Davidan Saula a tlànsan
21
1 Davida chu Nob khuoa thiempu Ahimelek kuomah a fe a. Ahimelek chun inthin pumin a lo hmuok a, “An leh, makhat chaua hung i ni? Tu khom fepui i nei naw maw?” a ta. 2 Davida chun thiempu Ahimelek kuomah, “Lalin thil iemani thaw ding a mi dănde a, ‘I thil thaw ding le ka thupêk che hi mi dang tu khomin hre naw raw se’ a ti a nih. Ka mihai le kan inhmuna hmun ding ruok chu ka hril tawl tah. 3 Tu hin i kutah iem kol i nei a? Bei tlang hlûm nga mi pe la, an naw khoma i nei thei ang zât zàt chu” a ta.4 Thiempu chun Davida kuomah, “Bei pangngai chu kol ka nei dèr nawh. Bei thienghlim hlănbei ruok chu ka nei, tlangvalhai chu nuhmei lakah an thienghlim phot chun” a ta. 5 Davida chun, “Kan suok naran châng khomin nuhmei lakah kan inthier fihlim hlak hrim hrim a. Tu lem hin chu thil poimaw bik thaw dinga suok kan ni leiin thienghlim nawkzuol ngei an tih” a ta. 6 Chu taka chun hlănbei, LALPA hmaa inthoka Sabat zata bei tharlâma an thlâk zie hlak ti chauh naw chu bei dang a um naw leiin thiempu chun hlănbei chu a pêk a.
7 Chu ni chun Saula siehlaw laia pakhat, a hming Doeg, Edom mi, Saula beram enkoltuhai laia lu tak chu LALPA hmaa hlen ding a nei leiin chu taka chun a lo um ve a. 8 Davida chun Ahimelek kuomah, “Fei amanih kawlhnâm amanih i kol naw maw? Lalin inhmaw thuta a mi tir a ni leiin ka kawlhnâm le hriemhrei dang ieng khom ka hung chawi hman naw a nih” a ta. 9 Thiempu chun, “Ela ruoma i that, Filistin mi Goliat kawlhnăm kha thiempu zakuo hnunga khan a um a, puona intuom a ni kha. Chu chu i lâk nuom chun la la, chu naw chu a dang a um nawh” a ta. Davida chun, “Chu bâk bâk chu iem, mi hung pe raw khai” a ta.
10 Davidan Saula chu a tri leiin chu ni lâ la chun Gath lal Akis kuomah a tlân a. 11 Akis siehlawhai chun, “Ama hi a ram lal Davida kha a va hoi de!
‘Saulan a sânga sâng a that,
Davidan a sînga sîng’
tia làm puma a chungchang thu hlaa an sak dur dur kha a ni naw maw?” an ta.
12 Davida chun chuong thu chu a lungrilin a pâi zing a, Gath lal Akis chu a trì ta hle a. 13 An rênga hmaa chun a um dan a sukdanglam a, invêt nungchang a’n sìr a, kotkharhai a thâi triel a, a khâkhmulah a zer huom a’n fartir duon duon a. 14 Akis chun a siehlawhai kuomah, “En ta u, invêt a nih ti hre zing sia ieng dinga ka kuomah in hung thruoi am a na? 15 Mi invêt ka tlaksam leia ka hmaa a’n vètzie inentir dinga in hung thruoi a ni? Hi mi hi ka inah hung chuong lût hrep naw raw se” a ta.