4 Gath khaw mi a hming Goliat chu Filistinhai inkulnaa inthok chun Israelhai chu cho dingin a hung suok a. A dung chu meter thum deuthawa insâng a nih. 5 Dâr awmphaw kilogram sawmnga pasaria rik a hâk a, dâr lukhum a khum bok a. 6 Dâr ngalphaw a ngala chun a bun a, a ruongzâng tieng chun dâr fei a pai a. 7 A fei ngul chu puonkhawngna tlângkhang tiet a na, a fei lu zum chu kilogram saria rik a nih. A phaw chawitu chu a hmaah a fe a.

8 Goliat chu a ngîr a, Israel sipaihai chu a hrawk khum a, “Indo dinga ieng leia in hung inzar phar am? Kei hi Filistin mi ka ni naw maw? Nangni khom Saula siehlawhai in ni naw maw? Nangni laia pakhat thlang suok unla, a mi bei dingin hung thla raw se. 9 A mi bei theia a mi sukhlum chun in siehlawah um kan ta, keiin ka ngama ka sukhlum ruok chun kan siehlawah um in ta, kan rong bawl in tih” tiin. 10 Filistin mi bok chun, “Voisun hin Israel sipai po po ka cho cheu. Mi pakhat hung thlang suok unla, lo inbei kan tih” a ta. 11 Filistinpa rawl an hriet chun Saula le a sipaihai chu zâmzalin an inthin hăwp a.

12 Davida chu Efrat mi Jesai naupa, Judai rama Bethlehem khaw mi a nih. Jesai chun naupa pariet a nei a, Saula hun lai chun upa tak le tar tak a ni tah. 13 Jesai naupahai laia a upa tieng pathum chun indonaah Saula an zui a, chuonghai chu an upat dan indotin Eliab hai, Abinadab hai le Sama hai an nih. 14 Davida chu an unau laia naupang tak a na, Saula zuituhai chu a upa tieng pathum an nih. 15 Davida chu Saula kuoma inthokin Bethlehema a pa beram enkol dingin a fe zing zing hlak a.

16 Ni sawmli sung zet el chu Filistinpa chu zing tieng le zan tieng zâtin a hung suok a, Israelhai chu a cho hlak a.

17 Ni khat chu Jesai chun a naupa Davida kuomah, “Bu zĕu kilogram sawm le bei tlang sawm hi chawi la, i unauhai inkulna hmunah va tlanpui vat raw khai. 18 Chun, bawngnene khal tlang sawm hi an pawla sangkhat chunga kawmandar ta dingin chawipêk bok la, i unauhai iem an chang hung indon la, an chanchin hung hawnkir rawh. 19 Saula le anni le Israel mi po po chu Filistin mihai beiin Ela ruomah an um a nih” a ta.

20 Zingkar inhma takin Davida chun a ran ruolhai chu berampuhai kuomah maksanin Jesaiin thu a pĕk ang chu phurin a unauhai inkulna tieng panin a suok a. Râl bei dinga sipaihai an inthok mĕk lai le an khĕk dur dur lai chun an inkulna chu a va tlung a. 21 Israelhai le Filistinhai chu inbei dingin an lo inzar a, sipai le sipai chu an lo inep thrup el a. 22 Davida chun a thil chawi chu fak ding enkoltuhai kuta chun a sie a, sipaihai umna tieng chun a tlân a, a uhai chu chibai a va bûk a.

23 A unauhai a biek lai chun Filistinhai mi suongtawlol Goliat, Gath khaw mi chu sipai pawlhai laia inthokin a hung inchawm suok a, a chona thu pangngai bok a hril nawk a, chu chu Davidan a lo hriet a. 24 Israel mihaiin chu pa an hmu chun tri êm êmin an tlanse a.

25 Israel mihai chun, “Kha mihriem hung suok kha in hmu am? Israel mihai cho dinga hung suok a ni kha. Tu khom ama that thei taphot chu lalin nasa takin sum tieng sukhausang a ta, a naunu pe’ng a ta, a pa sungkuohai chun Israel rama hin leiman le sie chawi âwl an tih” an ta. 26 Davida chun a bula ngirhai kuomah, “Hi Filistinpa thattu le Israelhai hmingsietna sukrètu chunga chun ieng lawmman am ie an pèk ding chu? Hi sertan lo Filistinpa hi tu am a na, Pathien hring sipaihai a hang cho ngam vei chu?” a ta. 27 Anni chun, “A sukhlumtu taphot chu kan hril tah ang khan a chungah thawpêk ni’ng a tih” an ti nawk a.

28 Davida u a upa takin mihai kuoma a sang thu hril a lo hriet chun Davida chungah nasa takin a lung a sen a, “Ieng dinga hi taka hung thla vè ché? Thlalĕra beram tlawmte kha tu am i’n vengtir a na? I chapozie le i lungril rîtlozie ka hriet. Indo en ding damin maw i hung mei mei chu?” a ta. 29 Davida chun, “Iem a na ka thaw suol? Ka trong chen khom in khap a ni?” a ta. 30 Chuongchun, mi dang kuom tieng a ngha a, a hril ngai bok chu a hril nawk a, mihai chun a hmaa an don ang bok khan an don nawk a.

31 Davida thu hril lo hretuhai chun Saula kuomah an hril sawng a, Saula chun a ko a. 32 Davida chun Saula kuomah, “Hi pa lei hin tu khomin lung sukhnuol naw raw hai se; i siehlaw hi fe’ng ka ta, keiin va bei ka tih” a ta. 33 Saula chun, “Hi Filistinpa bei ding hin nang êm chu fe lo e. Tleirawl chauh i la ni a, ama ruok chu a tleirawla inthoka indo mi a ni si a” a ta.

34 Sienkhom Davida chun Saula kuomah, “I siehlaw hin a pa beram a vĕng hlak a. Sakeibaknei amanih savom amanih an hung a, beram ruol laia beram te an lak chăng a um hlak. 35 Chuonghai chu ka hnot a, ka bei a, an baua inthokin ka san suok hlak a; chun, mi bei dinga an hung inthok changin an bak hmulah ka man a, ka bei a, ka that hlak a nih. 36 I siehlaw hin sakeibaknei le savomhai ka that ta hlak a. Chu sertan lo Filistinpa khom chu anni ang tho ni ve’ng a tih, Pathien hring sipaihai dam a hang cho ngam vei chu. 37 Sakeibaknei kutbawr le savom kutbawra inthoka mi sansuoktu LALPA chun hi Filisitinpa kuta inthok khom hin mi sansuok ngei a tih” a ta. Saula chun, “Chuong an leh fe raw leh, LALPAN umpui a ti che” a ta.

38 Ama thuomin Saula chun Davida chu a’n thuomtir a, dâr lukhum a’n khumtir a, awmphaw a’n haktir bok a. 39 Davida chun a thuom chungah kawlhnâm a pâi a, hang fe a tum a, chuong ang chun a la thaw nga si naw leiin Davida chun Saula kuomah, “Ka la thaw thrang naw leiin hieng hin chu fe thei naw ning” a ta, a hlîp nawk a. 40 Chuongchun, a hmol chu a chawi a, vadungtea lung inmum thra panga a rût a, a beram vĕngna mansaa chun a pai a, a kuta saihli chawiin Filistinpa chu a pan ta a.

41 Filistinpa chu a hung phei a, Davida chu a hung pan hnai a, a phaw chawitu chu a hmaa chun a fe a. 42 Filistinpa chu a hang ngha a, Davida a hmu chun a tham naw hle a, sàr veng vong, mit meng mawi tak le tleirawl el a ni si a. 43 Davida kuoma chun, “Ui am ka ni, hmol le i mi hung pan chu?” a ta. Filistinpa chun an pathienhai hming salin Davida chu trongsie a’n phur a. 44 “Hi taka hin hung rawh, i taksa kha chungleng vatehai le ram sahai lo infaktir ka tih” a ta.

45 Davida chun Filistinpa kuomah, “Nang chu kawlhnâm dam, fei dam, feite dam chawiin mi bei dingin i hung a, kei ruok chu i cho pŭng pûng Iengkim LALPA, Israel sipaihai Pathien hmingin ka hung bei chê a nih. 46 Voisun hin nang hi ka kutah LALPAN a mi pĕk ding a na, hne’ng ka ti che a, i rîng tan ka tih. Filistin sipaihai ruong chu voisun hin chungleng vatehai le ram sahai ka’n faktir ding a nih. Chuongchun, hnuoi chunga mi po po hin Israelhai lai Pathien a um ti hre thei an tih. 47 LALPA chun kawlhnâm le feiin a sandam nawh ti pungkhawm po po hin hre thei bok an tih. Indona chu LALPA indona a ni si a; Ama chun kan kutah nangni rawi hi a mi pĕk ding a nih” a ta.

48 Bei dinga Filistinpain a hung pan hnai lai chun Davida chu inrang takin sipaihai umna tieng chun lo bei dingin a tlân phei a. 49 Davida chun a mansa a pur a, lungte a phor a, a saihli chun Filistinpa chaldâr takah a per a, a chala chun lung chu a tlum a, a khupbokin a tlu ta ruoi ruoi el a. 50 Davida chun Filistinpa chu saihli le lungtein a ngam a, kawlhnâm thrang dêr loin a per thluk a, a that ta a. 51 Davida chu a tlân a, Filistinpa bula chun a va ngîr a, a kawlhnâm chu a pâia inthokin a phawi suok a, chu chun a that a, a lu chu a tan a. Filistinhaiin an mi hrât khawkhèng a thi ti an hriet chun an tlanse a.

52 Israel mihai le Juda mihai chu an tho a, an khĕk dur dur a, Filistin mihai chu Gath chen le Ekron kul kotkhar chen an hnot a. Filistin mi an thathai chu Saraim lampui intluonin, Gath-a inthoka Ekron chenin an inthal pheng phung a. 53 Israelhaiin Filistin mihai an hnot chu an hung kir a, an riebŭk chu an rok a. 54 Davida chun Filistinpa lu chu a lâk a, Jerusalemah a fèpui a, a ralthuom ruok chu a puon inah a sie a.

55 Filistinpa bei dinga Davida a fe lai Saulan a hmu khan a sipai kawmandar Abner kuomah, “Abner, hi tleirawl hi tu naupa am a na?” a ta, Abner chun, “I hringna sâlin ka hril, aw lalpa, ka hriet dĕr nawh” a ta 56 Lal chun, “Hi naupang hi tu naupa am a na ti indon suok rawh” a ta. 57 Filistinpa a that zo hung kir tieng Davida chu Abnerin Saula kuomah a thruoi a, Filistinpa lu chu a la chawi zing a. 58 Saula chun, “Tu naupa am i na, tlangval?” a ta. Davida chun, “Bethlehema mi, i siehlaw Jesai naupa ka nih” a ta.