Davidan Keila khuo a san suok
23
1 Davida kuomah, “Filistinhaiin Keila khuo an rŭn a, an hrizawla buhai khom an lakpêk vong a nih” tiin an hung hril a. 2 Davida chun Pathien a rawn a, “Inthok suokin Filistinhai chu ka zu bei ding am a ni?” tiin a’n don a. LALPA chun, “Filistin mihai chu zu bei la, Keila khuo chu zu san suok rawh” a ta. 3 Davida mihai ruok chun a kuomah, “Ngai ta, hienga Judai rama ei um hman hin ei tri a na, Keila khuoah zu fe a, Filistin sipaihai ei zu bei nawk lem lem chun a va trium nasa zuol awm de!” an ta. 4 Davida chun LALPA a rawn nawk a. LALPA chun, “Tho la, Keila-ah fe thla rawh, Filistin mihai chu i kutah pe’ng ka ti che” a ta. 5 Chuongchun, Davida le a mihai chu Keilaah an fe thlak a, Filistin mihai chu an zu bei a, an ranhai an làkpèk a, an that treu a, Keila khaw mihai chu Davidan a sanhim ta a.Saulan Davida a hnot
6 Keila khuoa Davida kuoma Ahimelek naupa Abiathar a hung tlăn chun thiempu zakuo a hung chawi a. 7 Keila khuoah Davida a fe ti Saula an hril chun, “Pathienin ka kutah a pêk tah a ni chu; kul kotkhar le a kalna nei khuoah lûtin Davida chun ama le ama a’n suktăng an ta chu” a ta. 8 Keila khuoa Davida le a mihai chu inhuol dingin Saula chun a sipaihai a khâwm a.
9 Saulan a chunga thil thra lo thaw ding a phan rŭk ti Davidan a lo hriet chun thiempu Abiathar kuomah, “Thiempu zakuo kha hung la rawh” a ta. 10 Davida chun Pathien kuomah, “Aw LALPA, Israelhai Pathien, Saula chun keima leiin khuo sukse dingin Keilaah hung a tum ti thu ka lo hriet a. 11 Keila khaw mihai hin kei le ka mihai hi Saula kutah mi pe’ng an ti’m? I siehlawin ka lo hriet dan angin Saula chu a hung ding am a ni? Aw LALPA, Israelhai Pathien, lunginsiet takin i siehlaw hi mi hril rawh” a ta. LALPA chun, “Hung a tih” a ta. 12 Davida chun, “Keila khaw mihai hin kei le ka mihai hi Saula kutah mi pe’ng an ti?” a ta. LALPA chun, “Pe’ng an ti che” a ta. 13 Davida le a mihai zaruk vel chu an tho a, Keila khuoa inthokin an suok a, a remchangna tieng hmun hmunah an inson pei a. Keila khuoa inthokin Davida a tlan suok tah ti Saula an hril chun an inthok suok ding chu an thrulh ta a.
14 Davida chu Zif thlalĕr tlangrama kulbinga chun a um a. Ni tin tinin Saula chun Davida chu a zong a, sienkhom Pathienin a kutah a pêk nawh. 15 Zif thlalĕra Hores hmuna a um laiin ama that tumin Saula a hung inthok ti Davidan a lo hriet a. 16 Saula naupa Jonathan chu Hores-a chun Davida kuomah a fe a, Pathiena innghat dingin a kut a sukhrătpĕk a. 17 A kuomah, “Tri dêr naw rawh, ka pa Saulan i chungah kut thlâk naw nih. Israelhai chungah lalin um i ta, kei i dottu ni’ng ka tih. Ka pa Saula khomin chu chu a hriet vong a nih” a ta. 18 An pahni chun LALPA hmaah thu an thlung a. Jonathan chu in tieng a kir nawk a, Davida chu Hores-a chun a um ta zing a.
19 Zif mihai chu Gibea um Saula kuoma chun an fe a, “Davida chu keini lai, Jesimon sim tieng Hakila muola Hores kulbingah a’n bi zing a ni naw am a ni? 20 Chuleiin aw lalpa, i nuom hun hunah hung thla la, lalpa kuta ama pĕk chu kan mawphurna ni raw se” an ta. 21 Saula chun, “In mi ngaituona leiin LALPAN malsawm chêu raw se. 22 Kir nawk ta unla, a sulhnung le ama hung hmutuhai chu va dîlsût zuol ro. Dawha nei taka che hlak a nih ti miin an mi hril a. 23 Inbiknaa a hmang hlak hmun po po sui suok unla, thu chieng tak leh ka kuomah hung nawk ro. Chu phâ leh nangni ruolin hung ka ta, hi rama um hi a ni phot chun Juda mi sang tam tak lai khom zong suok ka tih” a ta.
24 Chuongchun, Saula fe hmain anni chu Zif-a chun an fe hmasa a, sienkhom Davida le a mihai chu Jesimon sim tieng Arabaa Maon thlalĕra chun an lo inson a. 25 Saula le a mihai chu Davida zong dingin an inthok a, chu chu Davida an hril a, Moan thlalĕra lungpui bèl dingin a fe thlăk a. Saulan a lo hriet chun Maon thlalĕra chun Davida chu a hnot a. 26 Saula le a mihai chu tlâng pang khing tieng an fe a, Davida le a mihai chu tlâng let liem tieng an fe a. Saula triin Davida chu inhmaw takin a tlân a; Saula mihai chun Davida le a mihai chu an man hman teuh hle. 27 Chuong lai tak chun Saula kuomah zuolko a hung a, “Inhmaw takin hung rawh, Filistin mihaiin ei ram an hung bei a nih” tiin a hung ko a. 28 Saula’n Davida a hnot lai chu a kirsan a, Filistin mihai bei ding chun a fe ta lem a. Chuleiin, hi hmun hi Sela Hamalekot tiin an ko tah a nih. 29 Chu taka inthok chun Davida chu a fe tung a, Engedi kulbinga chun a’n bi a.