2 Chuong lai chun Eli chu a mit a chău tăk leiin khuo a hmu mumal thei ta naw a, a zălna hmun pangngaia chun a zâl a. 3 Pathien khawnvar khom an la that hman naw a, Pathien bawm umna LALPA tempula chun Samuel chu a zâl a. 4 LALPA chun Samuel a ko a. Samuel chun, “Hi taka hin ka um?” a ta. 5 Eli kuomah a va tlân vat a, “I mi ko maw? Hi taka hin ka um” a ta. Ama chun, “Ka ko naw che, va zâl nawk ta rawh” a ta. Chuongchun a fe a, a zâl nawk ta a.

6 LALPA chun Samuel chu a ko nawk a. Samuel chu a tho a, Eli kuomah a fe a, “I mi ko maw? Hi taka hin ka um” a ta. Eli chun, “Ka naupa, ka ko naw che. Fe la, va zâl nawk ta rawh” a ta.

7 Chuong lai chun Samuel chun LALPA a la hriet ve naw a, LALPA thu chu a kuoma puong a la ni bok nawh.

8 LALPA chun Samuel chu a ko nawk a, chu chu a ko voi thumna a nih. Samuel chu a tho a, Eli kuomah a fe a, “I mi ko maw? Hi taka hin ka um” a va ti nawk a. Chu phing leh naupang chu LALPAN a ko a nih ti Eli chun a hriet ta a. 9 Eli chun Samuel kuomah, “Fe la, va zâl nawk ta rawh. A ko nawk che chun, ‘LALPA, thu chu hril rawh, i siehlaw hin a ngaithlàk ie’ ti rawh” a ta. Samuel chu a zalna hmuna chun a va zâl nawk a. 10 LALPA chu a hung a, a bula chun a ngîr a, a hmaa ang bok khan, “Samuel, Samuel” tiin a ko nawk a. Samuel chun, “Thu chu hril rawh, i siehlaw hin a ngaithlăk ie” a ta.

11 LALPA chun Samuel kuomah, “Ngai ta, Israel rama a hre taphothai na khel ngèi ngéi ding thil ka thaw ding a nih. 12 Chu huna chun Eli kuoma a sungkuo chunga ka thaw ding ka hril po po chu a bula inthoka a tawp chenin ka hlen ding a nih. 13 A nauhaiin thil suol thaw a, Pathien an sukmuolphozie hre zing sia a khap naw leia an sungkuo chungthu kumkhuoa dinga ka rêl ding thu chu ama khom ka hril tah. 14 ‘Eli sungkuo bawsietna chu hlănbiekna thilhlâna sukre thei ni ta naw nih’ tiin ka lo inkhăm ta si a” a ta.

15 Samuel chu zing tieng chen a in a, LALPA in kotkharhai chu a hong a. Inlărna a hmu chu Eliin hrieng a tih ti Samuel chun a trìthawng hle a. 16 Amiruokchu, Eli chun a hung pan a, “Ka naupa Samuel” tiin a hung ko a. Samuel chun, “Hi taka hin ka um” a ta. 17 Eli chun, “Ieng thil am LALPA chun a hril che a? Ka lakah ieng khom ip naw rawh. I kuoma a hril po po chu ka lakah ip i nei chun i chungah Pathienin a nat thei ang tawpin thaw raw se” a ta. 18 Chuongchun, Samuel chun ip dêr loin iengkim a hril a. Eli chun, “LALPA a na, thra a ti ang peiin thaw raw se” a ta.

19 Samuel chu a hung inthrang lien pei a, a kuomah LALPA a um a, a hril hrim hrim chu a sukdik pei a. 20 Dan-a inthoka Beersheba chena Israel mihai po po chun Samuel chu LALPA zawlnei a ni takzet ti an hriet ta vong a. 21 LALPA chu Silo-a chun inlăr zui peiin, Samuel kuoma chun a thu a puong hlak a. Samuel thu chu Israel mihai po po lai a hung inthang suok ta a.