7
1 Chuongchun, Kiriath-Jearim khaw mihai chu an hung a, LALPA Bawm chu an lăk tung a, tlânga Abinadab ina chun an chawi a, a naupa Eleazar chu LALPA Bawm enkoltu dingin an inhlăn thienghlim a.
Rorêltuah Samuel a thrang
2 LALPA Bawm chu kum sawmhni zet Kiriath-Jearimah a um a, chu sung chun Israelhai chu LALPA tieng an lung an lĕng nawk ta a. 3 Samuel chun Israel sungkuo po po kuomah, “In lungril po poa LALPA tienga hung ngha in ni tak tak chun, ram dang pathienhai le Astoret limhai chu sie hmang dai unla, in lungril LALPA ta dingin buotsai unla, ama rong chauh bawl ro, chuongchun Filistinhai kuta inthok hin san suok a ti chêu” tiin a hril a. 4 Israel mihai chun Baal le Astoret hai lim chu an sie hmang a, LALPA rong chauh chu an bawl ta a.
5 Samuel chun, “Israel mihai po po chu Mizpa-ah ko khawm vong ro, LALPA kuomah trongtraipek ka ti chêu” a ta. 6 Mizpa-a chun an fè khawm a, tui an chawi a, LALPA hmaah an bun thlak a. Chu ni chun bu an nghei a, “LALPA lakah thil suol kan lo thaw a nih” tiin an inpuong a. Mizpaa inthok chun Samuelin Israelhai ro a rĕlpĕk a.
7 Mizpaah Israelhai an pung khawm ti Filistinhaiin an lo hriet chun anni chu bei dingin Filistin lalhai chu an inthok tung a. Filistinhai hung thu Israelhaiin an lo hriet chun an tri hle a. 8 Samuel kuomah, “Filistinhai kuta inthoka a mi san suok theina dingin LALPA chu ma loin ko zing rawh” an ta. 9 Samuel chun beramte, nene ne lai a hung lăk a, LALPA kuomah pumraw thilhlânah a’n hlăn a, Israelhai aiawin LALPA a ko a, LALPA chun a hung don a.
10 Samuelin pumraw thilhlân a’n hlăn lai chun Filistinhai chun Israelhai chu bei dingin an hung nangchîng trĕp ta a. Nisienlakhom, chu ni chun LALPAN vaninrûmin Filistinhai chu a hrâwk a, nasa takin a sukchi-ai a, Israel mihai chun an intlăwm ta dĕr a. 11 Israelhai chu Mizpaa inthok chun an inthok suok a, Filistinhai chu Beth Kar chuonhnuoi chen an hnot a, lampui intluonin an that a. 12 Samuel chun lung a lâk a, Mizpa le Sen inkarah a phun a, “Hi chen rau hi LALPAN a mi thrangpui a nih” tiin a hmun hminga chun Eben-ezera a’n bûk a.
13 Chuongchun, Filistinhai chu an tukdol a, Samuel dam sung po po LALPA kut chun Filistinhai chu a dang tlat leiin Israel ram chu an rûn nawk ta ngai nawh. 14 Filistinhaiin Israelhai an lăkpĕk khuo po po chu Ekron-a inthoka Gath chenin Israelhai kutah an pĕk kǐr nawk vong a, an sè vèl ram po po chu Filistinhai kuta inthokin Israelhaiin an san suok a, Israel mihai le Amor mihai inkàrah inremna a hung um ta a.
15 Samuel chun a dam sungin Israel mihai ro a rĕl a. 16 Kum tin Bethel le Gilgal le Mizpa khuohai chu a kan kuol a, a fená nàah Israelhai ro a rêlpêk pei a. 17 Amiruokchu, a in le lo umna Rama khuoah a kir nawk zie a, chu taka um Israelhai ro chu a rĕlpĕk a, chu taka bok chun LALPA ta dingin maichăm a siem a.