Saulan Davida that a tum
19
1 Saula chun a naupa Jonathan le a siehlawhai po po chu Davida that dingin a hril a. 2 Jonathan ruok chun Davida chu a ngaina ĕm leiin a kuomah, “Ka pa Saula hin sukhlum dan che remchang a zong leiin zinga inthok chu fimkhur la, inbi hmang la, chu taka chun um zing rawh. 3 Fe suok ka ta, i umna phŭlah ka pa ngirpuiin inbiekpui ka ta, ka thil hriet chu hung hril nawk ka ti che” a ta.4 Jonathan chun a pa Saula hmaah Davida chu inpâkin, “Lal chun a siehlaw Davida chungah poi tawk lul naw raw se, i poi ieng khom a tawk naw a, i ta dinga thil thra tak vong a nih a thaw lem hlak chu. 5 Thi huomin Filistinpa a bei a, LALPAN Israelhai po po ta dingin ropui takin a’n hnĕtir a, chu chu nang khomin i hmu a, i lawm hle kha. Chuleiin, poi tawk lo chungah ieng leiin am thil suol thawin, a san um loin Davida chu i that ding a na?” a ta. 6 Saula chun Jonathan thu hril chu a pom a, “LALPA hring zing hmingin ka hril, Davida chu sukhlum ni naw top a tih” tiin thu a’n khàm a. 7 Jonathan chun Davida chu a ko a, chuong thil po po chu a hril a. Jonathan chun Davida chu Saula kuomah a thruoi a, a hma ang bokin a kuomah a um nawk ta a.
8 Indo a hung um nawk a, Davida chu a’n thok suok a, Filistin mihai chu nasa takin a va bei a, a that treu a, a hmaa chun an tlanse dur dur a.
9 Saula chu a ina fei chawia a’n thrung laiin LALPA tirh ramhuoiin a hung soisak a. 10 Davidan tringtrang a tumpek lai chun Saulan bang le thil khop tumin a fei chun a khaw a, sienkhom Davida chu a lo inhĕm hman a, banga chun fei chu a khaw bûr ngur el a. Davida chu a tlân suok a, chu zân chun a him ta a. 11 Saula chun Davida chu a in tieng inchăna zingkara that dingin mi a tir a. Davida nuhmei Mikal chun, “Voizan hin i hringna hum dinga i tlân naw chun zinga chu that ngei an ti che” a ta. 12 Mikal chun Davida chu tukver tieng a’n rel suoktir a, a tlân hmang a, a him ta a. 13 Mikal chun milim a lâk a, khuma chun a’n zal a, puon a’n siltir a, a lu tieng chu kèl hmulin a’n khum a.
14 Davida man dinga Saula mi tirhai an hung tlung chun Mikalin “A damnaw a nih” a lo ta. 15 Saula chun Davida en dingin a mihai chu a tir nawk a, an kuomah, “A khum pumin hung zawn unla, lo that ka tih” a ta. 16 Sienkhom, khum pindana a mi tirhai an lut chun khuma milim zâl, a lu tieng kèl hmula inkhum chu an hmu ta a. 17 Saula chun Mikal kuomah, “Ieng dinga mi dawhaa ka hmêlma i’n suoktir am a na?” a ta. Mikal chun, “‘I mi’n rel suoktir naw chun ka that ding che a nih’ a mi ti tlat annawm” a ta.
18 Him taka Davida a tlăn suok hnung chun Samuel umna Rama khuo-ah a fe a, a chunga Saula thilthaw dan po po chu a hril a. Davida le Samuel chu Naioth-ah an fe a, chu taka chun an um a. 19 Saulan Naioth-ah Davida a um ti a hriet chun man dingin mi a tir a. 20 Samuel chu hotua thranga zawlnei ruolin insawi duol duola thu an hril lai an va hmu chun Saula mihai chunga khom chun Pathien Thlarau a hung tlung a, insawi duol duolin thu an hril ve ta a. 21 Chu chu Saula an hril chun mi tam lem a tir a, anni khom chun thu an va hril ve ta duol duol a. Saula chun a voi thumnaah mi a tir nawk a, anni khom chun thu an va hril duol duol tho a.
22 A tawpah Saula ngei chu Rama khuo panin a’n thok suok a, Seku hmuna tuikul lien tak chu a va tlung a, “Samuel le Davida khaw lai am an um a?” tiin a’n don a, mihai chun, “Rama khuoa Naioth-ah an um” an ta. 23 Saula chunga chun Pathien Thlarau a hung tlung ve a, a fe pei a, Rama khuoa Naioth a tlung chenin thu a hril malam pei a. 24 Chun, Saula chun a silfen a hlîp a, Samuel hmaa chun thu a hril ve ta muol muol a, chu ni le zankhuo chun saruokin a zâl a. Chu lei chun, “Saula khom zawlnei lai a thrang ve an ta?” ti trongkam hi a hung suok a nih.