Thuthlung Bawm Filistinhai kutah
5
1 Filistinhai chun Pathien Bawm chu an lăk a, Ebenezer-a inthokin Asdod-ah an fepui a. 2 Bawm chu an pathien Dagon tempulah an zăwn lut a, Dagon lim sìra chun an sie a. 3 A tûk inhma taka Asdod khuohai an tho chun LALPA Bawm hmaa chun Dagon chu a hmaia hnuoi sikin a lo tlu dĕr a. Dagon chu an lăk a, a umna pangngaia bok chun an sie nawk a. 4 A zingah an tho chun Dagon chu LALPA Bawm hmaa a hmaia hnuoi sika zâl chu an hmu nawk a. A lu le a bânhai chu a tliek vong a, a bonghai chu kotkhar bulah an inhlum rum a, a pum chauh chu a um ta a. 5 Hi lei hin Dagon thiempuhai le Dagon be dinga Asdod tempula hung tu khomin tu chen hin tempul kotkhar bul chu an la sir ngam nawh.6 LALPA kut chu Asdod le a se vĕla umhai chungah nasa takin a tla a, an chungah sietna a tlung a, pânsie an invoi a.a 7 Asdod khaw mihaiin chuong thil chu an hmuin, “Israelhai Pathien Bawm hi eini kuomah um zing naw raw se, ei chunga le ei pathien chunga a kut thlàk a na êm el” an ta. 8 Chuongchun, Filistin lalhai po po chu an ko khawm a, “Israelhai Pathien Bawm chu ieng tin am thaw ta’ng ei ta?” an ta. Anni chun, “Israelhai Pathien Bawm chu Gath khuoah va fepui ro” tiin an lo hril a, chuongchun Pathien Bawm chu an fepui ta a. 9 Bawm an son hnung chun LALPA kut chu Gath khaw chunga chun a tla a, thlabarin an chi-ai a, a khaw mihai chu a chin a lienin pânsiein a hrem a.
10 Chuongchun, Pathien Bawm chu Ekron tieng an thon a. Pathien Bawmin Ekron khuo a lŭt tawm chun, “Ei ni le ei mipuihai sukhlumtu dingin Israelhai Pathien Bawm an hung zawn kir ie” tiin an khèk a. 11 Filistin lalhai po po chu an ko khawm a, an kuomah, “Keini le kan mihai a mi sukhlum nawna dingin Israelhai Pathien Bawm hi thon hmang unla, a umna ngaia bok kîr nawk raw se” an ta. 12 LALPA kut chu a rik hle a, thi inlâunain a khawnâwtin a sukthlabăr a. A thi nawhai khomin pansie an tuor a, khawpuia an inrŭm ri chun van a tong a.