2 Samuel chun, “Iengtin am fe thei ka ta? Saula’n a lo hriet chun a mi that el ding a nih” a ta. LALPA chun, “Bawngla tuoi kei la, ‘LALPA kuoma hlănbiek dinga hung ka nih’ ti rawh. 3 Chun, hlănbieknaa chun Jesai chu ko la, i thaw ding hril ka ti che. Mi ka kăwkhmu ding che chu hriek i mi nălpèk ding a nih” a ta.

4 Samuel chun LALPA hril angin a thaw a. Bethlehem a tlung chun a khaw upahaiin inthin pumin an lo hmuok a, “A thra tienga hung am i ni?” tiin an indon a. 5 Samuel chun, “A thra tienga hung ni e, LALPA kuoma hlănbiekna inhlăn dinga hung ka nih. Insukfai unla, hlănbieknaah hung ro” a ta. Chu zoah Samuel chun Jesai le a naupahai chu a’n thien a, hlănbieknaa hung thrang dingin a fiel a.

6 An hung tlung chun Samuelin Eliab chu a hmu a, a lungrilin, “LALPA hriek nal ding chu LALPA hmaa um hi a ni ngei el” a ta. 7 Sienkhom, LALPA chun Samuel kuomah, “A hmêl tieng amanih, a dung insang tieng amaniah en naw rawh, ama hi chu ka dit nawh. LALPA chun mihriem en dan angin a en ve nawh; mihriem chun puo tieng inlang dan an en hlak a, LALPA ruok chun lungril tieng a en lem hlak a nih” a ta.

8 Jesai chun Abinadab a ko a, Samuel hmaa chun a’n fetir a. Ama chun, “Hi khom hi LALPA thlang a la ni nawh” a ta. 9 Jesai chun Sama a van fetir nawk a, Samuel chun, “Hi khom hi LALPA thlang a la ni naw rop” a ta. 10 Jesai chun a naupa pasarihai chu Samuel hmaah a’n ngirtir a, Samuel chun, “Hienghai khom hi LALPA thlang an la ni nawh.” a ta. 11 Samuel chun Jesai kuomah, “Hitaka hin i naupahai an um kim vong am?” a ta, ama chun, “A naupang tak a la um nawh, beram a vĕng a nih” a ta. Samuel chun Jesai kuomah, “Va’n kotir raw khai. A hung tlung hmâ khat chu ei tran thei naw ding a nih” a ta.

12 Chuongchun, a va’n kotir a, an hung thruoi a. Ama chu săr veng vong, hmêl thra tak le mit meng mawi tak a nih. LALPA chun Samuel kuomah, “Ama hi a nih; tho la, hriek va nâl rawh” a ta. 13 Samuel chun a hriek thunna fungki chu a lâk a, a unauhai mithmua ngei chun hriek a năl a, chu nia inthok chun Davida chungah LALPA Thlarau chu thilthawtheina leh a hung tlung a. Samuel chu a tho a, Rama khuoah a fe ta a.

14 LALPA thlarau chun Saula chu a suoksan a, LALPA tirh ramhuoiin ama chu a soisak a. 15 Saula siehlawhai chun a kuomah, “En ta, Pathien tir ramhuoiin a soisak che a ni hi. 16 Kan pu hin a siehlawhai hi tringtrang tum thiem zong dingin thu mi pe sien, ama chun Pathien tir ramhuoiin a hung hluo pha che tringtrang chu tum a ta, hung thra el i tih” an ta. 17 Saula chun a siehlawhai kuomah, “Chuonga tum thiem chu zong inla, ka kuomah hung thruoi ro” a ta.

18 A siehlaw laia pakhat chun, “Bethlehema Jesai naupa tringtrang tum thiem ka hmu ta a. Ama chu mi huoisen, raldo thiem, thu hril thiem le hmêl thra tak a na, a kuomah LALPA khom a um” a ta. 19 Saula chun Jesai kuomah mi a tir a, “Beram vengtu i naupa kha ka kuomah hung tir rawh” tiin thu a’n cha a. 20 Jesai chun sabengtung a buotsai a, bei le uoiin peng khat a’n phurtir a, kel tuoi a hung lâk bok a, chuonghai chu inchawitirin a naupa David chu Saula kuoma chun a’n fetir a.

21 Davida chun Saula kuom chu a va tlung a, a hmaa chun a ngîr a, ama chun a lo ngaina hle a, a ralthuom chawituhai laia pakhatah a hmang a. 22 Saula chun Jesai kuomah, “I naupa Davida hi ka kuomah um raw se. Ka mit a tlung hlè a nih” ti thu hril dingin mi a tir a.

23 Pathien tir ramhuoiin Saula a hung soisak zatin Davida chun tringtrang a lâk a, a tum a, ramhuoi chun a suoksan a, a hung har a, a thra nawk hlak.