Davidan Saula hringna a hla
24
1 Filistin mihai a va hnot zàm hnunga Saula a hung kir chun, “Davida chu Engedi thlalĕrah a um” ti an hril a. 2 Saula chun Israelhai laia mi sangthum a thlang suokhai chu thruoiin sakĕlhai tlatna ram lungkawhrot hmun tieng chun Davida zong dingin a’n thok suok a. 3 Lampuia chun beram riek khawmna pûk pakhat hi a va tlung a, Saula chu inthier dingin a va lût a. Davida le a mihai chu pûk ril tieng chun an um a. 4 Mihai chun, “Voisun ngei hi a nih LALPAN i kuoma, ‘I nuom ang anga i law dingin i hmêlma chu i kutah pe’ng ka ti che’ tia a hril che kha” an ta. Chuongchun Davida chu a tho a, a rûkin Saula silpuon hmor chu a va ât thlăk a.5 Saula silpuon hmor a at thlak chu a hnungin a lungrilin an thiem naw hle a. 6 A mihai kuoma chun, “LALPA hriek năl, ka lalpa chunga hieng ang thil ka thaw amani le a chunga kut ka thlăk chu LALPAN mi phalpêk naw hram raw se, ama chu LALPA hriek năl ta sa a ni tlat si a” a ta. 7 Chuong ang thu chu hrilin Davida chun a mihai chu a zil a, Saula an bei chu a khap a. Chuongchun, Saula chun pûk chu a suoksan a, a fe ta a.
8 Davida khom pûka inthok chun a hung suok a, “Ka pu, ka lalpa” tiin Saula chu a ko zui a. Saula a hang ngha kir a, Davida chun hnuoi sikin chibai a buk a. 9 Davida chun Saula kuomah, “Ngai ta, ‘Davida chun i sietna a zong a nih’ tia mihaiin i kuoma an hril chu ieng dinga i awi hlak am a na? 10 Ngai ta, voisun hin hi pûka hin LALPAN ka kutah a’n hlănzie che i mit ngeiin i hmu a; threnkhat chun sukhlum ding chein an mi ti a, sienkhom kei chun, ‘Ka lalpa chungah kut thlâk naw ning, LALPA hriek năl a ni leiin’ ka ta, i hringna ka hla a. 11 Chu chau chu a ni nawh. En ta hi pa, i silpuon hmor hlek khom ka chawi zing hi. I silpuon hmor ât thla thei sia ka that naw chea inthok khan ka kuta hin thil thra naw le bawsietna a um nawh ti le nangin ka hringna lăk tumin mi zong mi zong la khom, i chungah ka suol ve nawh ti hre ngéi ngèi raw khai. 12 Nang le ei inkar thu hi LALPAN rêl sien la, LALPA chun ka poi i tawkna chunga phuba chu mi lapêk sien la, kei chun i chungah kut thlâk naw hrim hrim ka tih. 13 Tienlai thuvar chun, ‘Misuola inthokin thil suol a suok hlak’ a lo ti a, chuleiin i chungah kut thlâk naw ning. 14 Israel lal chu tu zong dinga inthok suok am a na? Tu am a na i hnot thlŭr hi? Ui thi hnung maw? Ui hrik maw? 15 Eini inkara rorêltu chu LALPA ni raw se. Ka chungthu hi ngaituoin thiem mi’n chang sien, i kuta inthok hin mi san suok raw se” a ta.
16 Davidan a hril zo chun Saulan, “Ka naupa David, chu chu i rawl ngei chu a ni maw?” a ta, inring takin a trap a. 17 Saula bok chun, “Keima nêk daiin i fel lem. Nang chun thra takin i mi thaw a, kei ruok chun thra lo takin ka thaw chê a nih. 18 Voisun i kutah keima hi LALPAN pe zing si chea i mi sukhlum nawa inthok hin ka chunga i thratzie i suklang a nih. 19 Miin a hmêlma hmu sien la, him rongin a’n suo ding maw? Voisuna i mi thaw thratna chungah LALPAN thil thrain rul che raw se. 20 Ngai ta, lal i la hung ni ngei dingzie le Israel lalram khom i kut hnuoiah suknghet a ni dingzie ka hriet. 21 Chuleiin, ka thlahai le ka pa sungkuoa inthoka ka hming sukbo lo dingin LALPA hmingin ka kuomah inkhâm meuin thu intiemkam rawh” a ta. 22 Chuongchun, Davida chun Saula kuomah thu a’n tiemkam a. Saula chu a in tieng a kîr a, Davida le a mihai chu kulbinga chun an kai a.