Thuthlung Bawm a kîr nawk
6
1 LALPA Bawm chu Filistinhai ramah thla sari a um a. 2 Filistinhai chun an thiempuhai le aienthiemhai an ko a, “LALPA bawm hi iem ei law ding a na? Ieng tin am ei thon kir ding a na ti mi hril ro” tiin an indon a. 3 Anni chun, “Israelhai Pathien Bawm hi in thon kir ding a ni khomin a ruok chun infetir naw ro. A kuomah bawsiet ngaidamna thihlân inhlăn unla, chuongchun sukdamin um in ta, nangnia inthoka kut a lakson nawna san khom hung hrie’ng in tih” an ta.4 Filistinhai chun, “Ieng ang bawsiet ngaidamna thilhlân am inhlăn ei ta?” an ta. Anni chun, “Rangkachakin khuoihli lim panga le mazute lim panga siem unla, Filistin lal tinin pakhat seng inhlăn ro, in rênga chunga hri inlêng le in lalhai chunga hri inlêng chu thuhmun a ni si a. 5 Chuleiin, khuoihli lim le in ram suksetu mazute lim siem unla, Israelhai Pathien chu chawimawi ro, a kut chu in chunga le in pathienhai chungah a sukzăng nuom el rawi mawh! 6 Faraw le Aigupta mihaiin lungril an sukkhauh ang khan ieng dinga in lungril in sukkhauh am? Anni chu na taka a hrem lei khan Israelhai chu insuoin an infetir chauh a ni naw am a ni? 7 Chuleiin, tu hin tawlailir thar buotsai unla, bawngpui pahni, a nene sawr lai, ringkol la bat ngai dĕr lo chu la unla, tawlailir chu inkeitir unla, an tehai chu hung thruoi kir unla, thlung ro. 8 LALPA Bawm chu la unla, tawlailira chun sie unla, bawsiet ngaidamna thilhlân dinga in inhlàn rangkachak thil hluhai chu thingremah khumin, Bawm sîrah siein infetir unla, inthla el ro. 9 Ramri tieng pana Beth-semes tieng tawlailir a fe chun ei chunga thil tlung thra lo tak hi ama lo thaw ni’ng a ta, a fe naw chun a mi hremtu chu ama kut ni loin, eini chunga tla ve hrim hrim a nih ti hrieng ei tih” an ta.
10 Chuong ang tak chun an thaw a, bawngpui, a nene sawr lai pahni an va kei a, tawlailir chu an inkeitir a, a têhai chu in tieng an thlung a. 11 LALPA Bawm chu tawlailira chun an sie a, rangkachak mazute lim le khuoihli lim siena thingrem chu an sie bok a. 12 Bawngpuihai chun Beth-semes an pan ngat ngat a, inbu pei pumin lampui chu an hraw a, voi tieng amanih chang tieng amani khom an pĕt nawh. Filistin lalhai chun Beth-semes ramri chenin an zui a.
13 Ruoma bu sîktu Bet-semes khaw mihai chu an hang ngha a, Bawm hung chu an hmu a, an lawm hle a.
14 Tawlailir chu Beth-semes khaw mi Josua loah a lût a, lungpui lien tak bula chun a chawl a. Mihai chun tawlailir thing chu an chèk nawi a, bawngpuihai chu LALPA ta dinga pumraw thilhlânah an inhlăn a. 15 Levihai chun LALPA Bawm le rangkachak thil lim umna thingrem chu an lăk thlăk a, lungpui chunga chun an sie a. Chu ni vêk chun Beth-semes khaw mihai chun LALPA kuomah pumraw thilhlân an inhlăn a. 16 Filistin lal pangahai chun chuong thil chu an hmu hnungin a ni lá làin Ekron tieng an kir nawk ta a.
17 Filistin mihaiin bawsiet ngaidamna thilhlân dinga rangkachaka siem khuoihli lim an inhlàn zat chu hieng ang hin a nih: Asdod khaw puolin pakhat, Gaza khaw puolin pakhat, Askelon khaw puolin pakhat, Gath khaw puolin pakhat le Ekron khaw puolin pakhat seng a nih. 18 Rangkachaka siem mazute lim an inhlàn zat chu Filistin lal pangahai khuo, kula inhuon le an khawperhai po po zat a nih. LALPA Bawm an innghatna lungpui chu Beth-semes khuo Josua loah tu chen hin inchikna dingin a la um zing a nih.
Thuthlung Bawm Kiriath-jearim ah
19 Amiruokchu, LALPA Bawm sung an en leiin Beth-semes khaw mihai chu LALPAN a hrem a, mi sawmsaria a sukhlum a. LALPA kut thlak nat leia thihai chu mipuiin an sŭn a. 20 Beth-semes khaw mihai chun “Hi Pathien thienghlim LALPA hmaa hin tu am ngir theiin, ei kuoma inthok hin tu kuom tieng am pan tung nawk a ta?” an ta. 21 Chuongchun, Kiriath-jearim khaw mihai kuoma chun, “Filistin mihaiin LALPA Bawm an hung sie nawk ta a, hung thla unla, in kuom tieng la tung ro khai” tia hril dingin mi an tir a.