2 Chuongchun, a mihai zaruk thruoiin Davida chu Maok naupa Akis, Gath lal kuoma chun a fe a. 3 Davida le a mihai chu Gath-a chun Akis kuomah an khawsa a. Mi tinin an sungkuohai an thruoi a, Davida khomin a nuhmeihai pahni, Jezreel-a mi Ahinoam le Karmela mi Abigail, Nabal nuhmei thisan chu a thruoi a. 4 Gath khuoah Davida a tlân ti Saulan a hriet chun a zong nawk ta naw a.

5 Davida chun Akis kuomah, “I mit ka tlung a ni chun, i rama khaw pakhata hin ka umna ding mi ruotpèk la, chu taka chun um kan tih. I siehlaw hi ieng dingin am lal khuoah i kuomah a um zing ding a na?” a ta. 6 Lal Akis chun chu ni lâ là chun Ziklag khuo a pêk a, chuleiin voisun chen hin Ziklag chu Judai ram lalhai ta a la ni ta zing a nih. 7 Davida chu Filistinhai rama chun kum khat le thla li a um a.

8 Chun, Davida le a mihai chu kai tungin Gesur mi hai, Girzi mi hai le Amalek mi hai chu an hang rŭn a; chuong hnamhai chu Sur panna lampuia Telam chen le Aigupta ram chena inzâr an nih. 9 Davidan a rŭnna hmuna hrim hrim chun a nuhmei a pasalin tu khom a dama hla a nei naw a, an beram le bawnghai, an sabengtung le sanghawngseihai le an silfenhai ruok chu a lâk a, Akis kuomah a kir nawk hlak a. 10 Akis chun, “Voisun khaw tieng am i rŭn a?” a ta. Davida chun, “Sim tienga um Judai ram dam, Jeramel-hai ram dam le Ken mihai ram dam” a ta. 11 “Hieng ang hin Davida chun a thaw hlak hrim a nih” titu ding an um pal nawna ding tiin Davida chun tu khom dama hlà a nei naw hlak hrim a nih. Filistinhai rama a um sung po po chun chuong ang chu a thaw dăn a nih. 12 Akis chun Davida thu hril chu awiin, “A mihai theida a phur nasa ta êm leiin kumkhuoin ka siehlawah a um ding a ni hi” a ti lungril a.