Israelhaiin lal an hni
8
1 Samuel chu a hung upa ta a, a naupahai chu Israelhai chunga rorêltuah a sie a. 2 A upa tak hming chu Joel a na, a dottu hming chu Abija a na, Beershebaa inthokin ro an rĕl a. 3 Nisienlakhom, a nauhai chun a um dan la ve loin sum le pai an hnot a, thamna an lăk a, indik lo takin ro an rĕl a.4 Israel upahai po po chu an inkhawm a, Rama khuoah Samuel kuoma chun an fe a, 5 a kuomah, “Ngai ta, i hung upa ta hle a, i naupahai hlak chun i um dăn an lăk ve si naw a, hnam dang po pohai thaw dăn angin kan chunga rorêltu dingin lal mi ruotpek rawh” an ta. 6 “Rorêltu dingin lal mi ruotpek rawh” an ti lei chun Samuel chu a lawm naw hle a, LALPA kuomah a trongtrai a. 7 LALPA chun a kuomah, “Mipuiin i kuoma an hril po po chu ngaithla rawh. Nangma an dit naw lei chê a ni naw a, an chunga rorêltu dingin keima an mi dit naw lei lem a nih. 8 Aigupta rama inthoka ka thruoi suok nia inthok tah khan tu chen hin mi nghatsan le pathien dang rong mi bawlsan an chǐng a, chuong ang chun i chunga khom an thaw ve a ni hih. 9 Chuleiin, an thu ngaithla la, amiruokchu, an chunga lalhai an la hung chĕt dan dinghai chu ngun takin hril lawk tawl rawh” a ta.
10 Samuel chun LALPA thu po po chu lal hnitu mipuihai chu a hril vong a. 11 An kuoma chun, “In chunga rorêltu lal chu hieng ang hin a la hung che ding a nih: A tawlailir le a sakorhai enkoltu dingin in naupahai hmang a ta, a tawlailir hmaah la tlân an tih. 12 A thren chu mi sang chunga kawmandar dam le sawmnga chunga kawmandar damin sieng a ta, a threnin a lo inletin a bu sîk an ta, a thren ralthuom siemtu le a tawlailir hmangruo siemtuah hmang tawl a tih. 13 In naunuhai chu rimtui siemtua dam, bu suongtua dam, bei siemtua dam hmang a tih. 14 Chun, in in le lohai, in grep huonhai le in oliv huonhai a thrá thrà lăkpêk a ti chêu a, a siehlawhai pêng a tih. 15 In bu tharsuok le in uoin tharsuok sawma pakhat la’ng a ta, a thoktuhai kuomah pe’ng a tih. 16 In bawipa le bawinuhai le in ran ruol laia a thra tak ngot le in sabengtunghai chu ama hmang dingin lăkpêk a ti chêu. 17 In beram ruol laia mi sawma pakhat la’ng a ta, nangni ngei khom a siehlawah thrang in tih. 18 Chu ni chu a tlung pha leh in lal thlang laka inthoka thawvengna hniin inrûm in ta, chu huna chun LALPAN donsak naw ni chêu” a ta.
19 Nisienlakhom, mipuihai chun Samuel thu chu an ngaithlak nuom naw a, “Ni lo e, kan chunga lal ding kan dit a nih. 2 20 Chuongchun, hnam danghai ang hung ni vêng ei ta, ei lal chun ro mi rêlpêk a ta, hmá thruoiin ei rălhai mi dopêk a tih” an ta. 21 Samuel chun an hril po po chu a hriet a, LALPA hmaa chun a hril sawng pei a. 22 LALPA chun, “An thu ngaithla la, lal ruotpek el tawl rawh” a ta. Samuel chun Israel mihai kuomah, “Mi tin mani khuo sengah kir nawk ta ro” a ta.