Adulam le Mizpa-ah Davida a fe
22
1 Davida chun Gath chu a suoksan a, Adulam pûkah a fe a, chu taka chun a um ti a sunghaiin an lo hriet chun zu kan dingin an fe thla a. 2 Mi beidong le leibat neihai le lungawi nawna neihai chu a bula chun an hung fuon khawm a, an hotuah a um a, mi zali lai hiel an hung tling ta a.3 Chu taka inthok chun Davida chu Moab ram Mizpa-ah a fe a, Moab lal kuoma chun, “Pathienin thil a mi thawpek ding ka hriet hmâ po chu ka nu le pahai hi i kuomah lo um raw hai se aw?” a ta. 4 Chuongchun Moab lal kuoma chun anni chu a maksan a, kulbinga Davida a um sûng po chu chu taka chun an lo um a. 5 Thiempu Gad chun Davida kuomah, “Kulbinga hin um zing loin Judai ramah fe rawh” a ta, Davida chu a suok a, Heret ramngawa chun a fe ta a.
Saulan thiempuhai a that
6 Saula chun Davida le a mihai chu an hmu suok tah ti thu a lo hriet a. Ama chu Gibea tlang tamariska thing buk hnuoiah fei chawiin a thrung a, a rawihai chun an ngir huol a. 7 Saula chun an kuomah, “Nangni Benjamin mihai, ngaithla ro. Jesai naupain lo le grêp huonhai a pêk ding chêu a ni? Sipai sangkhat chunga kawmandar le zakhat chunga kawmandarin a sie tawl ding chĕu am a ni? 8 Chu lei chu a ni, hienga ka chunga thil in phier ruk hi? Ka naupain Jesai naupa thu a thlungpui khom khan tu khomin in mi hril nawh. Tu khom a mi’n voi in um naw a, voisuna a thaw ang hin kei mi’n chăn rûk dinga ka naupain ka siehlaw a’n fui por thu khom tu khomin in mi hril bok nawh” a ta. 9 Saula bula ngir Edom mi Doeg chun a lo don a, “Jesai naupa chu Nob khuoah Ahitub naupa Ahimelek kuoma a hung ka hmu a. 10 Thiempu Ahimelek chun LALPA a rawnpek a, fak ding a pêk bok a, Filistin mi Goliat kawlhnàm a pêk bok” a ta. 11 Chu phing leh lal chun Ahitub naupa thiempu Ahimelek le a pa sungkuo, Nob khuoa thiempu sinthaw po po chu a ko a, lal kuoma chun an rêngin an hung a. 12 Saula chun, “Ahitub naupa, tu hin ngaithla rawh” a ta. Ama chun, “Ni e, ka lalpa” a ta. 13 Saula chun, “Bei le kawlhnâm dam pe a, LALPA dam rawnpek a, voisuna a thaw anga mi do ding le mi’n chàn rûk dinga ieng leia nang le Jesai naupa hin thu in phier rŭk am a na?” a ta.
14 Ahimelek chun lal kuomah, “Lal makpa, a vengtuhai che chunga kaptena i sie, i sungkuohai laia mi inzaum tak Davida anga i ta dinga ringum hi i siehlawhai po po lai hin tu am an um a? 15 Tuta trum chauh hi Pathien ka biek rawnpek tranna a ni am a ni? Ni lo e! Lal chun i siehlaw amanih a pa sungkuohai rêng rĕng amanih mi’n tum naw raw se; i siehlaw hin nangni inkăr thu ieng khom ka hriet ve dèr nawh” a ta.
16 Nisienlakhom lal chun, “Ahimelek, i thi ngei ngei ding a nih, nang le i pa sungkuohai po po leh” a ta. 17 A bula ngîr vêngtu sipaihai kuoma chun, “Ngha kîr unla, hieng thiempuhai hin Davida an san a, a tlân hmang ti hre zing sia an mi hril naw leiin, that vong ro” tiin thu a pêk a. Amiruokchu, lal siehlawhai chun LALPA thiempuhai chunga chun kut an thlăk nuom nawh.
18 Chu phing leh lal chun Doeg chu thu a pêk a, “Ngha kîr la, hieng thiempuhai hi bei rawh” a ta. Edom mi Doeg chu a ngha kir a, thiempuhai chu a bei a, thiempu zakuo hak mi sawmriet le panga a that a. 19 Chun, thiempuhai khuo Nob chu kawlhnâmin a bei a, a nuhmei a pasalin, naupang le nene ne lai chenin, bawng le sabengtung le beramhai leh a sât hlum vong a.
20 Sienkhom Ahitub naupa Ahimelek naupahai laia pakhat, a hming Abiathar chu a tlân suok hman a, Davida kuomah a tlân a. 21 Abiathar chun LALPA thiempuhai Saulan a that thu chu Davida a hril a. 22 Davida chun, “Kha nia Edom mi Deog lo um vè khan Saula a hril ngĕi ngêi ding ti ka hriet sâ hrim a nih. I pa sungkuohai po po chu keima leia thi an nih. 23 Nang chu ka kuomah um la, tri dêr naw rawh; nangma that tumtu che chun kei khom mi that a tum a nih. Ka kuomah i um chun him i tih” a ta.