Thuthlung Bawm an man
4
1 Chuong lai chun Israelhai chu Filistin mihai do dingin an inthok suok a, Ebenezer-ah an inkul a, Filistinhai chu Afek-ah an inkul bok a. 2 Filistinhai chun Israelhai chu an hung bei a, an hnè a, indona hmuna chun mi sangli lai an that a. 3 An inkulnaa Israel sipaihai an hung kǐr chun an upahaiin, “Ieng leia voisun hin Filistinhai hmaah LALPAN a mi suktlawm am ni’ng a ta? Thaw ro, eini leh fe a, ei hmĕlmahai kuta inthoka mi sansuoktu dingin Silo-a inthokin LALPA Thuthlung Bawm hang la’ng ei tiu khai” an ta.4 Chuongchun, Silo-ah mi an tir a, chu taka cherubim-hai kara inthrung Iengkim LALPA Thuthlung Bawm chu an hung lăk a, Eli naupa Hofni le Finehas hai khomin bawm chu an zui ve a. 5 An inkulna hmuna Thuthlung Bawm a hung tlung chun hnuoi nghor hning hiel khopin Israelhai chu an khĕk dur dur a. 6 An khĕk ri Filistinhaiin an lo hriet chun, “Hebrai mihai inkulnaa an khek dur dur chu ieng tizie am an ta le? an ta. An inkulnaah LALPA Thuthlung Bawm a hung tlung ti an hriet chun an tri hle a. 7 “An inkulnaah pathien a hung a ni chu! Ei chung a pik ie! Kha hma khan hieng thil hi a la um ngai nawh. 8 Ei chung a pik ie! Chuong ang pathien hràthai kuta inthok chun tuin am mi san suok ta’ng a ta? Chuong ang pathienhai chu an nih thlalĕra hri chi tinrênga Aigupta mihai sukhlumtu kha! 9 Aw nangni Filistin mihai, huoisen takin um ro. Insukpasal ro, chuong naw chun in thu hnuoia an um ang bok khan an thu hnuoiah um ve rawi in tih. Insukpasal unla, bei pei ro” an ta.
10 Chuongchun, Filistin mihai chun an hung bei a, Israelhai chu an intlawm a, an inkulna tieng an tlansie a, an that treu a, Israel sipai singthum an thi a. 11 Pathien Bawm chu an lăkpĕk a, Eli nauhai pahnih, Hofni le Finehas hai chu an that bok a.
Eli thi thu
12 Chu ni chun Benjamin thlaa mi pakhat chu zakuo in-ek nung le a lu-ah pilvut kai nuoiin indona hmuna inthok chun Silo a tlân tlung a. 13 A va tlung chun Eli chun lam sìra a thrungnaa inthok chun a lo thlîr zing a, a lungrila a trithawngpui tak chu Pathien Bawm a nih. Khuo a hung tlung a, chanchin a hang hril chun a khuoin an trap ta chĕl chûl el a. 14 An khèk ri Eli-in a lo hriet chun, “Ieng leia an khĕk chĕl chûl am a na?” a ta. Chu mi chun inhmaw takin Eli kuom tieng a pan a, thil chinchang chu a va hril a. 15 Eli chu kum sawmkuo pariet mi a ni ta a, a mitin khuo a hmu dukdak thei ta nawh. 16 A kuoma chun, “Indona hmuna inthoka hung ka na, voisun ngeia hung tlansie ka nih” a ta. Eli chun, “Ka naupa, ieng tin am thil a um a?” a ta. 17 Chanchin hung intluntu chun, “Filistinhai hmaah Israelhai an tlanse a, mi tam tak an thi a, i nauhai Hofni le Finehas khom an thi a, Pathien Bawm khom an làkpêk” a ta. 18 Pathien Bawm thu a hril charin kotkhar bula a thrungnaa inthrung Eli chu a thalin a tlu a, a rîng a nol tliek a, a thi a; ama chu a tar ta a, a’n thazo ta si nawh. Kum sawmli sung Israelhai a thruoi hman a nih.
Finehas nuhmei thi thu
19 Chun, a mo, Finehas nuhmei chun nâu a pâi a, a nau nei hun a hnâi ta hle a. Pathien Bawm an làkpèk thû le a tarpu le a pasal thî thù a hang hriet chun a nau hase a’n tran nghal a, nau a nei a, amiruokchu a tuor zo ta naw a. 20 A chat thlăk tawmin nau domtu nuhmeihai chun, “Beidong naw rawh, naupa i nei ta hi” a ta. Sienkhom, a don ta naw a, a ngaisak ta bok nawh.