4 Thlalĕra Davida a um lai chun Nabal chu Karmel tlangah a beram hmul vawin a fe ti a hriet a. 5 Chuongchun tlangval sawm a tir a, an kuomah, “Karmel tlanga khin Nabal kuomah hang fe unla, ka hmingin chibai hang bŭk ro. 6 Chun, a kuomah, ‘I chunga le i sunghai chunga le i nei po po chungah dam sawtna le thlamuongna tlung raw se. 7 Beram hmul vawin hi taka hin i um ti Davidan a hriet a, i beram vengtuhai hi kan kuoma khawsa hlak an nizie dam, an poi ieng khom kan tawk ngai nawzie dam le Karmel tlanga an um sungin thil ieng khom an inhmang ngai nawzie dam lo hre ve la ti a nuom a. 8 Chu chu i beram vengtuhai indon la, anni ngeiin hril an ti che. Hi, ruoi thrè nî takin kan hung tlung a, kan tlangvalhai hi lo ditsak la, i nei ang ang chu i siehlawhai le i naupa Davida lo pe ve rawh tiin a mi’n chà a nih’ tiin hril ro” a ta.

9 Davida rawihai an tlung chun Davida hmingin a thucha chu Nabal kuomah an hril a, a donna chu an nghak a. 10 Iemani chen hnunga chun Davida rawihai kuoma chun Nabalin, “Tu’m a na Davida chu? Jesai naupa chu tu am a na? Tu lai hin an puhai tlăn hmangsan siehlaw an tam khop el. 11 Ka beihai, ka tuihai le ka beram hmul vawtuhai ta dinga ran ka that sa chu tu am an nih ti khom hriet lohai kuomah ka pêk lul ding maw?” a ta. 12 Tlangvalhai chu an hung kir nawk a, chuong thu po po chu Davida an hril a. 13 Davida chun a mihai kuomah, “In kawlhnăm pai seng ro” a ta, an pai a, Davida khomin a pai a, mi zali laiin Davida chu an zui tung a, mi zahni chu thuomhnaw vêng dingin an sie a.

14 Nabal siehlaw laia pakhat chun Nabal nuhmei Abigail kuomah, “Thlalêra inthokin chibai bûk dingin Davidan ka pu kuomah mi a hung tir a, sienkhom ka puin a lo rău tawl a. 15 Nisienlakhom, hieng mihai hi kan chungah an thra êm êm a, phŭla kan um tlang sung po poin kan poi an tawk ngai naw a, kan thil ieng khom a’n hmang ngai bok nawh. 16 Anni bula beram kan veng sung po poin sùn le zànin kan ta dinga kulh an ni ringot a nih. 17 Tu hin ka pu le a sungkuohai chunga sietna hung tlung ding hi dawn la, iem i thaw thei in ngaituo rawh. Ama hlak hi tu khom biek thei lo khopa mi rilo a ni si a” a ta.

18 Abigail chun inhmaw takin bei tlang zahnih, uoiin peng pahnih, fak el theia inpei sa diem beram pum nga, bei tlang kilogram sawm le pasari, grep em trawl bâwr zakhat le theichang em trawl phêk zahni chu a lak khawm a, sabengtung a’n phurtir a. 19 Siehlaw tlangval kuoma chun, “Ka hmaah fe pei unla, hung zui ka ti chêu” a ta, sienkhom a pasal Nabal ruok chu a hril nawh.

20 A sabengtungah chuonga tlang kâr leisekot a hraw lai chun Davida le a mihai chun an hung pan thlak a, an intuok ta a. 21 Davida chun, “Ieng khom a’n hmang nawna dingin hi pa thil nei po po hi a thlawn mei meiin ka lo vèngpek a ni takluo ngei hi tie! Thil thra chu thil thra loin a mi thungrul ta si a. 22 Zingah zingkâr chena a ta po po laia mi pasal naupang pakhat té khom ka hlá vai chun Pathienin Davida hi a nuom ang angin mi law sien la, chu nêka nasa khomin thaw raw se” a lo ti zo hlim hlol a nih.

23 Abigailin Davida a hmu chun a sabengtunga inthokin inrang takin a trum a, bâwka hnuoi sikin chibai a bûk a. 24 A ke bula chun a bokkhup a, “Ka lalpa, keima ngeiin thiem naw arbawm chu phur el ka tih. I siehlaw hin thu a hril ding phalpêk la, i siehlawnu thu hril hi lo ngaithlapêk hràm rawh. 25 Ka lalpa hin mi rilo Nabal thu chu ienga khom ngai naw hrăm raw se, ama chu a hming ang char put zo, mi Invêt a na, thil invêtthlàk a thaw hlak hrim a nih. Kei i siehlawnu ruok hin chu ka pu hung tirh tlangvalhai chu ka lo hmu ve naw a nih. 26 Thisen insuo lo ding le i kuta phuba la lo dinga siemtu che chu LALPA a nih. Tu hin LALPA hring zing le i hringna sâlin ka hril, i hmêlmahai le i thrat nawna ding zongtuhai po po chu Nabal anga hrem ni raw hai se. 27 Pu, i ta dinga i siehlawin thilpêk a hung chawi hi nangma hung zuitu tlangvalhai kuoma pĕk ni raw se. 28 I siehlawnu hin thaw suol a nei a ni chun lunginsiet takin ngaidam rawh. LALPA ta dinga beitu i ni leiin ama chun lalna tlo tak indintir a ti che a, i dam sungin i chungah thil thra lo hrim hrim a tlung hmu naw ti nih. 29 I hringna lak tuma hnottu che um hai sienkhom, miin a rohlu a vĕng him tlat angin LALPA i Pathien chun ka pu hringna chu vêng himpèk a ti che. I hmêlmahai ruok chu miin saihlia saihlum a per hmang angin per hmang a tih. 30 LALPAN a tiem anga i chunga thil thra po po a hung intlungtir pha a, Israelhai lala a siem pha chè chun, 31 ka pu hin a san um loa thisen insuo lo a, phuba i lâk bok naw lei hin lungrila poitina le insirnain hnot zui naw ni che. LALPAN ka pu chunga thil thra a thaw pha chun i siehlawnu hi hung hre zing raw aw” a ta.

32 Davida chun Abigail kuomah, “Voisuna mi hmuok dinga tirtu che LALPA, Israelhai Pathien chu inpâkin um raw se. 33 Phuba la a, mi ka that ding voisuna mi’n pumpeltirtu i remhrietna chu malsawmin um bok raw se. 34 I chunga kut ka thlàk ding vêngtu chu LALPA a nih. Nangin mi lo hmuok vat naw la chu, LALPA Israelhai Pathien hring zing hming sâlin ka hril, zinga khawvar chen hin Nabal mihai chu naupang pakhat tê khom hlà nei naw top ka tih” a ta. 35 Davida chun a thil hung chawipekhai chu a lâk a, “Thlamuong takin i in tieng kîr nawk ta rawh. I thu ka ngaithlak a, i hnîna khom ka pompĕk ta che” a ta.

36 Abigail chu Nabal kuomah a hang fe a, a ina chun lal ruoi thrè ang elin ruoi a lo thre a, a’n rui leiin a hlim hle a, chuleiin zing khawvar hma chun ieng khom a hril nawh. 37 A tûk zingkara Nabal uoiin inrui a hung har chun a nuhmeiin thil chinchang chu a hril a, a lung an chek dar a, a pumin a zeng ta vong a. 38 Ni sawm vel hnunga chun LALPAN Nabal chungah kut a thlâk a, a thi ta a.

39 Davidan Nabal thi thu a hriet chun, “Nabalin hmusit taka a mi thawna laka phuba mi lapêk a, a siehlawin thil thra lo a thaw ding laka cheltu LALPA chu inpâkin um raw se. Nabal thil thra naw thaw chu ama lu chunga ngei LALPAN a’n tlàktir a ni chuh” a ta. Chun, Abigail chu a nuhmei dinga va be dingin Davida chun mi a tir a.

40 Davida siehlawhaiin Karmel tlanga Abigail kuom an tlung chun, “Davidan a nuhmei dinga thruoi ding chein a mi tir a nih” tiin ama chu an va biek a. 41 Ama chu a tho a, a bâwka hnuoi sikin chibai a bûk a, “In siehlawnu hi in rong bawl ding le ka pu ke sawp dinga siehlaw ka ni ie” a ta. 42 Abigail chu a tho vat a, sabengtung chungah a chuong a, a hnung zuitu nunghak pangahai le chun Davida mi hung tirhai chu a zui a, Davida nuhmeiah a um ta a. 43 Davida chun Jezreel-a mi Ahinaomi chu a lo nei ta bok a, a nuhmeiah an um vé vè ta a. 44 Saula chun a naunu Mikal, Davida nuhmei chu Galim khuoa mi Laisa naupa Palti chu a lo inneitir tah hrim a nih.