3 Samuel chu a thi ta a, Israel mi po poin an sŭn a, ama khuo Rama-ah an vŭi a. Saula chun rau inzawlpui neihai le aienthiemhai chu a rama inthokin a hnot suok vong ta a. 4 Filistin mihai chu an pung khawm a, Sunema chun an hung a, an inkul a, Saula chun Israelhai po po chu a khawm a Gilboa chun an inkul ve a. 5 Saulan Filistin sipaihai a hmu chun a tri hle a, a lungril chu thlabarnain a sip a. 6 Saula chun LALPA a rawn a, sienkhom mang amani, Urim amani le zawlnei amani hmangin donna hrim hrim a hmu nawh. 7 Chuongchun a siehlawhai kuomah, “Keima ngei fea ka rawn ding aienthiem nuhmei mi zongpêk ro” a ta. A siehlawhai chun, “Endor khuoah nuhmei aienthiem a um” an ta.

8 Chuongchun, Saula chu silfen dang inbela insiem danglamin, mi dang pahnih thruoiin nuhmei kuoma chun a fe a, “A hming ka hril hril rau chu mi kopêk rawh” a ta. 9 Sienkhom nuhmei chun, “Ngai ta, Saula thilthaw chu i hriet a, a rama inthokin aienthiem le dawithiemhai a sukbo vong ta a. Ka thǐna dingin ieng dinga châng i kam am a na?” a ta. 10 Saula chun, “LALPA hring zing hmingin ka hril, hi thil lei hin i chungah hremna tlung naw nih” a ta, a kuomah inkhâmin thu a tiem a.

11 Chu phing leh nuhmei chun, “Tu am kopek lang chê i nuom a?” a ta, ama chun “Samuel mi kopêk rawh” a ta. 12 Nuhmeiin Samuel a hmu chun a khêk rak a, Saula kuoma chun, “Ieng dinga i mi hlem? Saula i ni zing si a” a ta. 13 Lal chun a kuomah, “Tri dêr naw rawh. Iem i hmu a?” a ta. Nuhmei chun, “Hnuoia inthoka thlarau hung suok ka hmuh” a ta. 14 Saula chun, “Ieng ang hmèl am a put a?” a ta, nuhmei chun, “Putar tak hi a hung suok a, korfuol a hâk” a ta. Saula chun Samuel a nih ti a hriet nghal a, hmaia hnuoi sikin chibai a bûk a.

15 Samuel chun Saula kuomah, “Ieng leia hienga ko suoka i mi sukbuoi am a na?” a ta. Saula chun, “Ka bei a dong êma a nih. Filistinhaiin an mi hung do a, Pathien hlakin a mi nghatsan ta bok si a. Zawlnei amanih mang amanih hmang khoma a mi don ta naw hrim hrim. Chuleiin, ka thaw ding indon ding chein ka ko el che a nih” a ta. 16 Samuel chun, “Chuonga LALPAN a nghatsan ta che a, i hmêlma a lo ni tah ti hre zing siin ieng leia thu i min don am a na? 17 Keima hmanga a hril che ang khan LALPA chun i chungah a thaw a ni ta chu. LALPA chun i kuta inthokin ram chu a lâkpĕk ta che a, i tuolbawm Davida ngei chu a pêk tah a nih. 18 LALPA thu i awi naw a, Amalek mihai chunga nasa taka a lungsenna chu i hlenpek naw leiin tu hin i chungah hieng hin a thaw an ta hi. 19 Chu naw khom chu, LALPAN nangma le Israelhai po po chu Filistinhai kutah pe’ng a ta, zinga hin nang le i naupa leh ka kuomah hung um ta’ng in tih. LALPA chun Israel sipai khom Filistinhai kutah pe’ng a tih” a ta.

20 Samuel thu hril lei chun Saula chu a tri ta êm êm a, hnuoiah a tlu let dĕr a, sunnithlak le zankhawvara bu fa ta lo a ni bok a, tha le zung hrim a nei nawh. 21 Nuhmei chu Saula kuomah a hung a, nasa taka lungngaiin a hmu a, a kuomah, “Ngai ta, i siehlawnu hin i thu ka awi a, ka hringna chăn huomin thaw dinga i mi hril chu ka thaw a. 22 Lunginsiet takin i siehlawnu thu hi awi ve thung la, bu tlawmtè bek siempek ka ti che a, i fe phaa thahrui i nei theina dingin fa hrâm rawh” a ta. 23 Sienkhom a nuom naw a, “Fa naw ning” a ti tlat a. A mi thruoihai le nuhmei chun an ngên tlat leiin an thu chu a awi ta a. Chuongchun, hnuoia inthok chun a hung tho a, khuma chun a’n thrung a. 24 Nuhmei chun bawng tuoi thau tak a nei a, inrang takin a va that a, beiphit a lâk a, a hmet a, chol thrang lo bei a siem a, 25 Saula le a siehlawhai hmaa chun a sie a, an fak ta a. Chuongchun an tho a, chu zân chun an fe ta a.