5 Davida chu a tho a, Saula thranghmun khuornaa chun a fe a. Saula le a sipai kawmandar Nera naupa Abner zalna chu a hmu a, Saula chu an riebuk sunga chun a zâl a, a velin sipaiin an inhuol a. 6 Davida chun Hit mi Ahimelek le Zeruia naupa Abisai, Joab unaupa kuoma chun, “Tu am Saula riebuka zu fe dinga mi zui thla ding?” a ta. Abisai chun, “Keiin zui ka ti che” a ta.

7 Zana chun Davida le Abisai chu sipaihai riebuka chun an zu fe a, Saula chu riebuk sungrila chun a lo zăl a, a lu thluon tieng chun a fei chu hnuoiah a sun bŭr a. Abner le a mihai chu a vêla chun ama inhuol tuokin an zâl bok a. 8 Abisai chun Davida kuomah, “Voisun hin Pathienin i hmêlma chu i kutah a pêk chè a ni hi. Chuleiin, fei hin hnuoi leh hang sun de’ng ka ti aw, voi hni ka sun ngai naw nih” a ta. 9 Davida chun Abisai kuomah, “Sukbohmang lo e, khai! LALPA hriek năl chunga kut thlâk tu am thiem chang an um hlak a? 10 LALPA hring zing hmingin ka hril hi, LALPA chun a chungah kut thlâk a tih, a thlâk naw khoma a thi ni la hung tlung el a tih. Chu chu a ni naw le khom indonaah fe’ng a ta, la thi el a tih. 11 LALPA hriek nàl chunga kut thlâk chu LALPAN mi phal lul naw raw se. A lu thluona fei le tuiûm kha chu la la, fesan ei tih” a ta. 12 Saula lu thluona a fei le a tuium chu Davida chun a lâk a, an fesan a. LALPAN imu inhnik taka a’n intir tawl leiin tu khomin an hmu naw a, tu khom an thrang har bok nawh.

13 Davida chu ral khing tieng a kai a, hla feah tlâng sîpa chun a ngîr a, an inkàr chu hla rei a ni tah. 14 Chu taka inthok chun sipaihai le Nera naupa Abner chu a ko khèk a, “Abner, i mi hung don naw ding am a ni?” a ta. Abner chun, “Tu am i na lal hang ko tho ngam hrim hrim chu?” a ta. 15 Davida chun Abner kuomah, “Pasal i ni naw maw? I ni tak tak naw am a ni? Israelhai lai hin nangma ang tu am an um a? Iengtiziea i pu i vĕng thra naw am a na? Lal, i pu chu sukbohmang dingin tuhai amanih an hung kha! 16 I thaw indik naw top a nih. LALPA hring zing hmingin ka hril hi, LALPA hriek năl i pu i vĕng thra naw leiin nang le i sipaihai kha thi tlâk in nih. Hang ngha vêl la, lal lu thluona fei le a tuiûm kha khaw lai am an um ta a?” a ta.

17 Saula chun Davida rawl a nih ti a hriet a, “David, ka naupa, chu chu i rawl ngei a ni naw maw?” a ta. Davida chun, “Aw, lal le ka pu, ka rawl ngei ni e. 18 Iengtiziea ka pu hin a siehlaw hi a hnot thlŭr am a na? Ieng thil am ka thaw suol a, thiem naw changna ding ieng poi am ka tawk rêng rĕng a? 19 Tu hin ka lalpa, ka pu hin a siehlaw thu hi ngaithla raw se. Mi do dinga i lungril chokthotu chu LALPA a ni chun thilhlân chu pom hram sien la, mihriem nauhai an ni chun LALPA hmaah trongsephurin um raw hai se. ‘Fe la, pathien danghai rong va bawl rawh’ tiin, LALPA rochung rama ka chanvo hluo ve thei lo dingin an mi hnot suok a ni hi. 20 Tu hin LALPA um nawna ram leilung hla taka hin ka thisen infartir lul naw ro. Tlânga varung pĕl dinga mi a ramsuok ang elin, Israel lal meu uihrik zong dingin a’n thok suok a ni hi” a ta.

21 Saula chun, “Thil suol ka lo thaw a nih. Ka naupa David, hung kir rawh. Voisun hin ka hringna chu i hlutsak leiin i sietna ding ieng khom thaw tum ta naw ning. Invêt angin ka lo khawsa chieng khop el, nasa takin ka thaw suol a nih” a ta.

22 Davida chun, “Hi, lal fei chu ka kol hi, in tlangval laia pakhatin hung la raw se. 23 LALPA chun mi tin an fel le an ringum man a pêk hlak a. LALPA chun ka kutah voisun hin a’n hlàn che a, sienkhom LALPA hriek năl chungah kei chun kut thlâk naw ning. 24 Voisuna i hringna ka ngaihlut ang bok hin LALPAN ka hringna ngaihlu sien, buoina po po lakah mi san suok raw se” a ta.

25 Saula chun Davida kuomah, “Ka naupa David, malsawmin um raw khai; thil ropui tak tak la thawng i ta, hnĕna chu chang ngei i tih” a ta. Chuongchun, Davida chu a fe a, Saula khom a in tieng a kir nawk ta a.