3 Davida chun, “I pa chun i mi ditsakzie hi a hriet chieng a. ‘Hi thil hi chu Jonathanin hre naw raw se, a sukbeidong awm êm el’ a ti lungril khom a ni el thei. Chuong chu a ni lai zingin, nangma le keima inkara tla thei chu thina chau hi a nih ti Pathien hring zing le i hringna salin ka hril” a ta. 4 Jonathan chun, “Thaw dinga i mi ti taphot chu i ta dingin thawng ka tih” a ta.

5 Davida chun, “Ngai ta, zing hi thla thar lawmna hun a ni ta a, lal kuoma ruoi ka kîl ngĕi ngêi a ngai a, sienkhom ni thum ni zan tieng chenin phùl tieng inbiru dingin fe lem el ka tih. 6 I pain ka um naw hi a hriet suok leh, ‘Davida chun a khuo Bethlehema fe vak dingin a mi hni a, an sungkaw ta dinga kum tina hlànbiekna an nei hun a ni leiin’ lo ti rawh. 7 ‘A thra chu’ a ti leh i siehlaw hi a him ni’ng a ta, sienkhom a lung a sen ruok chun ka poi tawk a tum tlat a nih ti hre chieng thei i tih. 8 I siehlaw chunga hin ngilneina insuo rawh, nang le zawla inman dingin LALPA hmaah thu ei thlung ta si a. Bawsiet ka nei a ni chun nangin mi that el rawh. Ieng leiin am i pa kuta chun i mi pek suok ding?” a ta.

9 Jonathan chun, “Chu chu thaw ngai naw ning. Ka pain i chungah poi tawk a tum ti ka hriet phot chun ka hril naw ding che am a ni?” a ta. 10 Davida chun Jonathan kuomah, “I pain bŭl deuin lo don sienla che, tuin am mi hril ta’ng a ta?” a ta.

11 Jonathan chun, “Hung ta, phûla son va fe vak ei tih” a ta, an fe ta a. 12 Jonathan chun Davida kuomah, “LALPA Israelhai Pathien chu hrepuitu ni raw se. Hieng ang huna hin zingah an naw leh zing nawk hin ka pa lo dawp ka ta, a ditsak chê chun hung hril ngei ka ti che. 13 I poi tawk a la tum tlat a, chu chu ka hril naw chê amanih, him taka ka’n suoktir chê amanih a ni naw chun, LALPAN Jonathan hi ieng anga nâ khomin a lâw lăwin law raw se. LALPA chu i kuomah um raw se, ka pa kuoma a um hlak ang bokin. 14 Ka dam sung phot chun LALPA lunginsietna chuoi lo chu ka chungah inlangtir zing la, 15 ka thi khomin ka sungkuohai chungah i lunginsietna chu tawp naw sien la, LALPAN Davida hmĕlmahai po po hnuoi chunga inthoka a sukbohmang vong chen khomin tawp naw raw se” a ta. 16 Jonathan chun, “LALPAN Davida hmĕlmahai chungah phuba la pei raw se” tiin Davida sungkuo le chun thu a thlung a. 17 Jonathan chun Davida chu a hringna tluka a hmangai leiin Davida khoma ama chu hmangai zing dingin thu a’n tiemkamtir nawk a.

18 Jonathan chun Davida kuomah, “Zing hi thla thar ni a ni ta a, i thrungna a ruok ding a ni leiin i um naw chu inhriet hle’ng a tih. 19 Zing nawk zan tieng hin kha hmaa buoina intran hlima i’n bikrukna hmuna khan hung la, Ezel lungpui bula khan lo nghak rawh. 20 Inthemthiem ni awm takin thal pathum a sira khan hung kâp ka ta. 21 Naupang kuomah, “Ka thalhai kha va zong rawh” tiin tir ka ta. “En ta, thal chu i hnung tieng khan a um, la la, hung chawi rawh” ka ti chun, LALPA hring zing hming sâlin ka hril, a muongum a, i ta dingin tri ding a um nawh tina ni’ng a tih. 22 Amiruokchu, naupang kuomah, “En ta, thalhai chu i khêl tieng son a um” ka ti chun fe hmang nghal rawh; LALPAN a’n fe hmangtir che ni’ng a tih. 23 Chun, hi hi hre zing rawh, nang le keiin hi chungchanga ei thu hril mi hrepuitu chu LALPA ni kumkhuong a tih” a ta.

24 Chuongchun, Davida chu phùla chun a’n bi a, thla thar ruoi kil hun a hung tlung chun lal chu kîl dingin a’n thrung a. 25 Lal chu ni danga a thrungna pangngai bang hnaia chun a thrung a, Jonathan chu a hma zawna chun a thrung a, Saula dotah Abner a thrung a, Davida thrungna chu a ruok a. 26 Amiruokchu, chu ni chun Saulan ieng khom a hril nawh. “A chungah thil ieng amani a tlung leia thienghlim lo ni’ng a tih, ni ngei ngei a tih” a ti lungril a. 27 Amiruokchu, a ni hnina khom chun Davida hmun chu a la ruok ta zing leiin Saula chun a naupa Jonathan kuomah, “Ieng leia Jesai naupa hi zani le voisun khom ruoi kil dinga a hung ve naw am a na?” a ta.

28 Jonathan chun, “Davidan Bethlehema fe phalna nasa takin a mi hni a. 29 ‘Mi’n fetir hram rawh khai. Kan khuoah kan sungkuoin hlànbiekna kan nei ding a na, ka uhaiin hung ngei dingin an mi’n cha a nih. I mit tlunga ka um a ni phot chun ka unauhai hmu dingin mi’n fetir hrâm raw khai’ a ta. Chu leia lal dawkana hung kil ve thei lo a nih” a ta.

30 Jonathan chunga chun Saula lungsen chu a’n trĕk a, “Nang, nuhmei kawmaw le lulul naupa, Jesai naupa chu i muolphona ding le a hringtu che i nu muolphona dingin i thlang ti ka hriet nawa i bawl a ni? 31 Jesai naupa dam sung chun nang le i lalram chu suknghet ni ngai naw nih. Chuleiin, inkotir nghal la, ka kuomah hung thruoi ro, a thi ngei ding a nih” a ta.

32 Jonathan chun a pa Saula chu a don a, “Ieng leiin am sukhlum a ni ding? Iem a thaw suol hrim a?” a ta. 33 Saula chun khaw tumin a fei chu a hlâng ûr a, chu taka inthok chun Davida chu that a lo tum tak tak a nih ti Jonathan chun a hriet ta a. 34 Lungsen takin dawkana inthok chun Jonathan chu a tho a, a pain muolpho taka Davida a soisak lei chun poi a ti a, chu thla ni hninaa chun ruoi chu a kil ve ta nawh.

35 Zingkar chun Jonathan chu Davida hmu dingin phŭla chun a fe a, naupang a thruoi a. 36 Naupang kuoma chun, “Tlân la, ka thal kaphai hi va zong raw khai” a ta. A tlân charin thal chu ama khêla chun a kâp a. 37 Naupangin Jonathan thal kap thlakna hmun a va tlung chun Jonathanin, “Thal chu i khêla mi saw an naw maw?” a ta. 38 Chun, Jonathan bokin, “Hung tlàn nawk nghal rawh. Inhmaw la, muong naw rawh” a ta, naupang chun thal chu a rût khawm a, a pu kuom tieng chun a hung tlăn a. 39 (Naupang chun chu thil chu ieng khom a hriet ve nawh, Jonathan le Davida chauin an hriet a nih). 40 Jonathan chun a ralthuomhai chu naupang kuomah a pêk a, “Chawi la, in tieng lo kir nawk ta rawh” a ta.

41 Naupang a fe hnung chun Davida chu lungpui sim tieng panga inthok chun a hung suok a, Jonathan hmaah bâwka hnuoi sikin voi thum a bokkhup a, an infawp a, an trap a, Davida chu a trap nasa zuol bik a. 42 Jonathan chun Davida kuomah, “Thlamuong takin fe ta rawh. ‘LALPA chu nang le ei inkar le ka thlahai le i thlahai inkara kumkhuoa hrepuitu a nih’ tiin LALPA hmingin inruolthratna thu ei intiemkam ta kha” a ta. Chuongchun, Davida chu a fe a, Jonathan khom chu khuo tieng a kir nawk ta a.