai suklungninaw nêkin kîr lem el la, lungawi takin fe lem el rawh” a ta.
8 Davida chun, “An leh iem a na ka thaw suol chu? Ka hung nia inthoka voisun chen hin i siehlaw laka hin thil indik lo i hmu hrim hrim am a ni? Ieng leiin am ka pu, lal hmêlma do dingin ka fe ve thei naw ding?” a ta. 9 Akis chun, “Ka mita chu Pathien vantirko angin i thra a, amiruokchu Filistin kawmandarhaiin, ‘Indonaa chu eini lai hung thei naw nih’ an ti tlat a nih. 10 Chuleiin, i kuoma hung ve, i pu siehlawhai le hin zingkar inhma takin tho unla, khuo a var hlimin kir nawk ro” a ta. 11 Chuongchun, Davida le a mihai chu Filistin rama kir nawk dingin zing inhma takin an tho a, Filistinhai chun Jezreel an pan tung a.