3 Saula pa Kisa chun a sabengtung ruol an tla hmang leiin a naupa Saula kuomah, “Siehlawhai laia pakhat hi thruoi la, ei sabengtunghai va zong rawh” a ta. 4 Efraim tlangram le Salisa le a sè vêl chen an dap vong a, sienkhom an hmu zo naw a. Salim bielah an zong nawk a, sienkhom an hmu nawh. Chu zoah Benjaminhai ramah an zong nawk a, an hmu zo chuong bok nawh.

5 Zufa biel an tlung chun Saula’n a siehlaw kuomah, “Thaw rawh, kir nawk ta’ng ei tih. Chuong naw chun ka pa’n sabengtunghai ngaituo loin eini mi ngaituo lem rawi a tih” a ta. 6 A siehlaw chun, “Ngai ta, hi khuoa hin Pathien mi a um a, mi inzaum tak a na, a hril taphot chu a hung tlung indik ngèi ngéi hlak a nih. Thaw ta, a umnaa chun fe’ng ei ta, ei fena ding tieng khom mi hril thei rawi naw nim” a ta.

7 Saula chun a siehlaw kuomah, “An leh, ei fe chun iem ei chawipèk hrim hrim ding? Ei bu chawi hlak ei fak zo ta si. Pathien mi kuoma thilpêk chawi ding ei nei dĕr naw a nih. Iem ei la nei hrim hrim a?” a ta. 8 Siehlaw chun, “Tangka sekel hmun lia threa hmun khat chu ka la kol a, chu chu ei fena ding a mi hril manah Pathien mi chu pe el ei tih” a ta. 9 (Kha hma khan chu Israel mihai laia miin Pathien rawn an nuom changin, “Thaw ro, hmutheitu kuomah fe’ng ei tiu” an ti hlak a; tu laia ‘zawlnei’ an ti hlak hi ‘hmutheitu’ an ti hlak a nih.)

10 Saula chun a siehlaw kuomah, “A thra hlauh a ni chu, fe’ng ei tih” a ta. Pathien mi umna khuo tieng pan chun an inthok suok a. 11 Khuo an pan tung lai chun tui chawia hung nunghak ruol an hmu a, “Hi taka hin hmutheitu a um?” tiin an indon a. 12 Anni chun, “Um e. In hma ela khan a fe. Inhmaw unla, hmunsângah mipuiin hlănbiekna an nei ding a ni leiin kan khuoah voisun hin a hung vak a nih. 13 Khuo in lut charin, hmunsânga bu faka a fe hmain ama chu hmu el in tih. An hlănbiekna chu mal a sawm ding a ni leiin, a tlung hma chun tu khomin bu fa naw ni hai, chu zoah fielhai chun bu an fâk chauh hlak a nih. Chuleiin, fe unla, hang nang nghal el in tih” an ta. 14 Chuongchun, khuo chu an pan tung a, an lut chun hmunsânga fe ding Samuel chu an intuokpui a.

15 Saula hung tlung hma ni khat khan LALPAN Samuel kuomah hieng hin thu a puong a: 16 “Hieng tik huna hin zingah Benjamin rama inthokin tlangval pakhat i kuomah hung tir ka ta, ka mi Israelhai chunga hotu dingin hriek lo năl rawh. Ama chun Filistinhai kuta inthokin ka mihai san suok a tih. An khĕk ri chun ka kuom a hung tlung tah leiin anni chu ka ngaisak a nih” tiin.

17 Samuelin Saula a hmu char chun LALPAN a kuomah, “En ta, i kuoma ka hril pa kha; ama hin ka mihai chungah ro rêl a tih” a ta. 18 Saula chun kul kotkhara ngîr Samuel chu a va hnai a, “Hmutheitu in chu khaw lai am a um ti mi hril raw khai” a ta. 19 Samuel chun, “Keima hi hmutheitu chu ka nih. Ka hmaah fein hmunsâng tieng khi pan la, voisun hin ka kuomah bu i fâk ding a nih. Zingah infetir chau ka ti che a, i lungrila um po po khom hril vong ka ti che. 20 I sabengtung, ni thum inhmang tahai khom chu lungkham naw rawh, an hmu tah. Israelhai laia ropuina po po chu tu ta ding am a na? I ta ding le i pa ina mi po po ta ding a ni naw am a ni?” a ta.

21 Saula chun, “Israel hnam laia a chîn tak Benjamin hnama mi ka ni naw am a ni? Benjamin pahnam râu rauh lai khom a chîn tak ka ni naw maw? Iengtin am hieng thil hi ka kuomah i hril a na?” a ta.

22 Samuel chun Saula le a siehlaw chu a thruoi a, mikhuol pindana chun a thruoi lŭt a, an mi fiel sawmthumhai lai chun thrungna poimaw takah a’n thrungtir a. 23 Samuel chun bu suongtu kuomah, “Sie hran dinga ka pĕk che kha tu hin hung la rawh” a ta. 24 Thlai suongtu chun sa mal le a chunga um chu a hung chawi a, Saula hmaa chun a sie a, Samuel chun, “En ta, hi huna i ta dinga sa ka lo sie hranpĕk chê chu a nih. Ka mikhuolhai ruol hin kîlin fa rawh” a ta. Chu ni chun Saula chu Samuel leh thlaithlĕng an kìl tlăng ta a.

25 Hmunsânga inthoka khuoah an fe thlăk hnungin Samuel chun Saula chu in chung zawlah zalna a siempek a, chutaka chun a riek a. 26 Zîng inhma takin Samuel chun in chung zawla riek Saula chu a ko a, “In siem zo la, infetir tâng ka ti che” a ta. Saula a’n siem zo chun Samuel leh an suok tlàng a. 27 Khaw hmawr an tlung chun Samuelin Saula kuomah, “Siehlaw hi ei hmaa lo fe dingin hril rawh. Nang ruok chu hi taka hin la ngîr phot la, Pathiena inthoka ka thu dong chu ka hril ding chè a nih” a ta, siehlaw chu a lo fe hmasa a.