Samuelin Saula a zil
13
1 Saula chu kum sawmthum le kum hni a niin an lal tran a, Israelhai chungah kum sawmli le kum hni a’n lal a. 2 Saula chun Israelhai laia inthokin mi sangthum a thlang suok a, sanghni chu Mikmas le Bethel tlangramah Saula kuomah an um a, sangkhat chu Benjamin ram Gibea khuoah Jonathan kuomah an um a, a dang po po chu an in tieng a tirkir vong a.3 Jonathan chun Gibea-a Filistinhai ralveng buk a bei a, chu chu Filistinhai chun an lo hriet a. Saula chun a ram pumah tawtawrawt a’n muttir a, “Hebrai mihai po poin lo hre ro. 4 Saula’n Filistinhai ralveng buk a bei a, Israelhai chun Filistinhai theida an phur” tiin. Chu thu Israelhaiin an lo hriet chun mipuihai chu Saula kuomah Gilgala chun an inchà khawm a.
5 Filistinhai khom chu Israelhai bei dingin an inchà khawm a, tawlailir singthum, sakor chungchuong mi sangruk le sipaihai chu tuifinriet kama trieu zât anga tam an nih. Anni chu an kai tung a, Beth-aven sak tieng Mikmas-ah an inkul a. 6 Israelhai chun an ngirhmun derthawngzie le an sipaihai chu hnawchêpa an umzie an hrietin pûka hai, chîmbuka hai, lungpui kara hai, khura hai le tuikula hai an inbi a. 7 Hebrai mi threnkhat lem chu Jordan vadung kânin Gad le Gilead rama hai an tlàn a. Saula ruok chu Gilgalah a la um zing a, a sipaihai hlak chu triin an inthin hawp a.
8 Samuel ni ruot angin Saula chun ni sari sung Gilgalah a lo nghak a, sienkhom Samuel chu a tiem hunah a hung el ta si naw leiin mihai chun an tlan darsan a. 9 Saula chun, “Pumraw thilhlân le inremna thilhlân dinghai chu ka kuomah hung chawi ro” a ta, pumraw thilhlânhai chu a’n hlàn a. 10 Saulan an hlàn zo charin Samuel a hung tlung a, Saula chun a va hmuok a. 11 Samuel chun, “Ieng thil am i lo thaw ta le?” a ta. Saula chun, “Mipui an trin dar ka hmu a, nang hlak i ni ruot-ah i hung tlung ta bok si naw a, Filistin mihai hlak Mikmas-ah an pung khawm lui lui bok si leh, 12 chuongchun kan ngaituo a, ‘Filistinhaiin Gilgalah an mi hung bei trèp ta si a, LALPA ditsakna ka la hni bok si nawh’ ka ta; chuleiin, pumraw thilhlân chu thaw lo thei loah ka ngai leiin ka lo inhlàn el a nih” a ta.
13 Samuel chun Saula kuomah, “I thilthaw hi thil invĕtthlăk a nih. LALPA i Pathienin thu a pĕk che chu i zawm naw a nih; zawm chu ni la, LALPA chun Israelhai chungah i lalna hi kumkhuoin a suknghet awm vei leh. 14 Tu ruok hin chu i lalna hin dai sâwt ta naw nih; LALPA thupèk chu i zawm naw leiin, LALPA chun ama lungril ang put mi a zong a, a mihai chunga rorêltu dingin a ruot tah a nih” a ta.
15 Samuel chun Gilgal a maksan a, Benjamin ram Gibea khuoa chun a hang fe a. Saula chun a kuoma umhai chu a tiem a, mi zaruk vel an nih.
Ralthuom bo Israelhai
16 Saula le a naupa Jonathan le an kuoma umhai chu Benjamin rama Gibea khuoa chun an um a, Filistinhai chu Mikmas-ah an inkul a. 17 Filistin tienga inthoka hung rûntu pawl chu hmun thumah an inthre a. Pawl khat chun Sual bula Ofra tieng an pan a, 18 pawl khat chun Beth Horon tieng an pan a, pawl khat chun thlalĕr dep Zeboim ruom ep ramri lam tieng chu an hraw a.
19 Filistinhaiin, “Hebrai mihai hin kawlhnâm le fei dam siem rawi an tih” an ti leiin Israel ram pumah thirsu hrim hrim an um nawh. 20 Chuleiin, Israel mihai chun an làngkawn hai, lungràl hai, hreipui hai le kawite hai an tàt ngei ding pha Filistinhai umnaah an zu fe hlak a. 21 Langkawn le lungrăl tăt ngeina man chu sekel hmun thuma threa hmun hni a na, thir kut le hreipui le ran hawlna thir zum tàt ngeina man chu sekel hmun thuma hmun khat a nih. 22 Chuong chu a ni leiin, an indo ni chun Saula le Jonathana ti chauh naw chun an kuoma mi umhai chu kawlhnâm amanih fei amanih nei hrim hrim an um nawh. 23 Chun, Filistinhai chun an sipai pawl khat chu Mikmas kawn tieng khăna lo inchàntu dingin an tir a.