Saulan Amonhai a hnè
11
1 Amon mi Nahas chun Jabesh Gilead chu rûn tumin a hang inhuol a. Jabesh mi po po chun Nahas kuomah, “Keini leh thuthlung siem la, i thu hnuoiah um kan tih” an ta. 2 Amon mi Nahas ruok chun, “Hieng ang hin in kuomah thuthlung siem thei ka tih: in mit chang tieng khel dok vong ka ta, Israelhai po po sukhmêlhem ka tih” a ta. 3 Jabesh khaw upahai chun a kuomah, “Israel ram po poah mi kan tir theina dingin ni sari sung mi la ngai rawh. Mi sandam thei ding tu khom an um naw chun i hmaah hung inpe lŭt kan tih” an ta.4 An mi tirhai chu Saula umna Gibea khuoah an fe a, an thil ngiet an hang ripawt chun mipui chu an trap khêk chŭl el a. 5 Chuong lai chun Saula chu loa inthokin bawngchal khalin a hung a, “Iem a ta mipui an trap chu?” a ta. Jabesh khaw mihai thu hril chu an hril sawng a.
6 Saulan chu thu a hriet char chun a chungah Pathien Thlarau thilthawtheina a hung tlung a, a lung a sen hle a. 7 Bawngchal tuok khat a that a, an sa a chan nawi vong a, Israel ram po poa chun a’n semtir a, “Tu khom Saula le Samuel zui nuom naw taphot chu hieng ang hin an bawngchal thaw ve ning a tih” tiin. Chuongchun, LALPA trìna chu mipuihai lai chun a’n lĕng a, thu khat chelin an inthok suok a. 8 Bezek hmunah Saulan anni chu a tiem a, Israel mihai chu nuoi thum an ni a, Juda mihai chu singthum an nih.
9 An mi hung tirhai kuoma chun, “Jabes-Gilead mihai kuomah hieng hin hril ro: ‘Zinga hin sunchang hmain san suok ni’ng in tih’ tiin” a ta. An mi tirhai chu an kǐr a, Jabes mihai chu an hril a, an lawm hle a. 10 Anni chun Amon mihai kuomah, “Zinga hin kan hung inpĕk ding a na, in nuom ang angin kan chungah thaw ro” an ta.
11 A zinga chun Saulan a mihai chu pawl thumin a thre a, khawfingchatah an inkulna hmuna chun a va hlù khum a, Amon mihai chu sunchang lai chen an that a, an that mahlahai chu an tlăn dar vong a, a kopa um hrim hrim an um nawh.
Lalin Saula an siem nghet
12 Mipuihai chun Samuel kuomah, “Tuhai am an na, ‘Kan chungah Saulan ro a rĕl telul ding maw’ tituhai kha? Chuong mihai chu hung thruoi suok unla, lo sukhlum kan tih” an ta. 13 Saula chun, “Voisun hi LALPAN Israelhai a san suok ni a na, voisun kher hin chu tu khom sukhlum lo ding a nih” a ta.