LALPAN Saula a hnawl
15
1 Samuel chun Saula kuomah, “Israelhai lal ni dinga hriek năl ding chea LALPA hung tir kha ka ni a, tu hin LALPA thu chu ngaithla rawh. 2 Iengkim LALPA chun hieng hin a hril: Aigupta rama inthoka Israelhai an hung laia Amalek mihaiin lo lambuna an soisak lei khan ka hrem tawl ding a nih. 3 Tuhin Amalekhai bei dingin fe la, an thil nei hrim hrim hlà nei dêr loin sukbohmang vong rawh. Tu khom hlà nei naw la, a nuhmei a pasal, naupang le naute, bawng le beram le sanghawngsei le sabengtung hai chu that ram vong rawh” a ta.4 Saula chun mipui chu a ko khawm a, Telaim khuoah a tiem a, Israel mi nuoi hni le Juda mi singkhat an nih. 5 Saula chun Amalek mihai khuo chu a zu tlung a, ruom karah an lo lambun a. 6 Saula chun Ken mihai kuomah, “Hung suok unla, Amalek mihai laia inthokin inthier fihlim ro, chuong naw chun sukhlum ve palh rawi ka ti chêu. Nangni chun Israel thlahai Aigupta rama inthoka an hung suok lai khan in lo lunginsiet si a” a ta. Chuongchun, Ken mihai chu Amalek mihai laia inthok chun an inthier fihlim a.
7 Chu zoah Saula chun Amalek mihai chu Havilaa inthoka Aigupta sak tienga Sur chenin a bei a. 8 Amalekhai lal Agag chu a hringin a man a, a mihai chu kawlhnâmin a that ram vong a. 9 Amiruokchu, Saula le a mihai chun Agag chu an hla a, beram le bawng thrá thrà, bawngchal tuoi le beram thau thrá an ti hrim hrim chu an hlâ bok a, a thra naw le ongrop an ti po chauh an sukhlum a.
10 LALPA thu chu Samuel kuomah a hung tlung a, 11 “Saula hin a mi nghatsan a, ka thupêk anga a thaw naw leiin lala ka lo ruot hi ka’n sìr a nih” a ta. Samuel chu a lungzing hle a, zankhuoin LALPA a ko a. 12 A zinga chun inhma takin Samuel chu a tho a, Saula hmuok dingin a suok a. Sienkhom, “Saula chu Karmel tlangah a fe a, chu taka chun ama hriet zingna lung a phun a, chun, a kir nawk a, a fe pei a, Gilgalah a fe thlăk” tiin Samuel chu an lo hril a.
13 Samuel-in Saula kuom a tlung chun Saulan, “LALPAN malsawm che raw se. LALPA thupèk angin ka thaw tah” a ta. 14 Samuel chun, “Chuong beram inbe ri ka naa hung lut le bawng inbu ri ka hriethai chu ieng thil am an ta a?” a ta. 15 Saula chun, “Sipaihaiin Amalek mihai ta an hung làkpèk a ni chu. LALPA i Pathien kuoma thilhlân dingin sipaihaiin beram thrá thrà le bawngchal thrá thrà an hla a, a dang po chu kan sukhlum vong a nih” a ta.
16 Samuel chun Saula kuomah, “La to ta, LALPAN voizana ka kuoma thu a hril chu hang hril ka ti che” a ta. Saula chun, “Mi hril raw khai” a ta.
17 Samuel chun, “Nangma ngaia ieng khop lo i ni zing lai khan Israel hnamhai lû taka sie i ni naw maw? LALPA chun Israelhai chunga lal dingin hriek a năl che a. 18 LALPA chun a tir suok che a, ‘Fe la, mi suolhai, Amalek mihai chu sukhlum vong rawh, an bohmang dĕr hmâ khat chu bei pei rawh’ a ti che a. 19 Iengti leia LALPA thu chu inza loa i um am a na? Ieng leia râllâk thil chu baw huom huom a, LALPA mithmuah thil suol i thaw am a na?” a ta.
20 Saula chun, “LALPA thu chu ka zawm annawm. LALPA mi tirnaa chun ka fe a. Amalek mihai chu ka sukhlum vong a, an lal Agag ka hung hawn a. 21 Râllâk thil, sukbohmang el ding laia beram le bawng thrá thrà chu Gilgala LALPA i Pathien kuoma hlănbiekna dingin sipaihaiin an hung lak bok a nih” a ta.
22 Samuel chun Saula kuomah, “LALPA chun a thupêk zawm ang tlukin pumraw thilhlânhai le hlănbiekna hi a lawm am a ni? Hlănbiek nĕkin thu awi a thra lem a, beramchal thâu inhlăn nêkin a thu poisak a thra lem. 23 Helna hi aien thiemna suol ang a na, lululna hi milim biekna suol ang a nih. LALPA thu chu i hnawl leiin, ama khomin lal dingin a hnawl ta che a nih” a ta.
24 Saula chun Samuel kuomah, “Thil suol ka lo thaw a nih. LALPA thupĕk le i thu mi pĕkhai chu ka lo bawsiet a nih. Mipuihai chu ka tri a, anni tieng ka lo thlĕ a nih. 25 Ka suol ngaidam la, LALPA ka chawibiek theina dingin mi fepui nawk hram raw khai” tiin a ngĕn a. 26 Samuel chun, “Fepui naw top ka ti che. LALPA thu chu i hnăwl a, Israelhai chunga lalah LALPA khomin a hnăwl ta chê a nih” a ta.
27 Fe dinga Samuel a hang inher lai chu Saulan a zakaw fuol hmorah a man a, a zakuo chu a’n thler a. 28 Samuel chun, “Voisuna inthok hin Israel lalram chu LALPAN a lakpèk ta che a, i nêka thra lem i tuolbawmhai laia mi pakhat a pêk tah. 29 Ama Israel Ropuina chun khêl a hril ngai naw a, a lamlèt ngai bok nawh; Ama chu mihriem anga lungril thlâk dingin mihriem a ni ve si nawh” a ta.
30 Saula chun, “Ka lo suol a nih. Amiruokchu, lunginsiet takin Israel upahai le mipuihai hmaa hin mi chawimawi la, LALPA i Pathien chu ka chawibiek theina dingin mi fepui hrâm raw khai” a ta. 31 Chuongchun, Samuel chun Saula chu a kìrpui a. Saula chun LALPA chu a chawibiek a.
32 Chu zoah Samuel chun, “Amalekhai lal Agag chu ka kuomah hung thruoi ro” a ta. Agag chun thina chu a pumpel taa inngaiin, ngaingam takin Samuel kuoma chun a hung a. 33 Sienkhom, Samuel chun, “I kawlhnâmin nuhmeihai nau nei loa i siem ang bokin i nu khom nuhmei laia nau nei lo ni ve ta’ng a tih” a ta, Gilgala LALPA maicham hmaa chun Agag chu a sât hlum a.