5 Saulan thil thaw dinga a tirna taphotah hlawtling taka a hlen pei leiin Davida chu a sipaihai lai ngirhmun insâng takah Saula chun a hlăngkai a. Chu chun mipui po po le Saula thoktuhai chen khom a suklawm a.

6 Davidan Filistinpa a that hnunga mihai an hung kir chun, Israel khaw tinah nuhmei ruol chu hla saka lâmin, khuong le dâr le tum thei tinrêng leh hlim takin Lal Saula hmuok dingin an hung suok a. 7 Nuhmeihai chun lăm pumin,

8 Chu thu chu Saula’n a lawm naw a, a lung a sen ta hle a. “Davida chu a sînga sîng thatah an ngai a, kei chu a sânga sâng chauh thatah an mi ngai a na, a ram ti ngot naw chu a nei naw ieng am a um ta a?” tiin a ngaituo a. 9 Chu nia inthok chun Saula chun David chu a thîk ta ĕm êm a.

10 A zînga chun Pathien tir thlarau suolin Saula chu nasa takin a hung soisak a, ni danga a thaw dan pangngaiin Davidan tringtrang a tum lai chun thu a hril buon buon a. 11 Saula chun fei a chawi a, “Banga son Davida hang khaw dè chor ka tih” tiin a khaw a, Davida chun voi hnih an kiengsan a.

12 Davida kuomah LALPA a um a, ama a maksan ta si leiin Saula chun Davida chu a tri a. 13 Chuleiin, Davida chu a kuoma inthokin a son a, sipai sâng chunga kawmandar-ah a sie a, an ràl beinaah Davida chun hma a thruoi a. 14 A kuomah LALPA a um leiin a thilthaw taphotah nasa takin a hmuingil a. 15 A hlawtlingzie Saulan a hmu leiin ama chu a trì a nih. 16 Israel mi le Juda mi po po ruok chun an ràl beinaa hma thruoitu chu Davida a ni leiin an ngaina hle a.

17 Saula chun Davida kuomah, “Ka naunu upa lem Merab hi i nuhmei dingin ka pêk che. Huoisen takin ka rong bawl phot la, LALPA ta dinga indonaa hin thrang la nasa rawh” a ta. Saula chun a lungrilin, “Kei chun a chungah kut thlâk naw ning. Filistinhaiin thaw lem raw se” a ti a. 18 Davida chun Saula kuomah, “Lal makpa ni thei dingin kei hi tu am ka na, ka sunghai le kan pahnam hi Israelhai lai khom ieng am an na?” a ta. 19 Amiruokchu, Saula naunu Merab-in Davida a nei hun a hung tlung chun Meholat mi Adriel nuhmei dingin Saula chun a pêk lem ta dai a!

20 Saula naunu Mikal chun Davida a ngaizawng a, chu thu chu Saula kuomah an hril a, a lawm hle a. 21 Saula chun a lungrilin, “A’n awkna ding châng le Filistin mihaiin a chunga kut an thlăkna remchang a ni tâkduoiin ka naunu chu pêng ka tih” a ta. Chuleiin, Saula chun Davida kuomah, “Voisun hin ka makpa ni theina remchang i nei nawk tah” a ta. 22 Saula chun a siehlawhai kuomah, “Arûkin Davida inbiekpui unla, ‘Ngai ta, lal chu i chungah a lawm hle a, a siehlawhai po po khomin an hmangai che a, chuleiin lal makpaah um rawh’ ti ro” a ta.

23 Chuong thu chu siehlawhai chun Davida an hril sawng a. Davida ruok chun, “Lal makpa ni hi thil tênaua in ngai am a ni? Kei chu mi rethei le tu hriet hlaw lo ka ni hi” a ta. 24 Saula siehlawhaiin David thu hril an ripawt chun Saulan, 25 “David kuomah hi thu hi va hril ro: Lal chun hmêlma chunga phuba lakna dingin Filistinhai ser vun hmawr zakhat ti naw chu a naunu man dingin ieng khom a dit nawh’ ti ro” a ta. Filistinhai kuta Davida inthitir dan ding chu chuong ang chun Saulan a phier rŭk a nih.

26 Saula siehlawhaiin chuong thu chu Davida an hang hril chun, lal makpa a hang ni ding chu a lawm hle a. 27 Ni tiem a bo hmain Davida le a mihai chu an inthok suok a, Filistin mi zahni an that a, an ser vun hmawr chu a hung chawi a, lal makpa a ni theina dingin lal chu kim takin a pêk a, Saula chun a naunu Mikal chu nuhmeiah a’n neitir ta a.

28 Saula chun Davida kuomah Pathien a um ti le a naunu Mikal chun a hmangai ti a hung hmu chieng ta a. 29 Chu taka inthok chun Saula chun Davida chu a trì nawkzuol a, a dam sunga a hmêlma a hung ni ta a.

30 Filistin sipai kawmandarhai chun an hung indopui zing a, an hung do zàtin Davida chu Saula kawmandar danghai nèkin a hlawtling lem zie a, a hming chu a hung inthang ta ĕm êm a.