3 “Chun, chu taka inthok chun fe pei i ta, Tabora saisaw kûng lien va tlung i ta, chu taka chun mi pathum, Bethela Pathien be dinga fehai chu intuokpui i ta, pakhat chun keltê pathum kei a ta, pakhat chun beiper pathum chawi a ta, pakhat chun uoiin peng chawi a tih. 4 Chibai bûk an ti che a, beipèr pahni chu pe’ng an ti che a, chu chu la rawh. 5 Chu zoah Filistin sipaihai umna Pathien tlang Gibea chu va tlung i ta, i pan lai chun perkhuong dam, khuongtê dam, theihlê dam, tringtrang dam chawia zawlnei ruol, hmunsânga inthoka hung thlahai chu intuokpui i ta, thu hril duol duol an tih. 6 LALPA thlarau chu thilthawtheina leh i chungah hung tlung a ta, nang khom an thu hrilnaa chun thrang ve’ng i ta, mi danglam daiah hung inchang i tih. 7 Hieng inchiknahai hi i chungah a hung tlung pha leh thil hung um dan zir ang peiin i thaw ding a nih, Pathien i kuomah a um si a. 8 Ka fe hmain Gilgalah lo zu fe hmasa la, kei khom pumraw thilhlân le inremna thilhlân inhlàn dingin hung thla veng ka ta, ka hung tlung phaa i thaw ding ka hung hril hmâ chè chu ni sari sung mi lo nghak rawh” a ta.

9 Samuel a maksan ding tawmin Saula lungril chu Pathienin a hung thlak danglam a, chuong inchiknahai po po chu, chu ni chun a hung tlung ta vong a. 10 Gibea an tlung chun zawlnei ruolin an lo hmuok a, Pathien Thlarau chu a chungah thilthawtheinain a hung tlung a, an thu hrilnaa chun a thrang ve ta a. 11 A hmaa ama lo hretuhaiin zawlnei ruol laia thu a hang puong ve an hmu chun, “Kisa naupa chungah ieng top am a tlung an ta le? Saula chen khom zawlneiah a lo thrang an ta maw?” tiin an indon tuo a.

12 Chu khuoa mi pakhat chun, “Hieng zawlneihai khom hi an pahai chu iem an ni bik a?” a lo ti a. Chu taka inthok chun, “Saula chen khom zawlneia thrang an ta?” ti chu infiemna trongkam takah an hung hmang phà tah a nih. 13 Thu hril duol duolnaa a thrang zoin Saula chu hmunsângah a fe a.

14 Saula pate chun Saula le a siehlaw kuomah, “Khaw lai am in fe a?” tiin a lo indon a. Ama chun, “Sabengtung zongin kan fe a, kan hmu naw phing leh Samuel kuomah kan fe a nih” a ta. 15 A pate chun, “Samuel chun i kuomah iem a lo hril che, mi hang hril ta” a ta. 16 Saula chun a pate kuomah, “Sabengtunghai chu an hmu tah ti a mi hril” a ta, lal dinga hriek a năl thu ruok chu a hril sà nawh.

17 Samuel chun Israel mipuihai chu Mizpaah LALPA hmaah a ko khawm a. 18 Israel thlahai kuoma chun, “LALPA, Israelhai Pathien chun hieng ang hin a tih: ‘Israelhai chu Aigupta rama inthokin ka thruoi suok a, Aigupta mihai kuta inthok le a suknomnatu po pohai rama inthokin ka san suok a; 19 nisienlakhom voisun hin an mangangna le rinumna po poa inthoka sanhimtu an Pathien chu an mi dit naw a, ka kuomah, ‘Ni lo e, lal mi siempêk rawh’ an ti a. Chuleiin, tu hin Israel hnam po po le pahnam po po chu LALPA hmaah hung inlang ro” a ta.

20 Samuel chun Israel mi po po chu a hung inlangtir a, Benjamin hnam chu thrumvawra thlang a lo ni ta a. 21 Benjamin chihai chu an sungkuoin an hung inlang a, Matri sungkuoa mi, Kisa naupa Saula chu thlang a lo ni ta a, sienkhom ama an hang zong a, an hmu naw a. 22 LALPA kuoma chun, “Ama chu a la hung inlang naw zing am a ni?” tiin an indon a, LALPA chun, “Ngai ta u, a thuomhnaw lai an biruk a ni kha” a ta. 23 Chuongchun an tlăn a, an va thruoi suok a, mipui lai a hang ngir chun anni laia dung insâng tak a lo ni a, a dàr khèl phak tu khom an um nawh. 24 Samuel chun mipui kuomah, “LALPA mi ruot hi in hmu am? Mi po po lai ama ang hrim an um nawh” a ta. Mipui chu, “Pathienin laltak chu humhim raw se” tiin an khĕk a.

25 Samuel chun lal hnuoia an invong dan dinghai chu mipui a zirtir a, lekhabuah a ziek thlak a, LALPA hmaa chun a sie thra a. Chu zoah mipui chu mani in sengah a’n trìntir tawl ta a. 26 Saula chu Gibea an ina chun a kîr a, Pathienin an lungril a them tah mi huoisenhai chun an zui a. 27 Buoina siem châk mi rilo threnkhat ruok chun, “Ieng tin am hi mi hin a mi san suok ding?” tiin an deusaw a, thilpêk ieng khom an hung pek nuom naw a. Saula ruok chu a to zing a.