Samuel inthlăna thucha
12
1 Samuel chun Israel mi po po kuomah, “Ngai ta u, ka kuoma in thu hril po po ka ngaithlak a, lal ding khom ka siempek ta chêu a. 2 Tu hin chu thruoitu in lo nei ta hi. Kei ruok chu ka lo upa tain ka lu-ah kèl sam a tro ta a, ka naupahai in kuomah an um hi. Ka tleirawla inthokin voisun chen hin in thruoitu ka lo ni hlak a. 3 Tu hin in hmaah ka ngîr a. LALPA le a hriek năl hmaa hin mi hang fie hrim ta um khai. Tu bawngchal am ka lakpek hlak a? Tu sabengtung am ka lakpek hlak a? Tu am ka hlĕm ta hlak a? Tu am ka sukdŭda hlak a? Thlei bǐk nei dingin tu laka inthokin am thamna ka lâk hlak a? Hieng thilhai hi ka thaw pal a um chun rul nawk vong ka ti chêu” a ta.4 Mipui chun, “I mi hlêm ngai naw a, i mi sukdŭda ngai bok nawh. Tu kuta inthok khomin ieng khom i lâk ngai nawh” an ta. 5 Samuel chun an kuomah, “Ka kutin thil awm lo ka thaw ngai nawzie voisuna mi hrepuitu chu LALPA a na, a hriek năl khom hi a ni bok” a ta. Mipui chun, “Ni e, LALPA chu hrepuitu a nih” an ta.
6 Samuel chun mipui kuomah, “Mosie le Aron ruottu le Aigupta rama inthoka in pi le puhai thruoi suoktu chu LALPA a nih. 7 Chuleiin, LALPA hmaa hin ngir thrap unla, LALPAN in chunga le in pi le puhai chunga thil fel taka a lo thaw danhai chieng takin hang suipui ka ti chêu. 8 Aigupta rama Jakob a lut hnung khan, in pi le puhai chun LALPA an ko a, LALPA chun Mosie le Aron a tir a, anni chun in pi le puhai chu Aigupta rama inthokin an thruoi suok a, hi hmuna hin a’n umtir a. 9 Nisienlakhom, LALPA Pathien chu an theinghil a, ama chun Hazor sipai hotu Sisera kuta le Filistin mihai kuta le Moab lal kutah a zor a, anni chun an do a. 10 Chu phing leh thrangpuitu dingin LALPA an ko a, ‘LALPA chu kan nghatsan a, Baal-hai le Astoret-hai rong kan bawl leiin kan lo suol a nih. Nisienlakhom, kan hmèlmahai kuta inthokin mi san suok ta la, chuongchun i rong bawl ta’ng kan tih’ an ta.
11 “Chun, LALPA chun Jerub Baal dam, Barak dam, Jeftha dam le Samuel haia dam a tir a, sîr tina in hmelmahai lakah a san suok chêu a, him takin in um a. 12 Amiruokchu, LALPA Pathien chu in lal a ni zing si laiin Amonhai lal Nahas chu nangni do dingin a hung ti in hriet charin ka kuomah, ‘A ni naw ie, lalin mi op lem raw se’ in ta. 13 Chuong ang chun tu hin in lal thlang le dit chu en ro, LALPA chun lal a siempek ta cheu a ni hi. 14 LALPA chu tri a, a rong bawl a, a thu zawm a, a thupêkhai lakah hel lo a, nangni le in chunga rorêltu lal leh LALPA Pathien zuitu in ni chun thra’ng a ta, 15 amiruokchu, LALPA rawl ngaithla lo a, LALPA thupĕk in helsan ruok chun in pi le puhaiin LALPA kut an tuor ang bokin nangni khomin tuor ve’ng in tih. 16 Chuleiin, ngir thrap unla, LALPAN in mithmua thil ropui tak a thaw ding hi en ro. 17 Voisun hin bu an sìk a ni naw am a ni? Van inrumtir ding le ruo insurtir dingin LALPA ko ka ta, chuongchun lal in hni thua hin thil suol in thaw nazatzie hrein hmung in tih” a ta.
18 Samuel chun LALPA a ko a, chu ni chun LALPAN van a’n rumtir a, ruo an surtir bok a, mipui chun LALPA le Samuel chu an tri ta èm ém a. 19 Mipui chun Samuel kuomah, “Kan thi nawna dingin LALPA i Pathien kuoma chun i siehlawhai hi mi trongtraipek rawh, lal kan hni hin kan suolna chu a belsa zuol si a” an ta.
20 Samuel chun mipui kuomah, “Tri naw ro, thil thra lo tak chu in thaw ngei a, sienkhom LALPA chu pètsan naw unla, in lungril po poin LALPA rong chu bawl ro. 21 Hmangna bo milim bieksan naw ro. Chuonghai chun thil thra intlun naw ni chêu a, san suok thei bok naw ni hai chĕu, hmangna bo thil an ni tlat a. 22 A hming ropui tak lei chun LALPAN a mihai chu hnâwl naw nih, a mihaia siem chêu hi LALPA lawm zawng tak a ni si a. 23 Keima chungthua chu, nangni ta dinga trongtraipek bansanin LALPA lakah thil suol thaw ngai naw top ka ta, lampui thra le indik kawkhmu pei lem ka ti chêu. 24 LALPA chu tri phot unla, in lungril po poin titakzetin a rong bawl unla, in ta dinga thil ropui a thawhai hi ngaituo ro. 25 Amiruokchu, suol taka thil in la thaw rop chun phît hmang a ti chêu, nangni le in lal pumin” a ta.